Sau, Mulimuli Mai ia te A’u—Mo Sauniga a le Perisitua Mekisateko ma le Aualofa

Ia Ianuari 2018, o le a sui sauniga mo korama a le Perisitua Mekisateko ma le Aualofa. O nei suiga e aofia ai anomea tatou te faaaogaina—o faagasologa o [tusi] o Aoaoga a Peresitene o le Ekalesia o le a suia i se faamamafa tele atu i le aoaoina mai savali o le konafesi aoao, ma suesue i autu faapitoa ua filifilia e o tatou taitai aoao.

Ae o le suiga sili ona anoa e faatatau lea i le auala tatou te faaaoga ai nei anomea i le ausiaina o faamoemoega moni o a tatou sauniga i Aso Sa.

Ua faatulagaina e le Atua Ona atalii ma afafine o le feagaiga i totonu o korama a le perisitua ma le Aualofa e fesoasoani i le faataunuuina o Lana galuega. E tupu se mea mamana pe a tatou potopoto i lalo o le taitaiga a i latou o loo umia ki o le perisitua. O lea la e ui e taua ia aoaoga o le talalelei, ae o sauniga i Aso Sa a le perisitua ma le Aualofa ua sili atu nai lo ni vasega. O ni sauniga galulue foi lea tatou te aoao faatasi ai mai savali o konafesi aoao, fefautuaai e uiga i le galuega o le faaolataga, ma faatulaga ina ia faataunuu le galuega. O suiga o le a oo mai i le 2018 o le a fesoasoani ia i tatou e faataunuu nei faamoemoega.

O lenei suiga o se mataupu aoaoina fou—po o se mea e sili atu? O anomea fou e ono foliga o se mataupu aoaoina, ae o ni sosia mo le korama a le Perisitua Mekisateko ma le Aualofa ia faatele ai lo latou auai i le galuega a le Atua ma i le taulimaina o manaoga i le lotoifale. Ua saunia e lenei suiga se siosiomaga lelei mo le iloaina, fefautuaai e uiga i, ma le taulimaina o na manaoga.

O le a le mea o le a tatou taulai i ai i le taimi o sauniga i Aso Sa? E amata ia Novema 2017, o lomiga o le konafesi aoao o le Liahona ma le Ensign o le a aofia ai anomea ia o le a faaaogaina i sauniga i Aso Sa a le Perisitua Mekisateko ma le Aualofa. O sauniga faalemasina e lua o le a taulai atu i savali o le konafesi, ma o le a tuuina atu i taitai ma faiaoga ni manatu e fesoasoani ai i tagata ia talanoaina ma faaaoga na savali. O Aso Sa muamua o le a faaaoga e fefautuaai faatasi ai ina ia taulima manaoga faalelotoifale ao Aso Sa lona fa mo le suesueina o se autu ua filifilia e o tatou taitai aoao. Tagai i le faasologa o sauniga faalemasina i le isi itu o lenei itulau.

O le a le uiga o le fefautuaai faatasi e faatatau i manaoga faalelotoifale? O korama a le Perisitua Mekisateko ma le Aualofa e “fono faatasi” (MF&F 107:89) i le Aso Sa muamua o masina taitasi. I lalo o le taitaiga a taitai o le perisitua po o le Aualofa, o sauniga o Aso Sa muamua e faaaoga e faailoa atu ai ni manaoga i le lotoifale ma fefautuaai faatasi e uiga i le auala e taulima ai na manaoga. O autu talafeagai mo fonotaga i Aso Sa muamua e aofia ai le auala e faaleleia ai fesootaiga ma tagata o le aiga, auauna atu i le atunuu po o nuu, ma taialaina le autalavou i le uarota po o le paranesi. I fonotaga mulimuli ane, o le korama, vaega [o faitaulaga sili], po o le Aualofa e tulitataoina ia uunaiga ma faatinoga.

E tutusa lenei mataupu aoaoina ma le Sau, Mulimuli Mai ia te A’u mo le autalavou? E ui o autu ma anomea o le Sau, Mulimuli Mai ia te A’u—Mo Sauniga a le Perisitua Mekisateko ma le Aualofa e ese mai le Sau, Mulimuli Mai ia te A’u mo le autalavou, o le auala e aoao atu ai ma le aoao mai e tutusa. Mo nisi faamatalaga e uiga i le aoao atu ma le aoao mai o le talalelei, tagai Aoao Atu i le Ala a le Faaola i le teaching.lds.org.

E le o a’u o se faiaoga. E tatau ona totogi sa’u lesitala mo le Liahona po o le Ensign? O le a sili atu ona faaoaina ou aafiaga pe a e faitau i savali o le konafesi aoao ma aumaia i au sauniga i Aso Sa. E mafai ona e maua savali faaeletonika i le conference.lds.org ma le polokalama o le Potutusi o le Talalelei [Gospel Library] po o le totogi o se lesitala mo le Liahona po o le Ensign (tagai store.lds.org).

Ae faapefea pe a le o maua se mekasini o le konafesi aoao i la’u gagana? O savali o konafesi aoao e maua i le tele o gagana i le conference.lds.org ma i le polokalama o le Potutusi o le Talalelei [Gospel Library], ma o le a maua ia anomea o mataupu aoaoina i le ComeFollowMe.lds.org. Afai e le maua i lau gagana ia anomea fou o le mataupu aoaoina i le initoneti pe i se mekasini, tagai i Faatonuga mo le Mataupu Aoaoina, 2018 mo nisi faamatalaga.

O a fea e amata ai ona tatou suesue i savali fou o le konafesi aoao? O le a amata ona tou suesue i savali o le konafesi o Oketopa 2017 ia Ianuari 2018. A maea lena, o le a fuafua e o outou taitai i le lotoifale le taimi e faaaoga ai savali mai le konafesi e sosoo ai—masalo o Me ma Novema o tausaga taitasi.

O ai e filifilia ia savali o konafesi aoao tatou te suesueina? E fefautuaai faatasi a outou taitai faalelotoifale e faatatau po o a savali o le konafesi o le a sili ona taulima ai manaoga o a outou korama, vaega, po o le Aualofa. Atonu o le a eseese ia savali e aoao e se vaega o faitaulaga sili, korama a toeaina, ma le Aualofa i le uarota po o paranesi lava e tasi ina ia taulima ai manaoga eseese.

E Amata ia Ianuari 2018