Naghinulsol ko, apan mibati gihapon ko og tumang pagbati nga sad-an. Unsaon nako sa pagbaton og kalinaw?

Tungod sa walay katapusang Pag-ula ni Jesukristo, ang imong pagbati nga sad-an mabanlas kon hingpit ang imong paghinulsol. Apan usahay mosantop gihapon sa hunahuna sa mga tawo ang ilang mga sala bisan og naghinulsol na sila.

Ang pagbati nga sad-an, o ang “diosnon nga kasubo” (2 Mga Taga-Corinto 7:10), makatabang. Makapasentro kini sa atong mga hunahuna diha kang Jesukristo ug mogiya kanato ngadto sa tinuod nga paghinulsol ug kausaban. Ang kaulaw, sa laing bahin, magsentro sa atong mga hunahuna diha sa atong kaugalingon ug makababag sa atong pag-uswag.

Ang Basahon ni Mormon naghatag kanato og maayong mga ehemplo kon sa unsang paagi kita makahinulsol ug dayon makatagamtam sa kalinaw diha kang Kristo:

• Ang paghinumdom sa nangaging mga sala nagtulod kang Ammon sa pagdayeg sa Manluluwas ug sa Iyang kamaloloy-on, nagdala kaniya og kalipay imbis pag-antus (tan-awa sa Alma 26:17–20).¹

• Human nga ang kang Alma nga “hunahuna naghinuktok [sa] panumduman” kang Jesukristo ug sa Iyang Pag-ula, siya “ wala na samoka sa panumduman sa [iyang] mga sala” (Alma 36:17–19). Bisan og anaa ang panumduman, wala na siya samoka pa niini.²