Ului Moʻoni mo Tuʻuloa ki he Tamai Hēvaní pea mo e ʻEiki ko Sīsū Kalaisí¹

Ko e ngaahi fakatahaʻanga ko ia ʻa e Siasí he ʻaho Sāpaté ʻe miniti ʻe 60 pē ʻa e houalotu sākalamēnití he Sāpate takitaha, ʻo nofotaha he tokangá he Fakamoʻuí, ouau ʻo e sākalamēnití, mo e ngaahi pōpoaki fakalaumālié. Hili e taimi vahevahe kalasí, ʻe ʻalu e kāingalotu ʻo e Siasí ki ha kalasi miniti 50 ʻe taufetongi fakahili Sāpate:

• ʻE fakahoko e Lautohi Faka-Sāpaté he Sāpate ʻuluaki mo e tolu ʻo e māhiná.

• ʻE fakahoko e ngaahi fakataha ʻa e ngaahi kōlomu lakanga fakataulaʻeikí, Fineʻofá, mo e Kau Finemuí he Sāpate uá mo e faá.

• Ko e ngaahi fakataha he Sāpate nimá ʻe fai fakatatau pē ia ki he fakahinohino ʻa e pīsopé.

ʻE fakahoko e Palaimelí he uike takitaha ʻi he miniti ʻe 50 ko ʻení ʻo kau ai ha taimi ki he hivá mo e ngaahi kalasí.

Kuo taʻu lahi e tokanga ʻa e kau taki matuʻotuʻa ʻo e Siasí ki ha niʻihi hotau kāingalotu pelepelengesí ʻi he taimitēpile ʻo e fakataha he Sāpaté, he ʻe lava foki ke faingataʻa e taimitēpile houa ʻe tolu ʻi he Sāpaté. ʻOku tautefito ʻene moʻoni e meʻá ni ki he mātuʻa ʻoku kei iiki ʻenau fānau, fānau Palaimelí, kau mēmipa toulekeleká, kau papi ului foʻoú, mo ha niʻihi kehe.

Ka ʻoku ʻi ai ha meʻa mahuʻinga ange ki he liliu ko ʻení mei hono fakanounouʻi pē ʻo e taimitēpile ki ʻapisiasi he Sāpaté. ʻOku meaʻi mo houngaʻia ʻa Palesiteni Nalesoni he meʻa lahi ʻoku malavá ko e tupu mei hoʻomou faivelenga ki he ngaahi fakaafe kimuʻá. ʻOkú ne loto ai mo e kau taki kotoa ʻo e Siasí ke ʻomi ha fiefia lahi ange ʻo e ongoongoleleí—ki he mātuʻá, fānaú, toʻu tupú, kau taautahá, toulekeleká, kau papi ului foʻoú, mo e kakai ʻoku akoʻi ʻe he kau faifekaú—ʻi ha founga potupotutatau ʻoku fakatefito ʻi ʻapi mo poupou ki ai ʻa e Siasí. ʻOku kau e ngaahi meʻá ni ʻi he ngaahi taumuʻa mo e tāpuaki ʻoku fekauʻaki mo e liliu ko ʻení mo e ngaahi liliu kehe kimui ní:

• Ko ha ului ʻoku loloto ange ki he Tamai Hēvaní pea mo e ʻEiki ko Sīsū Kalaisí mo fakamālohia e tui kiate Kinauá.

• Fakamālohia e fakafoʻituituí mo e fāmilí ʻi he nāunau fakalēsoni ʻoku fakatefito ʻi ʻapi mo poupou ki ai e Siasí, ʻoku tokoni ki hono moʻui fiefia ʻaki e ongoongoleleí.

• Fakaʻapaʻapaʻi e ʻaho Sāpaté, ʻo tokanga taha ki he ouau ʻo e sākalamēnití.

• Tokoniʻi e fānau kotoa ʻa e Tamai Hēvaní he ongo tafaʻaki ʻo e veilí ʻi he ngāue fakafaifekaú mo hono maʻu e ngaahi ouau mo e ngaahi fuakava pea mo e ngaahi tāpuaki ʻo e temipalé.

