Tarin tamau bon te tia korotamnei ao e karaoi kaibuke aika kaai inanon bwatoro kiraati. E kainnanoa te tai ae mwaiti, iangoakina raoi, ao te mwaatai ni karaoi.

N te bong teuana I noori ni kabane ana bwai ni mwakuri ao n noori aron kabonganakiia n tatabeua ibukina ae onoti ke mawakorokoroia iaon te kaibuke. Ngke I matakuakinna ni mwakuri, I mimi n aron kabongakin bwai ni mwakuri ni karaoi kaibuke aikai. I kauringaki ni karakinan Nibwaai ngke e kabaa te kaibuke (taraa 1 Nibwaai 17–18). E kabaia nakon ana kawai te Uea, tiaki ana kawai te aomata. Te Atua e anganiira bwaai ni mwakuri ni kabai oin ara kaibuke n Ana kawai. Booki aika tabu, te onimaki, ao tangiran te Atua bon bwaai ni mwakuri aika I riai ni kabonganai inanon maiu ni kaba oin au kaibuke n akea kinakinaia. I reiakinna ni katoa bong n riki bwa ana reirei te Uea.

Bon tain te mwaitoro i Denmark. I a tibwa moana au mwakuri ni mitinare ae bwanin taina, ao e riki n te kaangaanga au koaua. I a tibwa kaina te aro ni maaniu ae 19 te namwakaina, ao I kaonaki n te maaku ni maeka n aaba itinaniku, ni kamanena te taetae ae I aki rabwakau iai, ni ukoukora kawaiu rinanon kawai aika kaangaanga I aki kona n iangoa borauakinana. Au tataro, are n te taina e onrake n te kakaitau, e waekoa n riki bwa te bukibuki ae aki kakukurei (ni kaitara te Atua): “te Atua, bukin tera ko a katukai n ti ngai?”

Te ingabong teuana I bubuti nakoinan te tataro. Ma n onea mwiin te bubuti “bukin tera” ma te un inanou, I bubuti ibukin kakoaua ni koauan te euangkerio ao au nanououa e na torobaki.

Imwin au tataro, I raira au boki ae tabu nakon te iteraniba ae I aki kantaningaia. I kauki nakon te I-Tetaronike 31:6: “Kam na korakora ao kam na ninikoria, tai maku, ao a na tai bwara nanomi irouia … bwa Iehova ae Atuam, boni Ngaia ae airi ma ngkoe; E na bon aki kakiko, ao e na bon aki kitaniko.”

Nanou e onrake n te kimwareireii ngke I ataia bwa e kaeka nakon au tataro: Te Atua e raonai n tainako E tiku n tataninga te tataro ni koaua nakon te bukibuki ibukin namakinan te maroa.

Te Atua e na aki kitanai, e ngae ngkana bwaai ni kabane a taraa ni kabwaranano. Ao ti kona n namakina Ana tangira (ai aron namakinan otan taai ae kakukurei) rinanon te tataro ao Ana Boki aika tabu.