Tali Fehuʻi mo e Kau Palesitenisī Lahi ʻo e Fineʻofá
Mei ha fakamatala ʻoku fakamanatua ai ʻa e taʻu 175 ʻo e Fineʻofá.
ʻOku fēfē ʻa e ngāue mo e kau palōfitá?
Linda K. Burton, Palesiteni Lahi ʻo e Fineʻofá: “Hangē pē ko e hoko ʻa Sīsū Kalaisi ko e moʻungaʻi-tangata ki he houʻeiki fafiné ʻi Hono kuongá, ʻoku pehē pē ʻEne kau ʻAposetoló ʻi hotau kuongá. ʻOku fakamātoato ʻetau kau palōfitá ʻi heʻenau ngaahi fealeaʻakí, ʻoku nau fekumi maʻu pē ki he ngaahi fokotuʻu fakakaukau ʻa e kau fafine ʻi he Siasí. Pehēange mai naʻe lava ʻe he fefine kotoa pē ʻi he Siasí ʻo sio mo fanongo pea ongoʻi maʻu pē ʻa e meʻa ʻoku mau aʻusiá ʻi heʻemau kaungā ngāue mo e kau palōfita, kau tangata kikite, mo e kau maʻu fakahaá.
ʻOku fakatahatahaʻi fēfē ʻe he Fineʻofá e kakai fefine he funga ʻo e māmaní?
Carole M. Stephens, Tokoni ʻUluakí: “Ko e mālohinga ʻo ʻetau fāitahá ko ʻetau tui ko ia ki he mālohi ʻo e feilaulau fakalelei ʻa e Fakamoʻuí. ʻOku hanga heʻetau ʻofa ki he Tamai Hēvaní mo e ʻilo ki Heʻene palani lahi ʻo e fiefiá ʻo haʻi fakataha kitautolu ʻi heʻetau fekumi ki he moʻui taʻengatá. ʻOku ʻi ai e kau fafine ʻoku teʻeki mali, pe kuo ʻosi mali pea ʻi ai mo e fānau, pe kuo ʻosi mali kae teʻeki ʻi ai ha fānau. ʻOku ʻi ai e kau uitou mo e niʻihi kuo vete-mali. ʻOku mau fakatauange te tau lava ʻo ngāue fakataha pea tau faaitaha ʻi he mahino kiate kitautolu hotau tuʻungá, ʻetau ngāué, mo ʻetau taumuʻá.
Ko e hā ha tokoni ʻe fai ʻe he Fineʻofá ki he kau finemuí?
Linda S. Reeves, Tokoni Uá: “ʻOku tau hoko kotoa ko e ngaahi ʻʻofefine ʻo ʻetau Tamai Hēvaní, ʻokú [Ne] ʻofa ʻiate kitautolu pea ʻoku tau ʻofa ʻiate Ia.ʻ Te ke ʻilo ʻi he Fineʻofá ʻoku lahi ange ʻetau faitataú ʻi he faikehekehé. … ʻOku tuʻutuʻuni ʻe he māmaní ʻa e tuʻunga ke ʻi ai e mahuʻinga ʻo e kakai fefiné. ʻE lava ke hanga heʻetau fakatauhoa kitautolu ki he meʻa ʻoku tau sio mo fanongo ai ʻi he māmaní, ʻo ʻai ke tau ongoʻi ko e tuʻunga ʻeni ʻoku totonu ke tau ʻi aí. Ko e taimi ʻeni oku fie maʻu ke tau toe manatuʻi ange ai, ko hotau tuʻunga mahuʻingá ʻoku tupunga ia mei heʻetau hoko ko ha ʻofefine ʻo e ʻOtuá—kae ʻikai ko ia ʻoku fakafōtunga ʻe he māmaní. ʻOku hanga heʻetau vā fetuʻutaki mo ʻetau Tamai Hēvaní, Fakamoʻuí mo hotau ngaahi tokoua ʻi he ongoongoleleí ʻo fakamālohia kitautolu.”
vitiō