ʻE lava ʻi he taimitēpile Sāpate ko ʻeni ke aʻu ai taimi lahi ange ki ha efiafi ʻi ʻapi mo ako e ongoongoleleí ʻi ʻapi he Sāpaté, pe ʻi ha taimi kehe ʻe fili ʻe he fakafoʻituituí mo e fāmilí. ʻE lava ke fakahoko ha pō ʻekitivitī fakafāmili he Mōnité pe ʻi ha taimi kehe. Pea ʻi he ʻuhinga ko ʻení, ʻoku totonu ke hokohoko atu hono fakaʻatāʻatā ʻe he kau takí e efiafi Mōnité mei he ngaahi fakataha mo ha ʻekitivitī ʻa e Siasí. Ka ko e taimi ko ia ʻoku fakaʻaongaʻi ki he efiafi ʻi ʻapí, ako ʻo e ongoongoleleí mo e ngaahi ʻekitivitī maʻá e fakafoʻituituí mo e fāmilí, ʻe lava ke fakataimi-­tēpileʻi ia ʻo fakatatau mo ʻenau ngaahi tūkunga fakafoʻituituí.

ʻE toe fuʻu lelei lahi ange hono ako fakafāmili mo fakafoʻituitui ʻo e ongoongoleleí ʻi ʻapí ʻaki ha nāunau fakalēsoni faaitaha mo foʻou ʻo e maʻuʻanga tokoni Haʻu ʻo Muimui ʻIate Aú maʻá e fakafoʻituituí mo e fāmilí ʻa ia ʻoku fakafekauʻaki mo e meʻa ʻoku akoʻi ʻi he Lautohi Faka-Sāpaté mo e Palaimelí. ʻE akoʻi e Fuakava Foʻoú ʻi Sanuali ʻi he ngaahi kalasi Lautohi Faka-Sāpate ʻa e toʻu tupú mo e kakai lalahí pea mo e Palaimelí. ʻOku fakataumuʻa e maʻuʻanga tokoni foʻou ke ako ʻi ʻapi ko e Haʻu ʻo Muimui ʻIate Aú maʻá e fakafoʻituituí mo e fāmilí—ʻa ia ʻoku kau ai e Fuakava Foʻoú—ke tokoniʻi e kāingalotú ke nau ako e ongoongoleleí ʻi ʻapi. ʻOku fakamatalaʻi ai ʻo pehē: “Ko e maʻuʻanga tokoni ko ʻení, ʻoku fakataumuʻa ia ki he tokotaha fakafoʻituitui mo e fāmili kotoa pē ʻi he Siasí. ʻOku fakataumuʻa ia ke ne tokoniʻi [kitautolu ke lelei ange] hono ako e ongoongoleleí—tatau ai pē pe ko e fakahoko [ʻetautolu] pe ko [hotau] fāmilí. . . . ʻOku fokotuʻutuʻu e maʻuʻanga tokoni [foʻou] ko ʻení ʻo fakataimitēpile ke fakahoko . . . fakauike ia.”

ʻE akoʻi e ngaahi lēsoni foʻou ʻa e Palaimelí ʻi he lotú, mei he Haʻu ʻo Muimui ʻIate Aú ʻo muimui ki he taimitēpile tatau he uike kotoa pē. ʻE fakafekauʻaki e ngaahi kalasi Lautohi Faka-Sāpate ʻa e kakai lalahí mo e toʻu tupú he Sāpate ʻuluakí mo e tolú ke nau poupouʻi e maʻuʻanga tokoni foʻou ki ʻapi ko e Haʻu ʻo Muimui ʻIate Aú. ʻE hokohoko atu pē hono akoʻi e ngaahi akonaki ʻa e kau taki ʻo e Siasí ʻe he kakai lalahi ʻo e lakanga taulaʻeikí mo e Fineʻofá ʻi he Sāpate uá mo e faá, ʻo fai e fakamamafa ʻi he ngaahi pōpoaki lolotonga ʻa e kau palōfita ʻo onopōní. ʻE ako ʻe he kau finemuí mo e kau talavou ʻo e Lakanga Taulaʻeiki Faka-ʻĒloné ki he ngaahi tefito ʻo e ongoongoleleí ʻi he ngaahi Sāpate ko iá.

