Mahsen en Koht ong Sapwellime Seri kan

Pwuhk sarawi kan mahseniheng kitail me keieun soahng me Koht tepin wia mwurin Eh ketin kapikada ohl oh lih iei mahsenieng ira.¹ E sapwellimaniki ire kesempwal oh kaweid mwahu kei me E kupwurki ketikiheng ira. Sapwellime koasoandi kaidehn en katoutouih de kapwunode ira ahpw en kaweid ira ongpopohl oh lingan soutuk.

Oh mwo iei tapi. Sang rahno lel met, Koht ketin pousehlahte Sapwellime mahsen ong Sapwellime seri kan. Sapwellime mahsen kan kin epwel mwahu, keneinei, oh tohnpadahk kan en dih koaros kin onop. Irail kin epwel mwahu sang irail ko me kin raparapahki ren esehla kupwur en Koht, oh re kin wia kadehde me pid mehlelo me “Kauno Koht sohte pahn ketin wia mehkot, ahpw e ketin kasalehiongehr sapwellime ladu soukohp kan kupwure.²

Met e wia koasoandi ehu sangete nin tepin kawa, oh koasoandi wet pil doudoulahte lel rahn wet. E sohte wiahte ehu soai kaselel nan Pwuhk Sarawi; ahpw Koht ketin koasoanehdi met pwe en kak wehwe ong Sapwellime serih kan padahk kesempwal akan. E ketin pilada ohl ekei sang nan pwungatail pwe irail en wia soukohp, oh ketkihong irail dahme irail pahn koasoia, me kitail lukoahng en “alehda, duwehte me e pwilsang nan dawasen Kauno.”³ E ketin kehkehlingki, “Mendahte ma sang rehi de sang ngilen nei sounpapah kan, e duwepenehte.”⁴

Iei met me wia ehu padahk keieu kaselel, ngoang, oh koapwoaroapwoar me pid duwen Kapwurpwurdohu—Koht sohte kin ketin nennenla! E poakohng Sapwellime serih kan. E sohte mweidehng kitail en mihmi seli nan rotorot.

Pak riau nan ehu ehu pahr, nan Epreil oh Oakotohpe, kitail kin ahneki ansou mwahu en rong Sapwellimen Kauno mahsen sang rehn Sapwellime sounpapah kan nan atail tiepene lap me kesempwal akan.

I kiheng kumwail pein ahi kadehde me mwohn emen eh kin alulahng ni mwoahlo pwehn mahsen nan kapokon lap, e kin ahniki pepehm laud ni uwen eh kak, ni kapakap, oh onop oaralap me e kilelohng padahngkio. Iren mahsen koaros en nan tiepene lap kin kasalehda uwen laud en ansoun kaunopada oh men wehwehki dahme Kauno ketin kupwurki Sapwellime Kauno Souleng kan en rong.

Dahme pahn wiawi ma kitail me kin rongorong kan karasapene ahn irail me mahsen kan kaunop oh pein atail? Ia mwomwen atail pahn lella nan tiepene lap eh weksang ma kitail kin kilang tiepene lap eh wia ansou mwahu ehu en alehdi padahk kan sang rehn Pein Kauno? Sang ni mahsen kan oh melkahka en tiepene lap, kitail kak kasik kitail kak kasik kitail en alehdi pein atail pasapeng kan ong kalelapak sohte lipilipil de kapwunod kan me kitail pahn kin sohsohpai.

Ma ke kin medemedewe ma Sahm Nanleng kin ketin mahsenieng uhk, I men katamankihenguhk mahsen mengei oh kesempwal me neitail seri kan nan Primary kin koulkikan kokoulki: “[Ke wia] emen seri en Koht, oh e ketin kadar [uhkodo] met.” Sapwellime pwukoah iei en seweseiuk pwe ken pwurala “kousonla reh ehu rahn.”

Ma kumwail tuhwong Samatail Nanleng ni duwen Sapwellime seri, kumwail kak peki Reh ni mongiong karakarahk, “Kahluwa ie, kaweid ie, alu mpei , sewese ie I en diar ahlo. Padahkieng ie soahng koaros me I udahn pahn wia.” E pahn ketin mahsen ieng kumwail ni ah pahn ketin doadoahngki Ngehn Sarawi, oh nsenemwail “ma kumwail men kapwaiada kupwure.” I inoukihwei ma kumwail kapwaiada, “kapai tohto kaunopdahr.”⁵

Sapwellimen Kauno kaweid kanahnepe laud rahnwet duwehte dahme mie sang mahs kohdo. Ni atail kin kaunopada rong mahsen en Kauno, kitail en kin rapahki ni keneinei Ngehno en dahme mehlel pwe ni ansou me Kauno kin ketin mahsen ong Sapwellime sounpapah kan, kitail en kak wehwehkihla, keirkihda, oh pereperenkipene.⁶

I kadehde me “sang ni kapwaiada mepwukat wenihmw en ehl sohte kak langadahng [kitail]; ei, oh Kauno Koht pahn ketikihdo sapwellime manaman oh ketikihsang rotorot [mwohtail], oh elehieng nanleng en rerada ong kamwahupatail, oh kalinganahda mware.”⁷