Kapakapki Eden Emen Emen Riatail Lih kan.

Pwoson, Peneinei, Sawas

Kilel

Relief Society seal

Pwuhk Sarawi kan kin padahngki karasaras tohto en ohl oh lih akan me kapakapkiher eden mehteikan. Emen nan pwungarail iei en Alma me Tikitiko ah pahpa. Tohnleng men me koasoaieng Alma me Tikitiko, ndahieng me semo “kapakap [ehr] ni pwoson laud doke ih … ; eri, sang ni kahrepe wet I kohdo pwe I en ndahwei manaman oh mweimwei en Koht, me kapakap en sapwellime sounpapah kan pahn kak en pasapengla sang ni arail pwoson” (Mosiah 27:14.).

Kapakapki emen emen kin ritingada atail mohngiong kan en alehdi kapai kan me Kauno kupwurki kitail en ale. “Kahrepen kapakap iei kaidehn en wekidala kupwuren Koht, ahpw en wia mehn kehl ong kitail oh ong ahn mehteikan kapai kan me Koht ketin kupwurkier en ketkihong kitail, ahpw kitail anahne peki pwe kitail en kak alehdi.”¹

Emen lih karasa nan ansou apwal en ah mour, delepwohn ehu de nting kalap kohdo sang ah soun padahk en pas ko nan “rahn rotorot kei.” Likamw ira ese ansou me e anahne sawas. E ese me ira kin kapakapki ih, ni ansou me ira kin pwarek kan oh nan pein ara ansou kan.

Julie B. Beck, emen Presiden en Relief Society Lap me koamoaldihsangehr nan ah pwukoah ahpw koasoia, “Medewe uwen kehlail me kitail pahn ahnikipene ma riatail lih koaros pahn kin kapakap ni ngidingid ni menseng koaros oh ni soutik de, me pil mwau, sohte uhdisang kapakap nin duwen me Kauno mahsanih.”² Kapakapki irail kan me kitail kin pwarek kin kakehlailihala emen emen kitail oh lihen Souleng en Imwin-rahn akan.

Presiden Henry B. Eyring, Sounsawas Keieu nan Presidensi Keieu, padahngki: “Kapakapki wiepe ehu en esehla arail mohngiong kan. … Kumwail pahn anahne ese dahme Koht kupwurki kumwail en wia pwe kumwail en sewese irail oh wia meh koaros, ni amwail kak, pehm sapwellimen Koht limpoak ong irail.”³