Inihayag Ito ng Diyos sa Akin

Ni Rachel H. Leatham

Larawan

Rachel Leatham

Larawan ni Rachel Leatham sa kagandahang-loob ng Church History Library; frame mula sa Getty Images

Tungkol kay Sister Leatham

Si Rachel Hannah Leatham (1884–1979) ang naging pangalawang babae na napabilang sa opisyal na conference report ng Simbahan noong siya ay magsalita sa isang pangkalahatang kumperensya na ginanap sa labas ng tabernacle noong Abril 5, 1908.

Kabilang siya sa unang henerasyon ng mga hindi pa kasal na babae na naglingkod sa isang proselyting mission para sa Simbahan. Noong siya ay 22 anyos, inatasan siyang maglingkod sa Colorado Mission noong Setyembre 1906.

Nang makabalik siya sa Salt Lake City noong 1908, si Sister Leatham ay nagboluntaryo na maging tour guide sa Temple Square Bureau of Information. Ang opisinang ito ay nagbukas noong 1902 nang may layuning makapagbigay ng tamang impormasyon at mamahagi ng mga babasahin ng Simbahan sa mga bumibisita sa Temple Square.

Noong panahong ito, ang pangkalahatang kumperensya ay ginaganap sa loob ng Tabernacle sa Temple Square. Kapag puno na ang Tabernacle, ang mga nagsisidalo ay pinapupunta sa mga overflow meeting sa kalapit na Assembly Hall. Kapag napuno na ang Assembly Hall, ang mga tao ay nagtitipon sa mga damuhan malapit sa Bureau of Information Building, kung saan ginagawa ang mga overflow meeting ng kumperensya.

Ang mensaheng ito ay sipi mula sa mensahe na ibinigay ni Sister Leatham sa miting ng overflow ng pangkalahatang kumperensya noong Abril 5, 1908. Isinunod sa pamantayan ang pagbabantas at pagsulat ng malalaking titik.

Larawan

historical photograph of general conference overflow

Sa palagay ko, isa ako sa pinakamasasayang babae sa buong mundo, at ito ay dahil sa ebanghelyo, dahil alam kong totoo ang ebanghelyo. Alam ko na ang ating Diyos Ama, at ang Kanyang Anak na si Jesucristo, ay pumarito sa lupa at dinala at itinatag ang ebanghelyo at kinausap si Propetang Joseph Smith. …

Sa palagay ko, kung mabubuhay ako nang walang hanggan, hindi ko sapat na mapasasalamatan ang aking Ama sa Langit para sa mga biyayang dumating sa buhay ko, para sa pribilehiyong humayo sa mundo at maibahagi ang aking patotoo, na ipinaaalam sa lahat na ang ebanghelyo ay naipanumbalik na, na ipinagkaloob ni Cristo ang awtoridad sa Kanyang mga tagapaglingkod, at na may mga biyayang naghihintay sa mga makikinig at susunod sa mga salita ng katotohanan, buhay, at kaligtasan. …

Kung minsan naiisip ko na tayong mga kabataan ay hindi tunay na nauunawaan ang responsibilidad na nakaatang sa atin. Hindi natin palaging naiisip na ang mga namumuno sa atin ay matatanda na, at kapag wala na ang ating mga magulang, mapapasaatin ang responsibilidad na ipagpatuloy ang kanilang gawain; na tayo ang mga taong responsable sa Sion sa hinaharap. Ginagawa ba natin ang ating bahagi, at inihahanda ba natin ang ating sarili upang magawa natin ang gawain ng ating mga magulang?

… Masasabi ba natin sa iba ang mga pangakong ibinigay sa atin ng Diyos, kung susundin natin ang Kanyang mga kautusan? Pamilyar ba tayo sa sinaunang talaan ng mga nanirahan sa kontinenteng ito, ang Aklat ni Mormon? At pamilyar ba tayo sa mga dakilang katotohanang itinuturo nito at sa mga aklat na nagtuturo sa atin tungkol sa kariktan ng gawaing kinabibilangan natin ngayon? Nangangamba ako na hindi pa sapat ang pag-unawa natin sa mga alituntunin ng ebanghelyo at hindi pa tayo gaanong masigasig na siyang nararapat.¹

Sa kanya na siyang binigyan ng marami ay marami ang hihingin, at alam ng bawat isa sa inyo kung gaano karami ang ibinigay sa atin, at kung gaano karami ang hihingin sa atin [tingnan sa Lucas 12:48; D at T 82:3]. Inihahanda ba natin ang ating mga sarili nang sa gayon ay hindi tayo mabigo? Mamuhay tayo ayon sa bawat salita na magmumula sa bibig ng Diyos [tingnan sa Deuteronomio 8:3; Mateo 4:4; D at T 84:44]. Mamuhay tayo sa paraan na nanaisin Niyang kilalanin tayo, at pagpalain tayo, at mahalin tayo.

… Nais kong sabihing muli na alam kong totoo ang ebanghelyo. Alam kong totoo ang ebanghelyo hindi dahil alam ito ni Itay, at hindi rin dahil palagi itong itinuturo sa akin ni Inay, kundi dahil inihayag ito ng Diyos sa akin. Ang Kanyang Espiritu ay nagpatotoo sa aking espiritu [tingnan sa Mga Taga Roma 8:16], at ang patotoong iyan ang pinakamahalagang kaloob na ibinigay ng Diyos sa akin.

Nawa’y pagpalain tayong lahat ng Diyos, ang aking dalangin sa pangalan ni Jesus, amen.Sinipi mula kina Jennifer Reeder at Kate Holbrook, eds., At the Pulpit: 185 Years of Discourses of Latter-day Saint Women (2017), 133-35.