O Andrei ma le Upu Leaga
E alala le tusitala i Iuta, ISA.
“O le a ou taumafai ia salamo, ia sili atu, ia tatalo” (Children‘s Songbook, 98).
“E te manatu e te sili atu nai lo tagata uma lava aua e te le palauvale,” Na fai mai ai Nikolai i le malologa.
“E le moni lena tala,” o le tala lea a Andrei.
“Aisea la e te le faia ai se upu palauvale se tasi? Na o se tasi? E te le oti ai lava. E palauvavale uma a isi tagata.”
Na faamimigi tauau o Andrei. “Ou te le fia faia lava.”
Sa iloa e Andrei e sese le palauvale ma e aluese ai le Agaga Paia. Na manao Andrei ia mafuta le Agaga Paia ma ia. O lea e le palauvale ai o ia.
Sa fou Andrei i le aoga, ma o le taimi nei, e na o Nikolai lava i lana vasega ono na manao e avea ma ana uo. Ae na faalavelave pea Nikolai ia te ia e uiga i le palauvale i aso taitasi. Ma i aso taitasi na faasolo ina le lava Andrei i le fai atu e leai. Ma le isi, sa fefe Andrei nei le toe avea Nikolai ma ana uo, ma o le a tuuatoatasi moni ai lava o ia.
“Na o le fai lava o se upu palauvale se tasi,” na fai mai ai Nikolai i le tuua o le aoga. “Ona ou le toe faalavelave lea ia oe.”
Na iu lava ina matuai le lava Andrei i le faalavelave soo mai ia te ia o lea na ia faia ai se upu palauvale se tasi—o se tasi e le leaga tele.
Na lue atu le ulu o Nikolai. “Lelei, ua avea nei oe o se tasi o i matou.”
Ina ua mavae lena, na talanoa atu foi isi uo a Nikolai ia Andrei. Sa latou aai ma taaalo lakapi faatasi ma ia i le malologa. Ae o le i ai i le vaega o uo a Nikolai sa pei o le savali atu i totonu o le oneone mimiti. O le tele lava o le tafafao o Andrei ma i latou, o le tele foi lena o lona talanoa ai ma amio e pei o i latou. Ma latou te palauvavale uma lava. E faateleina. Sa latou talie ma faatiga e le tasi le isi. Sa latou faia ni tala le mafaufau e uiga i o latou faiaoga. Sa latou feita ma amio saua i le tele o taimi. Na amatamata lemu lava ona ita soo Andrei ma maua ai le tele ma le tele o mafuaaga e palauvale ai.
I se tasi po ina ua o Tina ma Tama, na fai ai se finauga a Andrei ma lona tuafafine matua o Katya e uiga i le faafiafiaga e matamata ai. E aunoa ma le mafaufau i ai o Andrei, na oso mai se upu palauvale mai lona gutu.
Na foliga faateia Katya. “Ou te taua ia Tina.”
Sa tamoe Andrei i lona potumoe ma ato mai le faitotoa. O le a se mea o tupu i nei tagata? Aisea na latou faaita ai o ia i taimi uma? Ina ua foi mai ona matua i le fale, na tatala lemu le faitotoa e Andrei ma faalogoina Katya ua faapea atu, “Tina, na palauvale mai Andrei ia te au.”
“O le a?” Sa faalogoina le tei o tina. “E le palauvale lava Andrei.”
Na tapuni le faitotoa e Andrei ma faapau ifo i lalo o lona moega. Sa ia mafaufau e uiga i le tele o le eseesega ua i ai nei o ia talu ona amata ona ia palauvale. Ua umi se taimi talu ona ia lagonaina le Agaga Paia.
Na tootuli Andrei i autafa o lona moega ma tatalo. “Tama Faalelagi pele e, ou te faamalie atu sa ou saua ma ita. Ou te faamalie atu sa amata ona ou palauvale. O le a ou faia le mea e sili atu.”
A o tatalo Andrei, sa faatumulia lona loto i se lagona mafanafana. Mo le taimi muamua lava talu ona amata ona ia palauvale, sa ia lagonaina moni lava le fiafia. Sa ia iloa e alofa le Atua ia te ia, ma sa mafai ona ia lagonaina le Agaga Paia. Sa ia lagonaina le faamagaloga ma iloa e mafai ona ia suia ma ia sili atu ona lelei.
Ina ua uma lana tatalo, sa ia tau atu ia tina le mea moni ma faatoese ia Katya. Na maua e Andrei se lagona sili atu ona lelei ina ua mavae lena mea. O le manaia ia o le faalogona pe a salamo.
O le aso na sosoo ai i le aoga, e lei aai faatasi Andrei ma le vaega a Nikolai. Nai lo lena, sa ia nofo i talaane o nisi tamaiti na te lei iloaina. O le a umi se taimi, ae na iloa e Andrei o le a ia maua ni uo e lelei ma fiafia ma e le palauvavale. E pei lava o ia.