“N na kanga n ataia bwa E kakauongo te Atua nakon au tataro?”

Kataia kakauongo nakon te Tamnei ae Raoiroi. Aomata a ongo iroun te Tamnei ae Raoiroi ni kawai aika kakaokoro, ngaia are tao ko kakauongo ibukin, te bwanaa ae maaraara man bebete ngkana e roko te wirikiriki bwa te namakin. I ataia bwa te Tamnei ae Raoiroi e na tuangko bwaai ake ko kainnanoi ni kan atai—ko ti riai ni kakauongo.

N tetaina I rangi n nanououa ngkana N na nako ni marooro ma raou ae tiaki kaain te aro. Te Tabati teuana n te bootaki n toa, iai te aine ae e taetae are e taraa ni kainetia nakoiu. N te tai anne, I karekea te kakoaua bwa te Uea e a tia ni kaeka au tataro. Mai imwaaina, I a tia n aki rang oota raoi bwa tera ae N na karaoia, ma ngkanne e karauaki nanou iroun te Tamnei ae Raoiroi, are e kaona nanou ma te kimwareirei ao te ninikoria. Te Atua e kaekaira rinanon namakin, iango, booki aika tabu, ao taan taetae naba n te taromauri!.

I ataia te Atua e ongo iroura ibukina te tataro e karika te namakin ae rau, buokaki, ao te tangira inanou. I nooria bwa E kainaomataai man kabuanibwai aika mwaiti man te bong teuana nakon teuana ao E kawakiniia au utu, ao I namakina tangirau Irouna. Imwaain ae I nako n reirei, I aki toki n atonga ana botoniango te Bootaki n Ataeinaine, e buokai n uringnga bwa Ngai natin te Tamara are i Karawa te aine, are e tangirai.

Imwiin am tataro, ko kona ni kakauongo nakon namakin ao naano ake a roko inanom. Teuana mai iai e bae n ae kaekaakin am tataro. Ngkana ti tataro ma nanora raoi ao te nano ae koaua, Tamara are i Karawa e kaeka ni kaeti ma ara onimaki are ti karekea mai Irouna. E aki kaekaira tii ibukin ara kan ataibwai.

I miimi n tetaina ngkana e kona n ongo au tataro te Atua, ao ngkanne I namakina te kaeka inanou. I ongo temanna ni kaota ana koaua ibukin te tataro, ao I kona n namakina te Tamnei ae Raoiroi. Au taeka n reirei teuana bon butiakiia am karo, bitiobi, ke tabeman kaain te aro n am uoote. Ko kona naba n tataro ibukin buokam iaon atuun te reirei aei.

I ataia e ongo au tataro te Tama are i Karawa ibukin taekan anenen te Moanrinan “Ana Tataro te Ataei” (Aia Boki n Anene Ataei, 12): “Te Tama are i Karawa, ko maiu? Ao ko ongo ao ni kaekai aia tataro ataei n tatabemaniia nako? A taku tabeman bwa e raroa karawa, ma I namakinna bwa e kaan irarikiu ngkana I tataro.” Ngkana I uingnga te anene anne, I ataia E kakauongo ibukina I namakina te Tamnei ao Ana tangira ae akea tiana ibukiu. Ngkai I uringnga bwa E tangirai, I namakina te mweengaraoi ao n ataia bwa E ongo au tataro.

Te Tama are i Karawa e kakauongo n taainako nakon ara tataro, ma n tabetai e taraa n ae E aki kaekai ara tataro ibukina E bae n aki kaekaira bwa e na kanga ke nningai ae ti tangiria bwa E na kaekaira iai. Te Tama are i Karawa e kakauongo n taainako nakon ara tataro, ma n tabetai e taraa n ae E aki kaekai ara tataro ibukina E bae n aki kaekaira ni kanga ke nningai ae ti tangiria bwa E na kaekaira. Ti kainnanoa te tatauraoi n anga ngaira nakon Ana kantaninga ao ni karekea te onimaki bwa E ataa te bwai ae tamaroa ibukira. E tangiriira te Tama are i Karawa ao e kataia n taainako ni buokiira n reiakiniira ao n rikirake ngkai E kaekai ara tataro.

Rinanon booki aika tabu, ti reireinaki bwa e kaekai ara tataro te Atua n taainako ao e na kaekai ngkana ti taetae Nakoina ma te onimaki ao te nano ae koaua. Inanora ti na namakina te Kamatoaki bwa E bon ongo iroura, te namakin ae rau ao ni maem. Ti kona naba n namakinna bwa bwaai ni kabane a na nakoraoi ngkana ti iriira ana kantaninga te Tama. Ngkana ti nanououa bwa E kaekaira, ti riai n ukoukora ana kairiiri ni booki aika tabu ao ngkanne ti butiia ngkana bwaai akana te wareki a koaua.