Iangoan taekan Iesu
E maeka te tia korokaraki i California, USA.
Mía e kukurei. Bon ana moan tai n te taromauri! Mitinare a tuangiia ana utu taekan te ekaretia. Ana utu Mía a iangoia n roko.
Mía e taratara nako. E noore te kunnikai ae mainaina iaon te taibora. Iai te bwai iaana.
“Tera are iaan te kunnikai anne?” Mía e titirakina temanna mai ibuakoia mitinare.
E moangare Titita Hanson. “Bon te toa.”
Te Toa Anne te taeka ae bubura. Mía e a tia n ongo bwa a tia mitinare n tuanga Tinau ao Tamau taekana. Ma e aki koaua bwa tera are a taekinna.
A bane n anenea te anene. Uoman mwaane a tabekarake te kunnikai ae mainaina. Turee ni kariki a mena iaana! Mía e matakuakiniia n raeraea te kariki ni kauarerekei.
Imwiin te anene e taekina te tataro te mwaane. Mwaane ake tabeman a tibwa te kariki nakoia aomata ni kabane.
“E buokiira te kariki n uringa rabwatan Iesu,” Titita García e wirikiriki.
Mía e ana te mwakoro ni kariki. E katamneia Iesu n tei i moana.
Ngkanne iai te tataro riki teuana. Mwaane a uoti turee ma mwangko aika uangingi.
“E buokiira te ran n uringa raraan Iesu,” E wirikiriki Titita García. “E mate ibukira bukina bwa E tangiriira.”
Mía e anaa te mwangko n ran. E iangoia bwa mwaitira ana tangira Iesu ibukina. E namakinna ae kanga E anganna te inga ae bubura.
Imwiina Titita Hanson e angan Mía tamnein Iesu ae uarereke. “Ti kana te kariki ao n nima te ran n uringa Iesu ao ni berita bwa ti na Iriria.” E moangare. “Tera am iango n te toa?”
Mía e taraa tamnein Iesu. E uringa te tangira are e reke irouna. E moangare. “E tamaroa! I tangira Iesu.”