ʻOku maʻu ʻi he maʻuʻanga tokoni foʻou ki ʻapí e “Ngaahi Fakakaukau ki he Ako Fakafāmili ʻo e Folofolá mo e Efiafi Fakafāmili ʻi ʻApí.” ʻOku maʻu ʻi he ngaahi fokotuʻutuʻu ki he uike takitaha ha ngaahi fakakaukau ke tokoni ki he akó mo e ngaahi ʻekitivitī ʻa e fakafoʻituituí mo e fāmilí. ʻOku toe maʻu foki ʻi he maʻuʻanga tokoni ʻo e Haʻu ʻo Muimui ʻIate Aú maʻá e fakafoʻituituí mo e fāmilí ha ngaahi fakatātā lahi ʻe tokoni ʻaupito ki he ako fakafoʻituituí mo fakafāmilí, tautefito ki he fānaú. ʻE tufaki atu e maʻuʻanga tokoni foʻou ko ʻení ki he fāmili takitaha ʻi Tīsema ʻo e taʻu ní.

Ne enginaki mai ʻa Palesiteni Nalesoni heʻene fuofua lea ki he kāingalotu ʻo e Siasí ʻi Sānualí, ke tau teuteu ki he Hāʻele ʻAngaua Mai ʻa Sīsū Kalaisí ʻaki hono fakahoko mo tauhi e ngaahi fuakavá.

ʻE fie maʻu ke mālohi mo fakaloloto e ului fakafoʻituituí koeʻuhi ko e tūkunga ʻo e māmaní pea fakamālohia e tui ki he Tamai Hēvaní mo Sīsū Kalaisi mo ʻEne Fakaleleí. Kuo teuteuʻi kitautolu ʻe he ʻEikí, ʻi he ʻotu laine ki he ʻotu laine, ki he taimi faingataʻa ʻoku tau fehangahangai mo iá. ʻI he ngaahi taʻu kimui ní, ne tataki kitautolu ʻe he ʻEikí ke tau tokanga ki he ngaahi tefitoʻi meʻa ko ʻení ʻo kau ai hono:

• Fakaʻapaʻapaʻi e ʻaho Sāpaté mo e ouau toputapu ʻo e sākalamēnití kuo toutou fakamamafaʻi ʻi he taʻu ʻe tolu kuohilí.

• Fakatatau mo e fakahinohino ʻa e pīsopé, ʻe nofotaha e tokanga ‘a e kōlomu kuo fakamālohia ʻo e kaumātuʻá mo e Fineʻofá, ki he taumuʻa mo e ngaahi tufakanga fakalangi ʻo e Siasí mo tokoni ki he kau mēmipá ke fakahoko mo tauhi e ngaahi fuakava toputapú.

• Ko hono fakahoko fiefia ʻo e ngāue fakaetauhí ʻi ha founga māʻolunga mo māʻoniʻoni ange.

• Kamataʻaki e fakakaukau ki he ikuʻangá, ʻo hoko e ngaahi fuakava ʻo e temipalé mo e ngāue he hisitōlia fakafāmilí ko ha konga mahuʻinga ʻo hono fakahoko mo tauhi e ngaahi fuakavá.

Ko e liliu ko ia ne fakahā he pongipongi ní ko ha sīpinga ia ʻe taha ʻo e fakahinohino ki he ngaahi pole ʻo hotau kuongá.

Ne fakamamafaʻi ʻe he nāunau fakalēsoni motuʻa ʻa e Siasí ha aʻusia lelei ʻo e ʻaho Sāpaté. ʻOku tau ʻiloʻi ko ʻene sai ange hono akoʻí mo mateuteu fakalaumālie lahi ange e kau mēmipá, te tau maʻu leva ha aʻusia lelei ange he lotú ʻi he Sāpaté. ʻOku faʻa tāpuekina kitautolu ʻi he tupulaki ʻa e Laumālié mo fakamālohia e uluí ʻi he tūkunga ʻo e Siasí.

