Becky Craven

E i ai se faaupuga e faasoa soo e Sister Becky Craven a o avea ma faifeautalai: “A e iloaina pe o ai oe, ua ese au aga.”

“Ma o le mea lena i ona itu uma—mai le faiga o ou lavalava, o lau tautala, o lau amio, ma gaoioiga e te auai,” na saunoa ai Sister Craven, o le sa galulue ma lona toalua o Ronald L. Craven, a o pulefaamalumalu ai o ia i le Misiona a Karolaina i Matu Charlotte mai le 2012 i le 2015.

Sa lagolagoina Sister Craven e fai ma Fesoasoani Lua i le Au Peresitene Aoao o Tamaitai Talavou i le aso 31 Mati, 2018. “A oo ina vaai tamaitai talavou ia i latou lava i le fuafuaga a le Atua, o le a mafai ona latou vaai i se vaaiga mamao mo i latou lava,” na ia saunoa ai. “E tatau lava ona i ai sau vaaiga mamao. Afai e leai sau vaaiga mamao, e te le iloa le mea e te alu i ai, ma e te le iloa foi po o le a le mea e fai e te oo ai iina.”

Na soifua mai Rebecca Lynn Craven i le aso 26 Oketopa, 1969 i Chardon, Ohaio, ISA ia Corless Walter Mitchell ma Linda Louise Kazsuk Mitchell. Sa mitamita e faaigoa o ia lava “o se anoso o le ami,” sa soifua ae o ia i Texas, ISA, o le mea na auai ai lona aiga i le Ekalesia; i Siamani i le taimi sa faamauina ai lona aiga i le Malumalu o Swiss; Egelani; Iuta, ISA, i le mea lea sa papatiso ai o ia i le taimi o le malaga taamilo muamua a lona tama i Viatename; ma setete o le Iunaite Setete o Maryland, Kentucky, Misuri, ma Kansas.

Sa faaipoipo i le aso 5 Aokuso, 1980, i le Malumalu o Sate Leki; o le au Cravens o matua o se fanau e toalima.

A o lei lagolagoina i lona valaauga fou, sa avea o ia o se fesoasoani i se au peresitene o le Aualofa a le uarota ma se fai sauniga o le malumalu i le Malumalu o Bountiful Iuta. Sa avea foi o ia o se peresitene o Tamaitai Talavou a le uarota, sui auai i le au faatonu o le Aualofa a le siteki, faifeautalai a le siteki, ma se taitai o le Webelos.

E i ai le tikeri o Sister Craven i mamanu o totonu o fale mai le Iunivesite a Polika Iaga, lea sa galue ai i le komiti faufautua o afeleti. Sa avea foi o ia ma sui auai faapitoa o le CHOICE Humanitaria, o se faalapotopotoga faavaomalo e faamautu i Iuta mo galuega fesoasoani alofa.

E fiafia o ia i savaliga sopo, taaloga i le vai, savali i le kiona, ie lalalga, ma taaloga ma gaoioiga faatasi ma lona aiga.