Mga Young Adult
Hinay, Hinagawhaw nga Tingog taliwala sa Dagkong mga Desisyon
Ni M. Joseph Brough
Ikaduhang Magtatambag sa Kinatibuk-ang Kapangulohan sa Young Men
Gikan sa usa ka pakigpulong sa debosyonal, “Heeding the Voice of the Lord,” nga gipamulong sa Brigham Young University–Idaho pagka-Oktubre 17, 2017.
Kon ikaw takus, dili motugot ang Langitnong Amahan nga makahimo ka og dagkong sayop nga walay paghatag kanimo og pasidaan.
Litrato gikan sa © Getty Images
Isip bag-ong presidente sa misyon sa tinglarag niadtong 2011, mahinamon ko nga mogawas sa pag-adto sa among mga misyonaryo. Ang akong asawa, nga si Emily, ug ako mihukom nga moinspeksyon sa mga apartment ug mobisita sa matag pares nga misyonaryo sa misyon.
Samtang nagbiyahe mi sa Guatemala City ngadto sa usa sa lagyo namo nga zone, nga nailhang Sololá, among nahibaloan nga usa ka demonstrasyon ang nakababag sa karsada sa among atubangan. Ang mga demonstrasyon sa Guatemala mokabat og mga oras, ug sa kasagaran lisud ang paglusot niini. Apan dihang nangutana kami og laing karsada nga pweding kalikoan nahibaloan namo ang laing agianan. Hinoon, ang agianan, aduna niining mosunod nga mga pasidaan:
-
Dili kini maayo kaayo nga dalan.
-
Siguroa nga wala na mo sa dalan kon ngitngit na.
-
Ang mga pundok sa mga tulisan kanunayng anaa sa karsada.
Sama sa ubang madasigon nga bag-ong presidente sa misyon ug asawa, si Emily ug ako mipadayon. Human sa taud-taod namong pagpadagan, miabut kami sa lapukon nga karsada nga daw may usa ka kimba sa among atubangan. Nangomedya si Emily nga kuhaon namo ang camera ug maglitrato samtang susihon namo ang ngilit.
Mga tuig kaniadto, sa batan-on pa ko nga misyonaryo sa Guatemala, akong nakat-unan nga ang usa ka gamayng sanga nga isagudsod sa karsada nagpasabut nga “padayon lang uban ang pagmatngon.” Posible gani nga nagpasabut kini nga “hunong.” Nakita nako ang sanga apan wala ko makahunahuna sa buot ipasabut niini.
Usa ka gutlo human niadto, nag-ung-ong kami sa ngilit sa 20 ka pye (6 ka metro) nga giladmon sa gibanlas nga tulay. Nakahimo pa ko sa paggawas dapit sa akong kilid, apan si Emily dili na makaabli sa iyang pultahan. Dihang gisulayan niya sa pagkatkat sa lingkuranan ug mogawas agi sa akong pultahan, ang sakyanan misugod sa pagtay-og. Dayag lang, nga makapabalaka kaayo kadto nga gutlo.
Daghan ang misulod sa akong hunahuna. Akong naaninaw ang mga ulohan sa balita: “Bag-ong Presidente sa Misyon Milahus Pagpadagan sa Kimba nga Walay Tulay, nga Misangput sa Grabing Pagkaangol sa Asawa” o “Bag-ong Presidente sa Misyon ug Iyang Asawa Wala na Igkita human Gitulis sa Karsadang Dili Nila Angay nga Agian.”
Wala masayud unsay buhaton, mihunong ko sa gawas sa sakyanan ug nangamuyo sa Langitnong Amahan, “Palihug tabangi ko sa mga gutlo sa akong pagpasagad.” Makatuo ka ba nga usa ka dakong trak nga kargahanan og saging kalit nga mihunong sa among luyo? Ang drayber ug ang mga pasahero nakakita kanamo ug miduol aron mangatawa ug malingaw sa peligrong giatubang sa sipat nga usa ka langyaw. Gitudlo nila ang sanga nga naa sa karsada. Sa tinuoray, usa lang kadto ka gamayng sanga.
