Founga ne Tā Fakatātaaʻi ai ʻe ha Faifekau Poto he Tā Fakatātaá, ʻa ʻEne Tuí
ʻI he faifai peá u taau ke ngāue fakafaifekau taimi kakató, naʻe uiuiʻi au ke u ngāue ʻi he Misiona New Zealand Auckland, ʻi he lea faka-Tongá. Neongo ko e Tonga au, ka ʻoku faingataʻa ke u lea faka-Tonga. Naʻe lahi e meʻa ke u leaʻakí, ka koeʻuhí ko e ʻikai ke u poto he lea faka-Tongá ko ia ne u lea ʻaki ha fanga kiʻi lea siʻisiʻi pē mo faingofua pea ʻikai tonu foki.
ʻOku ou ʻofa he ongoongolelei ko ʻení mo e ʻaati pe tā fakatātā he halá, ko ia ne u fakakaukau ke fakatahaʻi kinaua. Ne u faʻo ʻeku folofolá, tohi tā fakatātā, ʻū penivahevahe, ngaahi foʻi peni tohi mataʻāʻā pea mo ha ʻū kapa vali spray heʻeku kató. Ne kata hoku ngaahi hoá mo ʻeke mai, “Ko e ʻai ke hā e kapa vali spray?” Ne u tali ange, “Neongo ʻoku teʻeki ai ke u poto he lea faka-Tongá, ka te u fakahaaʻi ki he niʻihi kehé ʻeku fakamoʻoní.”
ʻI he toenga ʻeku ngāue fakafaifekaú, ne u fakaʻaongaʻi e tā valivali—ʻi he pepá, kae ʻikai ko e ʻū falé—pea mo e Laumālié ke akoʻi ʻaki e niʻihi kehé ʻo fekauʻaki mo Kalaisi. Pea neongo ʻene ongo ngalikehé, ka naʻe ʻaonga. Naʻe ʻikai fie fanongo ha toko lahi ki heʻeku pōpoakí, ko ia ne u tā valivaliʻi ange leva. Naʻe fakaava mai ha ngaahi matapā pea ofo mo ha ngaahi fofonga heʻeku talaange ʻoku ou poto he tā valivali kohikohi he ʻū falé. Naʻe ʻikai ke nau tui mai kiate au. Naʻa nau taimiʻi au ʻi ha miniti ʻe tolu ka u taaʻi e foʻi lea ko e faith lolotonga ʻeku akoʻi ange ia kiate kinautolú. Ne kau hanau tokolahi he niʻihi ne nau ongoʻi ne fakamaauʻi pea ʻikai ʻofaʻi kinautolu. Ne u lava ʻo fakamoʻoni ange te tau lava ʻi heʻetau tui kia Kalaisí, ʻo ongoʻi ʻEne ʻofá mo e fakamolemolé pea te Ne lava ʻo tokoniʻi kitautolu ke tau liliu ʻo toe lelei ange. Naʻá Ne tokoniʻi au.
Naʻe hanga ʻe he taʻu lahi ne u teuteu ai ke u ngāue fakafaifekaú, ʻo ʻomi haʻaku fakamoʻoni ki he Fakalelei ʻa Kalaisí pea mo Hono mālohi ke tokoniʻi au ke u ikunaʻi hoku ngaahi vaivaí mo fakaʻaongaʻi hoku ngaahi mālohingá ke vahevahe ʻaki ʻeku ʻiló ki he niʻihi kehé. Naʻe tuha mo taau pē ia mo e taʻu ʻe fitú.