“Afai ou te lagonaina ua mou atu lo’u faatuatua, o le a se mea e mafai ona ou faia e toe maua mai ai?”

Afai ua faigata ia te au ona lagonaina le Agaga, e fesoasoani ia te au le alu i tusitusiga paia ma vaai i le faatuatua o loo i ai i tagata uma. E aumaia ai ia te au le faatuatua. Atonu ua matua pupuu tele au tatalo. Taumafai e fai ia sili atu ona faamaoni ma o le a fesoasoani le Tama Faalelagi ia te oe e toe maua ai lou faatuatua.

Ou te iloa e mafai ona ou tatalo i le Tama ma ole atu ia te Ia e fesoasoani mai ia ou tausia le laau o le faatuatua sa ou totoina. E tatau ona ou faia mea e tatau ai e fafaga ai, e pei o le faitauina o tusitusiga paia, sailia aafiaga faaleagaga, faitau o’u faamanuiaga, ma fesili atu mo le fesoasoani mai lo’u aiga. O lena mea, e mafai ai ona toe amata ola lo’u faatuatua. O le a le tupu mai le tasi aso i le isi—o se faagasologa e moomia ai se taimi umi. E tatau ona ou onosai ma faalagolago i le Alii.

A ou lagonaina ua mou atu lo’u faatuatua, ou te talanoa i lo’u tina ma lo’u tama, ona matou galulue faatasi ai lea i ai. O nisi taimi matou te usuina ai se pese faagaeetia loto pe a uma ina ia mafai ai ona matou lagonaina le Agaga.

E le gata i le tatalo sa’o i le Tama Faalelagi, e mafai ona tatou fesili i o tatou matua pe mafai faapefea ona tatou toe foi atu ia te Ia ma toe maua mai lo tatou faatuatua.

I le avea ai o se tagata sa tuuitiiitia le faatuatua, e tolu mea sa ou faia e toe maua ai. Muamua, sa ou tatalo. O le tatalo mo le malosiaga ma ia iloa le mea e tatau ona ou faia sa aoga lelei. Lona lua, sa ou ta’uina i uo vavalalata, ma sa latou fesoasoani tele mai i taimi sa ou manaomia ai. Lona tolu, sa ou faitauina tusitusiga paia. O le tele lava e fesootai i le faatuatua ma sa mafai ona fesoasoani ia te au e toe maua mai ai.