ຫລັກທຳຂອງຂ່າວສານການຢ້ຽມສອນ, ເດືອນມັງກອນ 2018
ຕິດຕໍ່ຫານາງໄດ້ໃນທຸກເວລາ, ທຸກບ່ອນ, ແລະ ທຸກວິທີທາງ
ການຢ້ຽມສອນແມ່ນກ່ຽວກັບການປະຕິບັດຕໍ່. ພຣະເຢຊູໄດ້ປະຕິບັດຕໍ່ໃນທຸກເວລາ ແລະ ໃນທຸກບ່ອນ. ເຮົາສາມາດເຮັດເຊັ່ນດຽວກັນ.
ການ “ປະຕິບັດຕໍ່” ຄືການຮັບໃຊ້, ການບົວລະບັດ, ຫລື ການຊ່ວຍເຫລືອ ທີ່ມີສ່ວນຊ່ວຍໃຫ້ຄົນອື່ນໄດ້ຮັບການປອບໂຍນ ແລະ ມີຄວາມສຸກ. ການຢ້ຽມສອນແມ່ນກ່ຽວກັບການຫາຊ່ອງທາງ ທີ່ຈະປະຕິບັດຕໍ່ຜູ້ຄົນທີ່ເຮົາໄປຢ້ຽມຢາມ. ພຣະເຢຊູຄຣິດໄດ້ປະຕິບັດຕໍ່ທຸກຄົນ—ໃນທຸກເວລາ ແລະ ໃນທຸກບ່ອນ. ພຣະອົງໄດ້ລ້ຽງດູ 5,000 ຄົນ, ໄດ້ປອບໂຍນນາງມາຣີ ແລະ ນາງມາທາ ຕອນນ້ອງຊາຍຂອງເຂົາເຈົ້າຕາຍ, ແລະ ໄດ້ສອນພຣະກິດຕິຄຸນຂອງພຣະອົງ ໃຫ້ແກ່ຜູ້ຍິງຄົນໜຶ່ງຢູ່ທີ່ນ້ຳສ້າງ. ພຣະອົງໄດ້ກະທຳໄປເພາະຄວາມຮັກທີ່ແທ້ຈິງຂອງພຣະອົງ.
ການເຮັດຕາມຕົວຢ່າງຂອງພຣະອົງ, ໃນຖານະທີ່ເປັນຜູ້ຢ້ຽມສອນ ເຮົາສາມາດມາຮູ້ຈັກ ແລະ ຮັກເອື້ອຍນ້ອງແຕ່ລະຄົນທີ່ເຮົາໄປຢ້ຽມຢາມ, ຈື່ຈຳວ່າ ຄວາມຮັກເປັນຮາກຖານຂອງທຸກສິ່ງທີ່ເຮົາເຮັດ. ເມື່ອເຮົາອະທິຖານຂໍການດົນໃຈ ເພື່ອຈະໄດ້ຮູ້ຈັກວິທີຮັບໃຊ້ນາງ ແລະ ຊ່ວຍນາງໃຫ້ເຂັ້ມແຂງຂຶ້ນ ໃນສັດທາຂອງນາງ, “ເຫລົ່າທູດບໍ່ສາມາດຖືກກີດກັນໃຫ້ມາເປັນເພື່ອນ [ຂອງເຮົາ] ໄດ້.”1
ນັບແຕ່ການຈັດຕັ້ງສະມາຄົມສະຕີສົງເຄາະຂຶ້ນ ໃນປີ 1842 ຈົນເຖິງປະຈຸບັນ, ການປະຕິບັດຕໍ່ຂອງສະຕີ ໄດ້ເປັນພອນໃຫ້ແກ່ຊີວິດຂອງຜູ້ຄົນ. ຍົກຕົວຢ່າງ, ໂຈແອນ ຈອນສັນ, ແມ່ໝ້າຍອາຍຸ 82 ປີ, ແລະ ເພື່ອນຢ້ຽມສອນຂອງລາວ ໄດ້ໄປຢ້ຽມສອນເພື່ອນບ້ານຂອງເຂົາເຈົ້າ ຜູ້ມີອາຍຸ 89 ປີ ທີ່ເປັນໂຣກປອດໄຂ່. ເຂົາເຈົ້າເຫັນໄດ້ວ່າ ເພື່ອນບ້ານຂອງເຂົາເຈົ້າ ບໍ່ໄດ້ຕ້ອງການເຂົາເຈົ້າພຽງແຕ່ເດືອນລະເທື່ອເທົ່ານັ້ນ, ສະນັ້ນເຂົາເຈົ້າຈຶ່ງໄດ້ເລີ່ມຕົ້ນຕິດຕໍ່ຫາລາວທຸກອາທິດ ດ້ວຍຕົວເອງ ຫລື ໂທໄປຫາ.
ສຳລັບຄູຢ້ຽມສອນຄົນອື່ນໆ, ການສົ່ງຂໍ້ຄວາມໃນມືຖື ຫລື ສົ່ງອີເມວ ໄປໃຫ້ກຳລັງໃຈ ອາດເປັນສິ່ງທີ່ດີທີ່ສຸດ ທີ່ຈະເຮັດ ສຳລັບເອື້ອຍນ້ອງໃນເດືອນນັ້ນ. ການຕິດຕໍ່ເປັນສ່ວນຕົວ ແລະ ການຮັບຟັງດ້ວຍທ່າທາງທີ່ມີຄວາມຮັກ ເປັນສິ່ງສຳຄັນສຳລັບການຢ້ຽມສອນ. ເທັກໂນໂລຈີທີ່ທັນສະໄໝ ແລະ ການໄປຢ້ຽມຢາມດ້ວຍຕົວເອງ ຊ່ວຍເຮົາໃຫ້ເຮັດໄດ້ ໃນທຸກເວລາ, ໃນທຸກບ່ອນ, ແລະ ໃນທຸກວິທີທາງ.2 ນັ້ນຄືການປະຕິບັດຕໍ່ ຢ່າງທີ່ພຣະເຢຊູໄດ້ປະຕິບັດ.
© 2018 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/17. ການແປໄດ້ຮັບອະນຸຍາດ: 6/17. ແປຈາກ Visiting Teaching Principles, January 2018. Laotian. 15045 331