Pwe Repwe Tongeni Ew chok

Sasing

Relief Society seal

Elter D. Todd Christofferson seni ewe Mwichen Engon me Ruemon Aposel a aitikich “Jises a apwonueta unusochun etipew ngeni ewe Sam ren an fangeta inisin, aionun me pwan ngunun, ngeni mochenin ewe Sam,”

“… Ennetin sisap ew ren Kot me Kraist tori ach sipwe fori pwe Ar mochen me tiper repwe ach watten mochen. Ena sokkun tekison ese pwonueta chok non ew ran, nge me ren ewe Ngun mi Fel, ewe Samon epwe auroura kich ika sia mochen tori, fansoun feinfeino, epwe pung ach sipwe apasa pwe I mi nom rech usun ewe Sam mi nom ren I.”¹

Linda K. Burton, Presetenin Fin Anisi Unus, a aitikich ifa usun sipwe angang ngeni ei etipew: “Ach fori me apwonueta ach pwon mi pin ina napanapen ach nikitu ngeni ach sipwe winiti usun ewe Chon Amanau. Ewe mettoch mi echipwer sipwe achocho ngeni ina ewe napanap mi pwano me non ekkoch foun kapas non ew kon mi fel: ‘Upwe feino ian en ka mochen upwe feino ie. … Upwe apasa met en ka mochen upwe apasa. … Upwe winiti met en ka mochen upwe winiti.’”²

Elter Christofferson a pwan achema ngenikich pwe “ren ach achocho ran me ran me wik me wik ne fiti ewe anen Kraist, ngunuch a apungano napanapan, ewe maun me non a kinamweno, me ekkewe sossot ra kouno ne aosukosukakich.”³

Neill F. Marriott, Aruemonun Chon Aninis non ewe Presetensin Ekkewe Fopun Unus, a apasa an kapasen pwarata usun feiochun ach achocho ne awena ach mochen ngeni an Kot mochen: “Ua fen fiu ngeni ai upwe asueno ewe mochenin ai upwe angei mettoch non napanapen chok ai mochen, ua apareni pwe ai mochen ese fokkun naf, mi aukuk, me mi kis seni aanen Jises Kraist. ‘[Aanen Semach won Nang we] ina ewe aan a emwen ngeni pwapwa non ei manau me ewe manau esemuch non ewe fonufan epwe feito.’”⁴ Sipwe achocho non tekison ne winiti ew ngeni Samach won Nang me Noun we, Jises Kraist.