Ewe Niwinin Unusen Nikitu

Nupwen ai we chok emon anuon, Ua angang ussun emon chon aninis ngeni emon presetenin tischrik non ewe Mwichefen. A kan soun achocho ne aitiei fansoun meinisin. Ua chechemeni ewe aurour a kan ngeniei fan ew: “Nupwen ka churi emon, angangoch ngenir usun nge ita ir mi nom non ennetin osukosuk, iwe kopwe pung nap seni ekkoch ekkewe fansoun.” Ua ekieki non ena fansoun pwe i mi apinukungaw. Iei, nap seni 50 ier a no, ua tongeni kuna ifa usun murinon an weweiti ewe fonufan me manau.

Kich meinisin sia weri sossot—fan ekkoch, fokkun weires sossot. Kich mi sinei pwe ewe Samon a mut ngenikich pwe sipwe weri sossot ren ach sipwe cheriw me unusochuno pwe sipwe tongeni nonnom ren I feinfeino.

Ewe Samon a aiti ewe Soufos Joseph Smith non Liberty Jail pwe niwinin an nikitu ngeni an kewe sossot epwe anisi an epwe tufich ngeni manau esemuch:

Nei we at, kinamwe ngeni ngunum; om kewe osukosuk me riaffou repwe chok nom reom ekis chok fansoun;

Iwe mwirin, ika kopwe nikitu ngeni, Kot epwe seikakota won tekia; kopwe akkufu meinisin chon koum ngonuk (D&C 121:7–8).

Chommong mettoch ra akkufukich non unusen manauach pwe usun a weires ach sipwe nikitu ngeni. Menin epwe tongeni ina usun ngeni ew famini anongonong won ar atake nupwen ese wor pungun ran. Meni repwe aureki, “Epwe ifa taman sia tongeni witiwiti?” Menin epwe tongeni ina usun ngeni emon serafo an epwe mesengeni osukosuken napenon nimengaw me sossot. Menin epwe tongeni ina usun ngeni emon anuon a weires an epwe angei ewe asukun ika keao mi auchea ngeni an epwe wor an angang an epwe anisi punuwan me famini. Menin epwe tongeni ina usun ngeni emon aramas ese togeni kunokun an angang ika ion a tou seni an angang nupwen ra kesipeno ekkewe pekin angang. Menin epwe tongeni ina usun ngeni ekkewe ra mesengeni wattenon samaw me ngawenon pochokunen inis, minne epwe fis nepopun ika nesopun manauer ika ngeni ekkewe ra tonger.

Nge emon Kot mi tong ese efisata ekkena sossot me mwach ach sipwe chok kuna ika kich mi tongeni nikitu ngeni weires nge a efisata pwe epwe kuna ika sia tongeni nikitu ngenir me sipwe mwrinnono.

Ewe Aewin Presetensi a aiti Elter Parley P. Pratt (1807–57) nupwen an we keran koko ngeni an epwe emon chon ewe Mwichen Engon me Ruemon Aposel: “Ka fen fiti ew mwokutukut minne unusen om ekiek mi auchea ngeni; … winiti efoch wokun ira mi murinno. … Mi auchea kopwe nikitu ngeni pekusun angang, me chommongun auchean manau om kopwe unusochun cheriw. … Semom won Nang a mochen ei; ewe masies ina An; ewe angang ina An; me I epwe … apwapwaok… me epenaoketa.”¹

Non ewe puken Hebrew Paul a kapas usun ewe foun iran unusen nikitu: “Nupwen sia angei niwinin ach foffor mi ngaw, ussun ita nge non ewe fansoun och mettoch a awora ngeni kich netipeta, nge esap pwapwa. Nge murin ach angei ei sokkun niwin sipwe tongeni manaueni ew manau mi kinamwe o pung” (Hebrew 12:11).

Ach sossot me ach weires a ngenikich ewe tufichin kaeo me marita, me ra pwan tongeni fen siwini nonnomuch. Ika sia tongeni kun ngeni ewe Chon Amanau non unusen ach tongeni, ngunuch a tongeni cheriweno nupwen sia nikitu.

Ina minne, iotek fansoun meinisin ina ewe aewin mettoch sipwe chechemeni (nengeni D&C 10:5; Alma 34:19–29).

Ewe oruwen mettoch ina sipwe soposopono ne aneasochisi ekkewe annuk—ese nifinifin met mi ungenikich, ewe sossot, ika fitikoko unukuch (nengeni Mosaia 4:30).

Angang ngeni ewe Samon ina we aunungatin mettoch mi auchea sipwe fori (nengeni D&C 4:2; 20:31).

Non angangen ewe Masta, sipwe sinei me tongei I. Sipwe poputa ne esina poun ewe Chon Amanau me amemefin ewe Ngun mi Fel non manauach, ika sipwe soposopono non iotek me angang tupwon. Chommong me neich non och fansoun sia fen angei ena sokkun angang me mefi chiechian ewe Ngun mi Fel. Ika kopwe ekiek sefan ngeni ena fansoun, kopwe chechemeni pwe mi wor ekkesiwin non en. Ewe sossot om kopwe fori mi ngaw usun a kukununo. Ewe mochen fori mi och a napeno. Meni ekkewe ir mi sineochuk me tongeok ra apasa: “Ka kirekirochuno me tipeposeno. Kose fen chiwen ussun ewe aramas akkom.”

Kose chiwen ewe aramas akkom. Ka siwin me non ewe Achasefanin Jises Kraist pokiten ka anongonong won I non fansoun om sossot.

Ua pwon ngonuk pwe ewe Samon epwe anisuk non om sossot ika kopwe kutta me angang ngeni I me ngunum epwe murinnono non ewe foffor. Uwa pesei ngenikemi ami oupwe wanong ami apinukunuk non I non fansoun ami osukosuk.

Ngang mi sinei pwe Kot ewe Sam mi manau me I mi rongorong me ponuweni ach iotek meinisin. Ngang mi sinei pwe Noun we, Jises Kraist, a moni niwinin ach kewe tipis meinisin me I a mochen kich sipwe feino ren. Ngang mi sinei pwe ewe Sam me Noun we ra tumunu kich me ra fen amwonata ew aan fan itach ach sipwe unusen nikitu me feino rer sefan.