Dayon, sa milagruso namong panalangin, gikan sa ilang trak gikuha nila ang kadena nga kadtong higayuna ra gyud nako nakita sulod sa tulo ka tuig nga pagserbisyo sa Guatemala. Sa wala pa sila mobiya, nagputol sila og kahoy ug gibabag kini sa karsada. Sa akong pagtuo gusto silang makasiguro nga ang sunod nga moadto nga Amerikanong taga Norte dili na makahimo sa mao gihapon nga sayop.
Patalinghugi ang mga Pag-aghat ug mga Pasidaan
Gisugilon nako kini nga istorya aron mahimo ang punto nga kinahanglan kitang mopatalinghug sa mga pasidaan, mga pag-aghat, ug direksyon nga gihatag kanato pinaagi sa tingog sa Ginoo—kusog man kini o hinay. Kana nga tingog moabut sa daghang porma: sa mga kasulatan, mga sugo, mga hagawhaw gikan sa Espiritu Santo, mga pulong sa buhing mga propeta, ug tambag gikan sa mga ginikanan, mga lider sa Simbahan, ug sa buotang mga higala. Kita naminaw ba ug mipatalinghug niining mga pag-aghat ug mga pasidaan? Nganong importante man ang paghimo niini?
Atong mabasa sa mga Proverbio:
“Sumalig ka sa Ginoo sa bug-os mong kasingkasing; Ug ayaw pagsalig sa imong kaugalingong salabutan.
“Sa tanan nimong mga dalan ilha siya, ug siya magamando sa imong mga alagianan.
“Ayaw pagpakamaalamon sa imong kaugalingong mga mata: kahadlokan mo ang Ginoo, ug pahalayo gikan sa dautan” (Mga Proverbio 3:5–7).
Kinahanglan nga mosalig kita sa Ginoo sa tibuok natong kasingkasing. Kinahanglan kitang makasabut nga kulang ang atong kahibalo kon unsay pinakamaayo alang kanato ug sa pinakamaayo alang sa uban. Kon mosalig gayud kita Kaniya, pagkanindot sa saad nga Iyang gihatag: Mogiya siya sa atong mga alagianan.
Sa among pamilya, duna kami panultihon nga nahimong importante nga bahin sa among misyon. Taud-taod nang gitudlo ni Presidente Russell M. Nelson ang mao nga konsepto. Miingon siya sa ingon niini nga paagi: “Ang kamasulundon magdala og kalampusan; ang tukma nga kamasulundon magdala og mga milagro.”1
Ang bersyon sa among pamilya ug misyon mao ang “Ang kamasulundon magdala og mga panalangin, apan ang tukma nga kamasulundon magdala og mga milagro.”
Wala ko makasabut sa hingpit kon unsay ipasabut sa tukma nga kamasulundon, apan kini ang akong nasabtan. Wala kini magpasabut nga hingpit ang atong kamasulundon karon gayud sa tanang butang, bisan og posibling mahingpit ang atong pagsunod sa daghang sugo sa Ginoo. Mao nga, ang paghinulsol kinahanglan nga mahimong usa ka bahin sa tukma nga kamasulundon. Apan ang tukma nga kamasulundon nagkinahanglan og hugot nga pagtuman sa pagsunod sa tanang pasidaan ug mga pag-aghat ug sa mga sugo nga gihatag sa Langitnong Amahan kanato.
Usahay dili nato masabtan nganong mohangyo ang Langitnong Amahan kanato og pihong mga butang. Kana nga mga panahon posibling mao gayud ang pinakaimportanting panahon diin himoon ang tukma nga pagkamasulundon. Hinumdumi nga dihang si Adan, usa sa pinakalabaw sa tanan, gipangutana nganong mihimo siya og sakripisyo: “Ug human sa daghan nga mga adlaw usa ka anghel sa Ginoo mipakita ngadto ni Adan, nag-ingon: Ngano nga ikaw naghalad og mga sakripisyo ngadto sa Ginoo? Ug si Adan miingon ngadto kaniya: Wala ako masayud, gawas nga ang Ginoo misugo kanako” (Moises 5:6).
