Elder Mathias Held

O Elder Mathias Held ma lona faletua o Irene, ua talafeagai lava ona ta’ua o ni faataitaiga o se Ekalesia faavaomalo. E tupuga uma mai i laua i tuaa Kolomupia o Siamani. O galuega ma a’oga na aveesea mai ai i la’ua mai lo la nuu moni o Amerika i Saute ae o atu i Kanata, Siamani, Kuatemala, Pasila, ma mulimuli ane ai, toe foi i Kolumipia. I atunuu taitasi, sa la faia ai suiga mo gagana ma aganuu fou.

“Peitai o le Ekalesia sa tutusa lava i soo se mea sa la o i ai,” na saunoa ai Elder Held, o le sa lagolagoina e avea ma Fitugafulu o le Pulega Aoao i le aso 31 Mati, 2018.

O lena “tutusa” faaleagaga sa taula i ai le ulugalii a o la tausia se fanau e toatolu ma agaigai i luma i le talalelei.

O le au Helds na vasega faatasi a o laiti i se aoga o le gagana Siamani i lo latou nuu o Bogota, Kolumipia. Sa faamauina i la’ua i le aso 13 Iuni, 1989 i le Malumalu o Frankfurt i Siamani, ina ua maua se tikeri faaenisinia o Mathias i Bokota ma se tikeri o le matuaofaiva i le pulega o pisinisi i Kanata.

O avanoa faafaigaluega na o ai le ulugalii talavou i Hanova, Siamani, lea na maua ai e Sister Held se uunaiga mamana faapea ua le o toe mamao ona suia lea o o laua olaga.

“Sa ou ta’u atu ia Mathias sa ou maua se lagona o le a ma mauaina se feau mai le lagi,” sa ia ta’ua ai. O lena feau mai le lagi sa taunuu mai i se aoauli timuga i le 1987 i se tu’itu’i i le faitotoa. Sa tutu i fafo ni faifeautalai Mamona e tautatala faaSiamani ma ni faaleoga faaAmerika.

Mo le isi 10 masina, sa suesue ai e le au Helds faatasi ma faifeautalai ma fai ni faigauo i le aulotu i le lotoifale a le AAG. Ina ua mavae le tele o tatalo, sa la mauaina le faamautuuga faaleagaga o le moni o le talalelei ma sa papatiso ai i la’ua i le 1988.

Sa faigaluega Elder Held mo le silia ma le 25 tausaga mo le falegaosi taavale o le Daimlez-Benz, faatasi ai ma tiute faalepulega na afua ai ona ia malaga taamilo i le lalolagi. Sa faalagolago le au Helds i le Alii i mea uma sa la nonofo ai.

“E le afaina lava pe o a tofotofoga o loo e feagai ai,” na ia saunoa ai. “Afai o loo e fesootai ma le lagi, o le a lelei mea uma mo oe.”

Sa soifua mai i le aso 5 Iuni, 1960 ia Michael ma Elisabeth Held, sa avea Elder Held o se fesoasoani i se au peresitene o le siteki, se fesoasoani i le au epikopo, ma se Fitugafulu Eria i le Eria o Amerika i Saute i Matusisifo.