Iren Mahsen en Presidensi Keiou, Pepweri 2018
Tamataman Ih Ansou Koaros
Sang Presiden Henry B. Eyring
Sounsawas Keieu nan Presidensi Keieu
Kumwail kak kilang ansou me sokohp Moroni kilelehdi kaimwseklahn mahsen kan en nan Pwuhk en Mormon pohn pileit kohl ko? E kelehpw. E kilangehr ah wehi, nah aramas, oh ah peneinei arail pwopwila. Nan sahpwo “ehu ansou en” mahwin (Mormon 8:8). Ahpw e ahneki koapwoaroapwoar, pwe e kilangehr nan atail rahn akan! Oh soang kan me e kak ntingihdi, e lukei kitail en tamataman ( tehk Moroni 10:3).
Presiden Spencer W. Kimball (1895–1895) mwahuki padahngki lepin mahsen me keiou kesempwal nan dikseneri iei tamataman. Pwe kitail wiahdahr inou rehn Koht, e mahsanih, “atail anahn me keiou kesempwal iei tamataman” irail.1
Kumwail kak diar mahsen en tamataman nan iren pwuhk sarawi kan. Ansou me Nephi kaweid rie pwutangko, pak tohto me e luke irail en tamataman mahsen en Kauno oh irail en pil tamataman ia momwen Koht ah sewesehda arail pahpa kahlapoko ( tehk 1 Nephi 15:11, 25; 17:40).
Nan en Nahnmwarki Benjamin mahsen en komwurumwur, e ketin doadoahngki mahsen tamataman koapwoaroapwoar pak isipak. E koapwoaroapwoarki me sapwellieme aramas kak tamataman “sapwellimen Koht kadek… oh sapwellime lokolok” ong irail (Mosiah 4:11; pil tehk 2:41; 4:28, 30; 5:11–12).
Ni ansou me Sounkomouro ketin kasarawiala kamadipw sarawio, E luke Sapwellime tohnpadahko irail en ale oh tungoale “tamataman” Sapwellime tohnmetei (Luk 22:19). Nan kapakap en kamadipw sarawi koaros me kowe oh ngehi rong, mahseno kalapw koasoia lepin koasoia tamataman (tehk D&C 20:77, 79).
Ahi padahk wia luhk ehu, me I peki, kumwail en tamataman. Iet ire siluh me kumwail kak tamataman nahn ehu ehu wihk ni ansou me kumwail pahn ale kamadipw sarawi. I koapwoaroapwoarki me irail pahn sewesei kumwail, duehte arail seweseie.
Tamataman Sises Krais
Keiou, tamataman Sounkomouro. Tamataman ihs Ih ansou me E ketiket sampah, mwomwen Ah koasoieng aramas akan, oh mwomwen Ah kasalehda kadek nan Sapwellime wiewiahkan. Tamataman isingehkan me E kin patehng oh dahme E kin padahngki. Sounkomouro “ketin wiahda me mwahu” (Wiewia Kan 10:38). E ketin pwarek me soumwahu. E ketin kosonehdier en kapwaiada kupwuren Seme.
Ni mehlelo, kitail kak tamataman pweipwand me E ketin pwaindahr, sang ni Sapwellime limpoak ong kitail, pwehn kihsang mwahi en dipatail kan. Ni atail pahn tamataman Ih, atail ineng en idawehn Ih pahn keirda. Kitail pahn men ekis kadekla, mahkla, oh inengieng rapahki oh kapwaiada kupwuren Koht.
Tamataman Dahme Kumwail Anahne Wia me pahn Mwahusang met
E apwal en medewe Sounkomouro—Sapwellime mwakelekel oh unsek— karasahieng wen samin oh sohte unsek me kitail ahneki. Kitail wiadahr inou kan rehn Koht me kitail pahn kapwaiada Sapwellime kosoned akan, ahpw kitail kin pwopwulasang nan inou kesempwal wet. Ahpw Sounkomouro masaniher me met pahn wiawi, ihme kahrehda E ketkihdohng kitail tiahk sarawi en kamadipw sarawi.
Kamadipw sarawi poasoankihda nan Kadehde Mering kaskuhl en meirong kan, me iangahki wehk pen dihp (tehk Lipai 5:5). Kitail solahr kin meirongki mahn akan, ahpw kitail kak pwilikihdi dipatail kan. Pwuhk Sarawi kan padahngki me meirong ehu en “loal ohla oh pahtoula”(3 Nephi 9:20). Kohdo ni kamadipw sarawi ki mohngiong en koluhla (tehk D&C 59:12; Moroni 6:2). Ni oamwi wia met, kumwail pahn alehdi mahk pen dihp akan oh kumwail sohte pahn salongasang ahl en pwuralahng rehn Koht.
Tamataman Keirda Me Kumwail Wiewia
Ni amwail pahn tehk amwail mour nan tiahk sarawi en kamadipw sarawi, I koapwoaroapwoarki me amwail lamalam sohte pahn dokehte soahngkan me sapwung ahpw pil soahngkan me pwung—ni amwail pahn pehm me Sahm Nanleng oh Sounkomouro kaping kin kumwail. Kumwail pil kak ahniki ansou kis nan ansou en kamadipw sarawio en peki rehn Koht en ketin sewesekin kumwail en kilang mepwukat. Ma kumwail wia, I inoukioang kumwail me kumwail pahn pehm mehkot. Komw pahn pehm koapwoaroapwoar.
Ni ai kin wia met Ngehn Sarawi kin kadehdeioang ie me ni ansou me I kin doh sang unsekla, I ekis mwahu sang aio. Eri met kihieng ie koapwoaroapwoar me, pwehki sounkomouro, I kak mwahula lakapw.
Kalapw wia ansou reirei ehu, oh e wehweki koahiek en kairoir. Ke ese sang koahiek ia wen apwal en madamadau keneinei ansou koaros. Ahpw sohte katepen amw pahn kolokol ahmw inou en tamataman Ih, E kin ketin tamataman uhk.
Sounkomouro mwahngih amwail kahpwal akan. E mwahngih duen epwelpen mour ah pahn mihmi pohmw. E ketin mwahngih wen kesempwal en kapai me kin kohdo sang ni atail kin tamataman Ih oh peikieng Ih—“pwe ansou koarosNgehn Sarawi en kak mihmi [rehmw]”(D&C 20:77; kawehwe kapatapat).
Eri, E kasamwoh kumwail oang ni tehpel en kamadipw sarawi en ehu ehu wihk, pil pwurehng mweidehng kumwail ehu ansou en tamataman oh kadehde Ih ansou koaros.
© 2017 by Intellectual Reserve, Inc. Kolokol pwuhng koaros. Ntingdahr nan USA. Kamanaman ong lokaiahn wai: 6/16. Kamanaman ong kawehwe: 6/16.Kawehwehpen First Presidency Message, February 2018. Pohnpeian. 97930 885