Ko Hono Maʻu ha Nonga ʻi he Taʻehaohaoá
ʻOku ʻikai ha taha ʻiate kitautolu ʻe haohaoa. He ʻikai ha taha ʻiate kitautolu ʻe nofo tuʻuloa ʻi māmani. Kapau ʻoku tau tōnounou ʻi he moʻuí, ko e hā leva te tau lava ʻo fai ke maʻu ai ha nonga ʻi he hala ki he haohaoá? ʻE lava ke tokoni e ngaahi fakakaukau ko ʻení.
1. Fakatuʻamelie.
ʻOku takiekina lahi ʻe heʻetau ngaahi fakakaukau fekauʻaki mo kitautolú, ʻa hotau ʻulungāngá mo e ngaahi ongó. Ko e tokolahi ʻo kitautolu ʻoku tau lea ʻaki ha ngaahi meʻa ʻiate kitautolu pē he ʻikai ke tau teitei lea ʻaki ki ha taha kehe. ʻI heʻene peheé, ʻoku taʻofi kitautolu ʻe he meʻá ni mei hotau mālohinga moʻoní mo holoki e meʻa ʻoku tau malavá mo e ngaahi talēnití.
2. Tali e ngaahi tōnounoú ko ha ngaahi faingamālie.
ʻOku ʻikai finangalo e ʻOtuá ke tau loto siʻi ʻi he fehalākí. Kapau ʻoku tau tali ko e fānau taʻehaohaoa kitautolu ʻo e ʻOtuá ʻoku ako ʻi heʻetau fonongá, te tau lava ʻo tali ʻetau ngaahi fehalákí. ʻE ʻuhinga ʻa e ʻamanaki ke haohaoa levá ke taʻofi ai meiate kitautolu e faingamālie ke tupulakí. Te tau taʻofi e meʻafoaki ʻo e fakatomalá mo e mālohi ʻo Sīsū Kalaisí pea mo ʻEne Fakaleleí ʻi heʻetau moʻuí.
3. Loto fakatōkilalo, kae ʻoua ʻe fakasiʻia koe.
ʻOku fie maʻu e loto fakatōkilaló ʻi he tafoki ki heʻetau Tamai Hēvaní ʻi he ngaahi fehalākí. ʻOku ʻi ai foki ha faikehekehe ʻi he loto fakatōkilaló mo e ongoʻi ʻoku siʻi hoto mahuʻingá. ʻOku ʻikai finangalo e ʻOtuá ke tau tukuhifo kitautolu pe ongoʻi ʻoku siʻisiʻi hotau mahuʻingá ʻi Hono fofongá. ʻOku mahuʻinga ke ʻiloʻi ʻoku mahuʻinga e taimi mo e ngāue ʻoku fie maʻu ki heʻetau liliú.
4. Fili ke fiefia.
ʻI he lotolotonga ʻo e feinga ke lelei angé, te tau lava ʻo fili he taimí ni e nongá pe melinó pea mo e fiefiá. Mahalo he ʻikai ke tau lava ʻo liliu e ngaahi tūkunga ʻi heʻetau moʻuí, ka te tau lava ʻo fili e founga ke tali ʻaki kinautolú.