Savali a le Au Peresitene Sili
E Ola le Tagata Amiotonu i le Faatuatua
O le Aoao ma le Fai Fasimoli
O loo i ai se tala faa-Iutaia tuai e uiga i se fai fasimoli e lei talitonu i le Atua. I se tasi aso a o la savavali faatasi ma se aoao, sa ia fai atu, “E i ai se mea e le mafai ona ou malamalama i ai. Ua tatou maua aoaoga faalelotu mo le faitau afe o tausaga. Ae soo se mea lava e te vaai i ai e i ai lava le amioleaga, piopio, le faamaoni, faamasinoga le tonu, tiga, fiaai, ma le faasaua. E foliga mai o mataupu faalelotu e lei faaleleia lava le lalolagi. O lea ou te fesili atu ia te oe, o le a ea sona lelei?”
Sa lei tali mai le aoao mo se taimi ae sa faaauau pea ona savali faatasi ma le fai fasimoli. Na iu ina la latalata atu i se malae taalo o loo i ai ni tamaiti, ua pefua uma, o loo taaalo i le palapala.
“O loo i ai se mea ou te le malamalama i ai,” o le tala lea a le aoao. “Vaai i na tamaiti. Ua ia i tatou le fasimoli mo le faitau afe o tausaga, ae o loo eleelea a na tamaiti. O le a le lelei o le fasimoli?”
Sa tali mai le fai fasimoli, “Ae le aoao e, e le talafeagai le tuuaia o le fasimoli mo nei tamaiti palapala. O le fasimoli e tatau ona faaaoga a o lei mafai ona faataunuu lona faamoemoega.”
Sa ataata le aoao ma fai mai, “Sao lelei.”
O le a Faapefea Ona Tatou Ola?
Na aoteleina e le Aposetolo o Paulo le uiga o le avea ma se tagata talitonu, i le siiina mai o se perofeta o le Feagaiga Tuai ina ua ia tusia, “E Ola le Tagata Amiotonu i le Faatuatua” (Roma 1:17).
Atonu i lenei faamatalaga faigofie tatou te malamalama ai i le eseesega i le va o se tapuaiga e vaivai ma le le aoga, ma se tasi lea e i ai le mana e liua ai olaga.
Ae o le malamalama i le uiga o le ola i le faatuatua, e tatau ona tatou malamalama po o le a le faatuatua.
O le faatuatua e sili atu i le talitonu. O le talitonu atoatoa lea i le Atua faatasi ma le faatinoga.
E sili atu nai lo le moomoo.
E sili atu nai lo le na ona nofonofo, luelue o tatou ulu, ma faapea mai tatou te ioeina. Pe a tatou fai atu “E Ola Tagata Amiotonu i le faatuatua,” o lona uiga e taialaina ma taitaiina i tatou e lo tatou faatuatua. Tatou te faatinoina i se ala lea e ogatusa ma lo tatou faatuatuaga—e le ona o se lagona o le usiusitai ma le le manatu i ai ae ona o se alofa mautinoa ma le faamaoni mo lo tatou Atua, ma mo le poto le mafaatauina ua Ia faaalia mai i Ana fanau.
O le faatuatua e tatau ona o faatasi ma le faatinoga; pe o le a leai se ola (tagai i le Iakopo 2:17). E le o se faatuatua lava. E le o i ai le mana e suia ai se tagata e toatasi, aemaise lava le lalolagi.
O Alii ma tamaitai o le faatuatua e faalagolago i lo latou Tama Faalelagi e alofa mutimutivale—e oo lava i le taimi o le le mautonu, e oo lava i le taimi o le masalosalo ma faigata atonu pe a latou le mafai ona vaai atoatoa pe malamalama lelei i ai.
O Alii ma tamaitai o le faatuatua e savavali ma le naunautai i le ala o le avea ma soo ma taumafai e mulimuli i le faataitaiga a lo latou Faaola pele, o Iesu Keriso. O le faatuatua e uunaia ai ma, e moni lava, e musuia ai i tatou e liliu atu o tatou loto i le lagi ma ia aapa atu ma le mataalia, sii i luga, ma faamanuia o tatou uso a tagata.
O le tapuaiga e aunoa ma le faatinoga e pei o le fasimoli o loo tumau pea i le pusa. Atonu e i ai ona gafatia ofoofogia, ae o le mea moni lava e i ai se mana itiiti e faia se eseesega seia oo ina faataunuuina lona faamoemoega atofaina. O le talalelei toefuataiga a Iesu Keriso o se talalelei o le faatinoga. E aoao mai e le Ekalesia a Iesu Keriso le tapuaiga moni i le avea ai ma se savali o le faamoemoe, faatuatua, ma le alofa mama, e aofia ai le fesoasoani atu i o tatou uso a tagata i ni auala faaleagaga ma le faaletino.
I ni nai masina ua mavae, sa matou o ai ma, lou toalua, o Harriet, i se malaga faaleaiga ma nisi o la ma fanau i le eria o le Meititirane. Na matou asiasi atu i ni tolauapiga a tagata sulufai ma feiloai ma aiga mai ni atunuu ua faatafunaina e le taua. O nei tagata e le mai la tatou faatuatuaga, ae o i latou o o tatou uso ma tuafafine ma na latou manaomia vave lava se fesoasoani. Sa matua ootia o matou loto ina ua matou vaaia e i matou lava pe faapefea e le faatuatua ola o o tatou tagata o le Ekalesia ona aumaia le fesoasoani, toomaga, ma le faamoemoe i o tatou uso a tagata e le tagolima, e tusa lava po o a a latou tapuaiga, atunuu, po o aoaoga.
O le faatuatua e tauave faatasi ma le faatinoga faifai pea e tumu ai le loto i le agalelei, o le mafaufau i le poto ma le malamalama, ma le agaga i le filemu ma le alofa.
E mafai ona faamanuiaina uma e lo tatou faatuatua ma le faatosinaga amiotonu i latou o siomia i tatou ma i tatou.
E mafai e lo tatou faatuatua ona faatumulia ai le lalolagi i le agalelei ma le filemu.
E mafai ona suia e lo tatou faatuatua le inoino i le alofa ma fili i ni uo.
O tagata amiotonu, la, e ola i le faatinoina o le faatuatua; latou te ola i le faalagolago i le Atua, ma savavali i Ona ala.
Ma o le ituaiga lena o faatuatua e mafai ona suia ai tagata taitoatasi, aiga, nuu, ma le lalolagi.