O le uso o lou tama o se tusiata ma e gaosia ni tamai vaa laau i totonu o fagu tioata. E manaomia ai le tele o le taimi, naunautaiga, ma le taumafaiga ina ia faia.

I se tasi aso na ou vaai ai i ana meafaigaluega uma lava ma matauina ai le auala sa faaaogaina ai meafaigaluega taitasi mo se mamanu faapitoa po o le vaneina o le vaa. A o ou vaai atu ia te ia o galue, sa ou ofo lava i le ala na te faaaogaina ai meafaigaluega i le faiga o nei vaa. Sa ou manatua ai le tala ia Nifae i le fauina o se vaa (tagai 1 Nifae 17–18). Sa ia fausia e tusa ai ma le ala a le Alii, ae le o le ala a tagata. Ua tuuina mai e le Atua ia i tatou ni meafaigaluega e fau ai a tatou lava vaa i Lana ala. O tusitusiga paia, faatuatua, ma le alofa o le Atua o meafaigaluega ia e tatau ona ou faaaogaina i lou lava olaga ina ia fausia ai ma le faaeteete lou lava vaa e aunoa ma ni taetaei. O loo ou aoaoina i aso taitasi ia avea ma se soo o le Alii.

O se tautotogo malulu i Tenimaka. Sa faatoa amata lau misiona talai, ma sa tauivi ma lau molimau. O au o se tagata liliu mai mo le na o le 19 masina ma na tumu i le le mautonu e uiga i le feagai ai ma se atunuu ese, se gagana sa le mafai ona ou tautala ai, ma se gasu o auala sa ou le mafai ona malamalama i ai. O au tatalo o le loto faafetai na vave ona avea ma ni tuuaiga oona: “Le Atua e, aisea ua e tuua ai na o au lava?”

I se tasi taeao sa ou aioi atu ai ia te Ia i le tatalo. Ae nai lo le fesili atu i le “aisea” ma le ita i lou loto, sa ou augani atu mo se molimau o le moni o le talalelei ma le aveeseina o ou masalosaloga.

Ina ua uma le tatalo, sa ou tatalaina au tusitusiga paia. Sa ou susueina i le Teuteronome 31:6: “Ia outou faamalolosi ma outou lototetele, aua tou te fefefe; ma aua foi le matatau i o latou luma; aua o Ieova lou Atua, lua te o faatasi ma ia; na te le tuua oe, na te le lafoai ia te oe.

Sa faatumulia lou loto i le olioli a o ou iloaina le tali i lau tatalo: sa i ai pea lava le Atua iina i le taimi atoa. Sa na o Lona faatalitali mai mo tatalo faamaoni nai lo le tuuaia ua tuulafoaiina.

O le a le tuua lava au e le Atua, e tusa lava pe foliga mai ua leai se faamoemoe i mea uma. Ma e mafai ona tatou lagonaina Lona alofa e ala i le tatalo ma Ana tusitusiga paia.