ʻOku fie maʻu ke tākiekina mālohi ange ʻe he nāunau fakalēsoni ʻoku fakatefito ʻi ʻapí kae poupouʻi ʻe he Siasí, ke lelei ange e ʻulungaanga, tōʻonga mo e tūkunga fakalotu ʻo e fāmilí mo e fakafoʻituitui. ʻOku tau ʻiloʻi e mālohi fakalaumālie mo e ului lahi mo tuʻuloa ʻe lava ke maʻu mei he ʻātakai ʻo ʻapí. ʻI ha savea he ngaahi taʻu kuohilí ki he kau talavoú mo e kau finemuí, ne mahino ko e lahi taha e ivi tākiekina ʻa e Laumālie Māʻoniʻoní ʻoku maʻu ia mei he ako folofola fakafoʻituituí mo e lotu ʻi ʻapí. Ko ʻetau taumuʻá ke ʻai ke potupotutatau e ngaahi aʻusia ʻi he Siasí mo e ʻapí ʻi ha founga ke fakatupulaki lahi ai e tuí, mo e anga fakalaumālié pea fakaloloto e ului ki he Tamai Hēvaní pea mo e ʻEiki ko Sīsū Kalaisí.

Ko e taumuʻa ʻo e ngaahi liliú ni ke maʻu ʻe he kakai lalahí mo e toʻu tangata kei tupu haké ha ului moʻoni mo tuʻuloa. ʻOku fakamahino mai ʻe he peesi ʻuluaki ʻo e maʻuʻanga tokoni ki he fakafoʻituituí mo e fāmilí: “Ko e taumuʻa kotoa ʻo hono ako mo akoʻi ʻo e ongoongoleleí ke fakaloloto ʻetau uluí mo tokoni ke tau hoko lahi ange ʻo hangē ko Sīsū Kalaisí. . . . ʻOku ʻuhinga ʻeni ke tau fakafalala kia Kalaisi ke Ne liliu hotau lotó.” ʻOku faitokonia ‘eni ‘e he kakapa “ʻo ope atu he loki akó ki he loto ʻo e fakafoʻituituí mo e ʻapí. ʻOku fie maʻu ki ai ʻa e ngāue maʻu pē he ʻaho kotoa peé kae lava ke mahino mo moʻui ʻaki e ongoongoleleí. ʻOku fie maʻu ʻe he ului moʻoní e ivi tākiekina ʻo e Laumālie Māʻoniʻoní.”

Ko e taumuʻa mahuʻinga mo taupotu taha ʻo e ului moʻoni mo tuʻuloá ko e moʻui taau ke maʻu e ngaahi fuakavá mo e ouau ʻo e hala ʻo e fuakavá.

ʻOku mau falala atu ke mou fealēleaʻaki fakataha mo fekumi ki ha fakahā ke fakahoko ʻaki e ngaahi liliú ni—kae ʻoua ʻe tukuange e meʻa ʻoku mahuʻingá pe feinga ke tuʻutuʻuniʻi ki he fakafoʻituituí pe fāmilí e meʻa ke nau faí. ʻE toe maʻu ha fakamatala lahi ange ʻi ha ngaahi fetuʻutaki he kahaʻú, kau ai ha tohi mo ha fakahinohino mei he Kau Palesitenisī ʻUluakí.

ʻOku ou fakamoʻoniʻi kiate kimoutolu ko e ngaahi fealēleaʻaki ʻa e Fakataha Alēlea ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻi he temipalé, mo e kole tāumaʻu ʻa hotau palōfita ʻofeiná ki he ʻEikí ke fakahoko e ngaahi liliú ni, ne maʻu ai ʻe he taha kotoa ha fakamoʻoni mālohi ki ai. Ko Lāsolo M. Nalesoni ʻa hotau Palesiteni mo e palōfita moʻuí. Ko e fakahā ne fai he ʻaho ní, ʻe maʻu ai ha tāpuaki lahi maʻanautolu te nau loto ʻaki hono tali e liliú mo fekumi ki he tataki ʻa e Laumālie Māʻoniʻoní. Te tau toe ofi ange ai ki heʻetau Tamai Hēvaní mo hotau ʻEiki mo e Fakamoʻui ko Sīsū Kalaisí, ʻa ia ʻoku ou hoko ko ha fakamoʻoni pau ki aí. ʻI he huafa ʻo Sīsū Kalaisí, ʻēmeni.