Iko emi Abasi onode osok Ndito Esie

Nwed Abasi eting ono nyin ete ke akpa nkpo emi Abasi akanamde ke ama okobot erenowo ye nnwan okure ekedi nditing iko nno mmo.¹ Enye ama enyene akpan etop ye nti item ndino mmo. Uduak Esie ikedige ndifina mmo edi ekedi man ada mmo usung ekesim inemesit ye nsinsi ubong.

Ndien oro ekedi ata ntongo. Tongo ke usen oro edisim emi, Abasi ke akaka-iso ke ndineme-nneme ye ndito Esie. Ikot esie ke ofuri emana ema etim, ema, enyung ekpeb iko Esie. Mmo emi eyomde ndidiongo uduak Abasi ekpono iko Esie, ndien mmo edi ntiense eno akpaniko ete ke “Obong Abasi midinamke baba nkpo kiet ke mibohoke ini enye ayarade uduak Esie ono isungutom esie mme prophet.”²

Emi esidi usung tongo ke editongo ini, ndien usung oro ke akaka iso mfin emi. Oro idige inem mbuk eke Bible kpot, oro edi usung Abasi emi asiakde onim ete eneme akpan etop eno ndito Esie. Enye osio mme owo ke ufot nyin owut, okot mmo ete edi mme prophet, onyung ono mmo iko ete eting, emi ekekotde nyin ete “idibo, ukem nte otode ke ata inua [Esie].”³ Enye ofiori ete, “Mme okpoto ke uyo mi mme uyo eke isungutom mi, ke edi ukem.”⁴

Emi edi kiet kotu akwa ubong, inem ye etop idorenyin eke Edifiak-nda-ndi—Abasi idopke uyo! Enye amama ndito Esie. Enye ikayakke nyin iyo ke ekim.

Ke akang mbiba ke isua, ke Ofiong Inang ye Duop, nyin imenyene ufang ndikop uyo Abasi oto ke mme isungutom Esie ke inem akwa mboho nyin.

Ami nting iko ntiense eke idem mi nte mbemiso eting-iko ke akwa mboho ananam anyan isang oro ekesim enyong-obot, ke enye ama esisin akamba ukeme, akam, ye ukpeb man ekekem ke ubiong ke nditing iko. Ofuri etop mboho oto ediwak ini mbenge idem ye uyoho esit mkpeubok man ofiok eting se Jehovah ediyomde ete ikot Esie ekop.

Nso iditibe edieke nyin mme andikop isinde ukem mbenge idem nte eke eting-iko oro ke mbenge idem eke nyin? Didie ke mbenge idem nyin nno akwa mboho ekeme ndikpuho edieke nyin ikutde mboho nte kedi ufang ke ndibo etop nto Jehovah ke Idemesie? Ke ikwo ye mme iko eke akwa mboho, nyin imekeme ndibo iboro eke idem nyin ino suto mbume mme mfina emi nyin ikpekutde.

Edieke akananam mbufo emekere mme Ete ke Enyong esinehede eting iko ono mbufo, ami nyeti mbufo mbanga ndimem ye mme inem iko ikwo emi ndito Primary nyin esikwode ete: “[Afo edi] eyen Abasi, ndien enye okono [fi] edi mi.” Uduak Esie edi ndinwam mbufo ndifiak nnyong “nkodu ye enye ke usen kiet.”

Edieke mbufo etienede Ete ke Enyong nte eyen Esie, mbufo emekeme ndibup Enye ke esit akpaniko ete, “Da mi usung, kpeme mi, sanga ke nkang mi, nnwam mi ndikut usung.” Kpeb mi kpukpru se anade ami nnam.” Enye eyeting iko oto ke Edisana Spirit Esie ono mbufo, ndien edi utom mbufo do ke “ndinam uduak esie.” Ami nwongo nte edieke mbufo enamde ntre, “ke nti edidiong odu ke ubet ono mbufo.”⁵

Nyin imoyom ndausung Jehovah ke eyo emi akan nte akananam ekesiyomde tongo nte ekebot ererimbot. Nte nyin ibengeke idem ndikop iko Abasi, yak nyin iyom Spirit akpaniko man otodo ke ini Abasi editingde iko oto mme isungutom Esie, nyin ikeme ndifiok, ikop inemesit, inyung idara otokiet.⁶

Ami nno iko ntiense nte “ke nyin inamde mme nkpo emi ke inua-otop hell idikpanke [nyin], ihn, ndien Jehovah Abasi eyebin mme odudu ekim kiso [nyin] efeb, onyung anam enyong enyenge ke ufon [nyin], ye ke ubong enying Esie.”⁷