O Tali mai Taitai o le Ekalesia
Pe Faapefea ona Maua le Filemu Moni
Mai se saunoaga o le konafesi aoao ia Aperila 2013.
O le sini faamoemoeina faalelagi o tagata lelei i soo se mea, o loo i ai ma o le a i ai pea lava e le aunoa, o le filemu lea i le lalolagi. E le tatau lava ona tatou fiu i le faataunuuina o lenei sini. Peitai, na aoao mai Peresitene Iosefa F. Samita (1838–1918) “E le mafai lava ona oo mai i le lalolagi lena agaga o le filemu ma le alofa … sei vagana ua maua e tagata le upumoni a le Atua ma le savali a le Atua … , ma iloa e paia lona mana ma lana pule.”
Tatou te faamoemoe ma le naunautai ma tatalo mo le filemu lautele, ae tatou te mauaina le ituaiga o filemu folafolaina o le taui o le amiotonu o ni tagata taitoatasi ma aiga. O lea filemu o se meaalofa folafolaina o le misiona ma le taulaga togiola a le Faaola.
O le filemu e le na o se saogalemu po o le leai o ni taua, vevesiga, fetauaiga, ma fefinauaiga. O le filemu e maua mai le iloaina e silafia e le Faaola po o ai i tatou ma iloa e i ai lo tatou faatuatua ia te Ia, alofa ia te Ia, ma tausia Ana poloaiga, e oo lava ma ae maise foi le i ai o faigata ma faalavelave matuia (tagai i le MF&F 121:7–8).
“O fea lou filemu? O fea ou te mapu ai pe a ua le mafai e isi punaoa ona faaatoatoaina au?” (“O Fea Lou Filemu?” Viiga, no. 68). O le tali o le Faaola, o le punavai ma le tufuga o le filemu. O Ia o le “Alii o le filemu” (Isaia 9:6).
Faalotomaualaloina i tatou lava i luma o le Atua, tatalo pea, salamo i agasala, ulu atu i vai o le papatisoga ma se loto momomo ma se agaga salamo, ma avea ma soo moni o Iesu Keriso o ni faataitaiga maoae o le amiotonu lea e tauia i le ola ai i le filemu.
O le Ekalesia o se sulufaiga lea e mafai ai e soo o Keriso ona maua ai le filemu. Fai mai nisi o tupulaga talavou i le lalolagi, o i latou e faaleagaga ae le lolotu. O le lagonaina e faaleagaga o se laasaga lelei muamua lea. Peitai, o totonu o le Ekalesia tatou te maua ai le faaaumeaina, aoaoina, ma fafagaina ai e le afioga lelei a le Atua. Ae sili atu ona taua, o le pule o le perisitua i le Ekalesia lena e saunia sauniga ma feagaiga paia e fusia faatasi ai aiga ma faaagavaaina ai i tatou taitoatasi e toe foi atu i le Atua le Tama ma Iesu Keriso i le malo selesitila. O nei sauniga e aumaia le filemu aua o feagaiga ia ma le Alii.
O malumalu o nofoaga ia e faatino ai le tele o nei sauniga paia ma o se punavai foi o le malutaga o le filemu mai le lalolagi. O i latou e asiasi atu i laufanua o le malumalu pe auai i maimoaga i le malumalu, e lagonaina foi lena filemu.
O le Faaola o le punavai o le filemu moni. E ui lava foi i tofotofoga o le olaga, ae ona o le Togiola a le Faaola ma Lona alofa tunoa, o le a tauia ai i latou o e ola amiotonu i le filemu patino (tagai Ioane 14:26–27; 16:33).