Esehla Ih oh Ah Peneinei

Pwoson, Peneinei, Sawas

Rita Jeppeson wiahla kempoakepah mwahu ong ah sounpadahk en pas ni ara kin pwarek oh ehukipene padahk sarawi kan. Ni arail kin pas re pil kin mwadongkipene lepin lokaia. Ihme Rita keiou pereniki rehn ah sounpadahk en pas pwehki e ese me irail wia kempoakepah oh paso kaidehn mehn kilangete kileledi en irail akan me re kin pwarek. Tohto mehkot me lih akan kak wia nan arail pahn kin pwarek rierail lih teikan, me duhete alu pene de mwet nan mwetuwel ni ansou me serihkan mwadong.

Elder Jeffrey R. Holland en Pwihn en Wahnpoaron Ehk Riemeno kosoia, “Kasawih pein kumwail en wia soun papah en Kauno ong Sapwellime aramas akan. … Kitail kak koapwoaroapwoarki … me kumwail pahn wiahda ansou kesempwal, madamadau en rongamwahu ong towehkan, tetehk oh apwahpwalih irail, kasalehda madamadau en anahn en ngehn sarawi ni ansou koaros me anahnepe mie.”¹

Kauno doadoahngki Moses pwehn kadehdehiong seri en Israel kan me “mehn likihkan me koukousoan rehmwail pahn wiahla emen me ipwidieng nan pwungamwail, oh kumwail pahn poakohng [ih] duehte pein kumwail” (Lipai 19:34). Rietail lih akan me kitail kin wia padahk en pas oang kak wia “mehn liki kei” ni ansou me kitail kin tapiada atail sawas, oh ni atail kin esehla irail oh arail peneinei, atail ineng pahn laudla en “sewese katoutou en mehtei kan, pwe irail en kak marahrahda” oh atail “mohngiong kan en dok pene nan minimin oh nan limpoak ong emen emen” (Mosiah 18:8, 21).

Reyna I. Aburto, Soun Sawas Keriau en Presidensi Lap en Relief Society tamanda ah apwtehn sohla pwopwoud oh wia tohn Mwomwohdiso kapw. “Nei sounpadahk en padahk en pas ko pwarodo nimweio,” kosoia, “me re wahdo pepehm arail inenen kansenamwahu ong ahi mohngiong.”²