„Hvernig veit ég hvort Guð hlustar á bænir mínar?“

Reynið að hlusta á heilagan anda. Fólk skynjar heilagan anda á ólíkan hátt. Þið gætuð verið að hlusta eftir lágri, hljóðlátri rödd sem innblæstri, en svarið gæti komið í formi tilfinningar. Ég veit að heilagur andi mun segja ykkur það sem þið hafið þörf fyrir að vita – þið þurfið bara að leggja við hlustir.

Eitt sinn efaðist ég stórlega um hvort ég ætti að fara á stefnumót með einstaklingi sem var ekki í kirkjunni. Sunnudag einn flutti systir nokkur ræðu á sakramentissamkomu, sem virtist tala beint til mín. Á þeirri stundu hlaut ég fullvissu um að Drottinn hafði svarað bæn minni. Áður hafði ég ekki vitað hvað gera skildi en á þeirri stundu hughreysti heilagur andi mig og fyllti hjarta mitt af gleði og hugrekki. Guð svarar okkur í gegnum tilfinningar, hugsanir, ritningar og jafnvel ræðumenn í kirkju!

Ég veit að Guð heyrir í okkur, því bæn vekur frið, líkn og kærleika í hjarta mér. Ég skynja að Guð verndar mig og fjölskyldu mína dag frá degi gegn margskonar hættum og ég finn kærleika hans til mín. Áður en ég fer í skólann, þá þyl ég ætíð upp þema Stúlknafélagsins. Það hjálpar mér að minnast þess að ég er dóttir himnesks föður, sem elskar mig.

Ég veit að himneskur faðir heyrir bænir mínar, vegna þessara orða í Barnafélagssöngnum „Bæn barns“ (Barnasöngbókin 6): „Himneski faðir, eru þú þarna, heyrir og svarar bænum allra barna? Himininn segja sumir langt frá, … finn ég hann samt fast mér hjá.“ Þegar ég minnist þessa söngs, veit ég að hann er að hlusta, því ég skynja andann og hans óendanlegu elsku til mín. Þegar ég minnist þess að hann elskar mig, finn ég huggun og fullvissu um að hann hlustar á bænir mínar.

Himneskur faðir hlustar ætíð á bænir okkar, en stundum virðist okkur hann ekki svara þeim, því ekki er víst að hann svari eins og við óskum eða á þeim tíma sem við óskum. Við þurfum að vera fús til að beygja okkur undir vilja hans og treysta því að hann viti hvað okkur er fyrir bestu. Himneskur faðir elskar okkur og mun ætíð reyna að hjálpa okkur til þroska og vaxtar með bænheyrslu sinni.

Í ritningunum er okkur kennt að Guð muni ætíð hlusta á bænir okkar og svara þeim, ef við biðjum í trú og af einlægni. Við munum finna fullvissu í hjörtum okkar um að hann hlustar á okkur, tilfinningu friðar og rósemdar. Við getum líka skynjað að allt muni fara vel, ef við förum að vilja föðurins. Ef við efumst um að hann hlusti á okkur, ættum við að leita leiðsagnar í ritningunum og síðan að spyrja um sannleiksgildi þess sem við lásum.

Ég velti eitt sinn fyrir mér hvort Guð hlustaði á bænir mínar og fann þá svarið í hjarta mér. Ég hlustaði á einhvern gefa vitnisburð um bænina og ég fann fyrir heilögum anda. Ég hvet ykkur líka til þess að spyrja foreldra ykkar, biskup eða einhverja meðlimi í deild ykkar. Þið gætuð jafnvel beðist fyrir til að fá hjálp við þetta úrlausnarefni!

Eftir að þið hafið beðist fyrir, þá getið þið hlustað og gætt að því sem vaknar í hjarta. Svarið við bæn ykkar kann að leynast þar. Þegar við biðjum af einlægu hjarta, mun himneskur faðir svara í samræmi við trú okkar á hann. Hann svarar ekki í þeim eina tilgangi að seðja forvitni okkar.