Faateleina o La’u Pisinisi Keke Araisa

Ata

rice cakes

Ata na tusia e Carolyn Vibbert

Sa ou manao lava e auina atu lo’u atalii i se misiona, peitai o le faatauina atu o le kilo e tasi (2 pauna) o bibingka (keke araisa) i le vaiaso, sa le lava lea e mafai ai ona tausi o ia i se misiona.

Sa fesoasoani lo’u atalii i mea tautupe a le aiga, sa ia le maua se lagona lelei pe a alu [i le misiona] aua sa popole tele o ia i lo matou tulaga tautupe. Sa o se tauiviga faifai pea mo lo latou aiga le maua o ni tupe. Sa ou mitamita i lo’u atalii e 25 tausaga le matua mo lona manaoga amiotonu e auauna atu i le Alii, ae na ou iloaina o le a matou manaomia se vavega ina ia faataunuu ai lana moemitiga o le auauna atu i se misiona.

Sa ou auai i se vaega mo le ola faalagolago o le tagata ia te ia lava. E ala i le mataala ma le faaaogaina o lo’u faatuatua, na ou iloa ai, o le a faamanuiaina lo’u aiga. I le aluga o se tasi o fonotaga, sa uunaia ai au ou te alu i se maketi mo tagata lautele. O iina, na ou vaaia ai le toatele o tamaitai o faatau atu ni meaai mama faaleatunuu. Sa ou faia se feutagaiga ma se tasi o tamaitai. Sa ou fai atu ia te ia, o le a tuu au oloa i le taeao na te faatauina atu, ae faatoa aumai le tupe mama pe a uma le aso. Sa aoga le fuafuaga ia i ma’ua uma. Sa lei leva ae maua isi au tagata na faatauina atu [au oloa]. Sa oo la’u pisinisi i ni tagata faatau atu e toa 10 i le taimi na ou i ai i le vaega mo le ola faalagolago o le tagata ia te ia lava.

Sa ou aoaoina e tuu ese au tupe patino mai tupe o lau pisinisi ma fai lou lava totogi. Sa ou aoaoina e taofi le faaalu o le taimi i le faiga o oloa e le taulia ae taulai atu i le mea sa maua ai le tupe faasili. Sa ou aoao foi e uiga i le maketiina i ala o faasalalauga i agafesootai. Sa fesoasoani mai la’u soa mo faatinoga mai le vaega mo le ola faalagolago o le tagata ia te ia lava, e fai la’u faitotoa i le Apifoliga [Facebook]. Mai iina, sa ma aoao ai i le faaigoaina ma le tuupepaina [o oloa]. Sa iu ina ola la’u pisinisi ma oo ai ina faamavae lo’u toalua mai lana galuega faigata faaletino ae ma galulue faatasi.

Lata mai nei lava sa fesili mai ai se tasi pe na a mai au faatau. Sa ou tau atu ia te ia ma le mitamita, ua ou faatauina atu nei le 12 kilo (26 pauna) o keke araisa.

“O le 12 kilo i le vaiaso e maoae!” sa ia fai mai ai.

“Leai, tuagane,” sa ou fai atu ai. “Ou te faatauina atu le 12 kilo i le aso.”

Sa fai mai i se taimi mulimuli ane lo’u atalii, sa fiafia ona ua mafai nei e la’u pisinisi ona maua mai mea matou te manaomia.

“E foliga mai la ua mafai nei ona ou auauna atu i se misiona faafaifeautalai,” o lana tala lea.

O loo auauna atu nei o ia i le Misiona a Filipaina San Pablo. Ou te faafetai lava mo le taulamua a le polokalama o le ola tutoatasi. E moni lava le fetalaiga a le Alii na Ia fetalai mai ai, “O lo’u faamoemoe o le faia lea o mea mo la’u au paia” (MF&F 104:15).