Lead, Kindly Light, ni Simon Dewey; Litrato ni Kristo, ni Heinrich Hofmann
Sunda ang mga Propeta
Si Emily usa ka talagsaong ehemplo sa tukma nga pagkamasulundon bisan og wala siya makasabut. Atol sa Oktubre 2000 nga kinatibuk-ang komperensya, nadungog niya ang mosunod nga tambag gikan ni Presidente Gordon B. Hinckley (1910–2008): “Among gidili ang mga patik ug usab ‘ang pagpatusok sa lawas gawas sa medikal nga katuyoan.’ Kami, hinoon, wala magdili ‘sa ginagmay nga pagpatusok sa dalunggan sa mga babaye para sa usa ka parisan nga ariyos’—usa ka parisan.”2
Sa pag-uli sa akong asawa, iyang gipasabut ang among ikaduhang anak nga babaye sa kaimportante sa pagsunod sa mga propeta bisan unsa man. Samtang nag-istorya siya, misunod usab ang akong asawa. Gitangtang niya ang iyang ikaduha nga parisan sa ariyos sa katapusang higayon. Nagtuo ko nga wala gihapon siya makasabut og ngano apan nasayud ko nga ang ngano dili maoy importante para niya.
Para sa pipila kanato, daw kana walay kahulugan tungod kay gamay ra kaayo kini nga butang. Tinuod kana. Hinoon, dili ko makahinumdom nga miingon ang Ginoo nga “Kon nahigugma kamo kanako, inyong pagatumanon ang akong mga sugo nga nakitang importante” (tan-awa sa Juan 14:15).
Akong minahal nga mga kaigsoonan, usa ka tin-aw nga tingog sa pasidaan nga kanunay nga angay natong patalinghugan naggikan sa pinili nga mga apostoles ug mga propeta sa Ginoo. Tingali dili kini popular sa mga sumbanan sa kalibutan, sama nianang gamay nga butang nga gihangyo ni Presidente Hinckley. Apan pweding kamo—kinahanglan nga kamo—mosalig nga naggikan kini sa Langitnong Amahan. Posibling usa lamang kini ka gamayng sanga, o posibling tibuok kahoy nga gibabag sa agianan. Awhagon ko kamo sa pagbasa o pagpaminaw sa kinatibuk-ang komperensya uban niini nga panghunahuna: Unsa nga gagmayng sanga o kahoy ang gibutang sa Ginoo sa akong agianan?
Salig sa Ginoo
Tingali ang uban kaninyo maghunahuna, “Ah, maayo kaayo kana. Apan unsa may inyong buhaton kon nagtinguha kamo og mga pag-aghat, tambag sa Ginoo, mga pasidaan, ug mga giya, ug daw wala kamo makadawat og tubag?”
Tingali anaa kaninyo kini nga mga kabalaka mahitungod sa importanting mga desisyon sa inyong kinabuhi. Hinumdumi ang saad nga salig sa Ginoo sa bug-os mong kasingkasing, ug Siya magamando kanimo sa imong mga agianan.
Mahitungod sa importanting mga hitabo sa atong kinabuhi, gusto gayud kita og klaro nga direksyon, ug posibling lisud kana nga makit-an. Apan akong nasabtan nga kon mahinulsulon ako, ang pagkamasulundon sa tukmang paagi, pagsunod sa akong mga lider, ug paghimo og ubang maayong mga pagpili—sa laing pagkasulti, kon takus ako—ang Langitnong Amahan dili motugot nga makahimo ko og dagkong mga sayop nga walay tukmang pagpasidaan. Dili usab Niya kini itugot kaninyo.
Batan-on kong mga higala, ania ang Langitnong Amahan aron ilayo kita sa paghimo sa grabing mga sayop kon magtinguha kita sa Iyang mga pasidaan, mga pag-aghat, ug mga pagpadayag gikan sa tanang anaa nga mga kapanguhaan—ug kon kita mopatalinghug ug molihok niini. Aduna kiitay katungod sa pagbaton sa Espiritu Santo kanunay uban kanato, ilabi na sa lisud nga mga panahon sa kinabuhi.
Nga magmalampuson kamo sa pag-ila sa mga sanga sa pasidaan ug mga kahoy nga ibutang sa Langitnong Amahan sa inyong agianan maoy akong panghinaot.
Mopamatuod ko nga kon mopatalinghug kita sa tingog sa Ginoo, samtang madawat nato kini gikan sa daghang kapanguhaan ug maningkamot gayud sa tukmang pagkamasulundon, mabatunan nato ang kinabuhi nga matapos sa “ug nagpakabuhi silang malipayon human niana.” Mahitabo lamang kana pinaagi sa pagsunod sa doktrina ni Kristo ug sa paghimo ug pagtuman sa sagradong mga pakigsaad.