Tala Faamamai o le Talalelei
O Lena Taeao Susulu o le Aso Sa
Mai se lauga o le konafesi aoao ia Oketopa 2006.
I lena aso, na talaia ai e le Alii toetu noataga o le oti. Sa afio a’e o ia mai le tuugamau ma faaali mai ma le mamalu ma le manumalo o le Faaola o tagata uma.
Ua tatou iloa le Toetu—o le toe tuufaatasia o le agaga ma le tino i lona tulaga atoatoa. …
Pe mata e mafai ona outou vaai faalemafaufau i lena mea? Le olaga o la tatou fu’a taualuga? Le toe i ai se ma’i, le toe i ai se tiga, le toe mafatia i faalavelave e tele ina tatou aafia ai i le olaga nei?
O le Toetu ua i ai i le fatu o o tatou talitonuga o ni Kerisiano. …
… Ina ua toe tu mai le Faaola mai le tuugamau, … sa Ia faia se mea sa leai se tasi e mafai ona faia. Na Ia talaia noataga o le oti, e le gata mo Ia lava ae mo i latou uma e ola mai—o e amiotonu ma e amioletonu. …
… Na Ia faia ia avanoa lena meaalofa mo i tatou uma. Ma faatasi ai ma lena faatinoga ofoofogia, sa Ia faamaluluina le faanoanoa faataumaoi, lofituina lea na faalavelave i agaga o i latou o e ua maliliu e pele ia i latou.
Ou te mafaufau i le pogisa na i ai lena Aso Faraile ina ua sii a’e Keriso i luga o le satauro. …
… Na galulu le eleele ma ua faapouliuligia. …
Na olioli na tagata taupulepule leaga o e na sailia Lona soifua. …
I lena aso, na saeluaina ai le ie puipui o le malumalu.
“Sa taufai lofituina Maria le Makatala ma Maria le tina o Iesu i le faanoanoa. … O le tamalii maoae sa alofaina ma faamamaluina e i la’ua, a ua tautau mai ua maliu i luga o le satauro. …
… Sa fefefe le au Aposetolo. O Iesu, lo latou Faaola—le tagata na savali i luga o le vai ma faatuina e na oti—lea na i ai Ia lava i le faalealofa o tagata amioleaga. …
Sa o se Aso Faraile sa faatumulia i le faanoanoa faataumaoia, ma le lofituina. …
Ou te manatu mai aso uma talu mai le amataga o le talafaasolopito o lenei lalolagi, o lena Aso Faraile o le aso sili lea ona pogisa.
[Peitai] e lei faafualoa lena faanoanoa aua o le Aso Sa, na talaia ai e le Alii toetu noataga o le oti. Sa afio a’e o ia mai le tuugamau ma faaali mai ma le mamalu ma le manumalo o le Faaola o tagata uma.
Ma i se taimi vave, o mata sa faapea ona faatumulia i loimata lē matu, na soloia. O laugutu na musumusuina tatalo o le mafatia ma le faanoanoa ua faatumuina ai nei le lalolagi i viiga matagofie, aua o Iesu o le Keriso, o le Alo o le Atua soifua, na tulai i o latou luma … o le faamaoniga o le oti ua na o le amataga o se olaga fou ma le matagofie.
O le a tofu i tatou ma o tatou lava Aso Faraile—o na aso na foliga mai ua nutililii le atulaulau ma ua siomia i tatou i nutigamea o lo tatou lalolagi. …
Ae ou te molimau atu ia te outou i le suafa o Le sa faatoilaloina le oti—o le a oo mai le Aso Sa. I le pogisa o lo tatou faanoanoaga, o le a oo mai le Aso Sa.
… Po o le a lava lo tatou faanoanoa, o le a oo mai lava le Aso Sa. I le olaga nei po o le isi, o le a oo mai le Aso Sa.
Ou te molimau atu ia te outou e le o se tala faafagogo le Toetu. Ua ia te i tatou molimau patino a i latou sa vaai ia te Ia. E faitauafe i Lalolagi Tuai ma le Fou sa molimauina le Faaola toetu. Sa latou tagotago i manua i ona lima, vae ma le itu. …
Ina ua mavae le Toetu, sa toefaafouina le au soo. Sa latou malaga i le salafa o le lalolagi … ma le lotototoa e folafola atu o Iesu o le Keriso, o le Alo toetu o le Atua soifua.
O le toatele o i latou … na maliliu faamaturo, sa i ai i o latou laugutu le molimau i le Keriso toetu a o faaumatia i latou.
Na toefaafouina e le Toetu ia soifua o i latou o e na molimauina. Pe ua le tatau ea ona toefaafouina ai i tatou?
O le a tatou toe tutu a’e mai le tuugamau. …
Ona o le soifua ma le taulaga e faavavau a le Faaola o le lalolagi, o le a tatou toe faatasia ai ma e pele ia i tatou.
… I lena aso o le a tatou olioli ai ona ua faatoilaloina e le Mesia mea uma ina ia mafai ai ona tatou toe ola e faavavau.
Ona o sauniga paia tatou te mauaina i malumalu paia, o lo tatou tuua o lenei olaga puupuu e le mafai ona tuueseesea mo se taimi umi a tatou sootaga ia ua uma ona fusia faatasi i maea na gaosia i noataga e faavavau.
O la’u molimau maua’i, o le oti e le o le iuga lea o lenei olaga. …
Talosia ia tatou malamalama ma ola i le agaga faafetai mo meaalofa e le mafaatauina ia tatou te maua o ni atalii ma afafine o se Tama alofa ma mo le folafolaga o lena aso susulu, pe a tatou toetutu uma mai ma le manumalo mai le tuugamau.
… Po o le a lava le pogisa o lo tatou Aso Faraile, o le a oo mai lava le Aso Sa.