Ol Dip Koneksen we Oli Stastap

Mi save talem stret se evri blesing we oli talem long mi se bae mi kasem sapos mi go long wan fultaem misin, i bin hapen.

Mi no tekem taem tumas blong disaed se bae mi go givim seves long wan misin, o nogat. Mi bin laki tumas blong gat wan papa mo ol nara memba blong famli we eksampol blong olgeta i stap olsem wan pruf blong ol bigfala praes we oli kam taem wan i stap obei long voes blong profet, long saed ia. Naoia, 7 yia nao we mi kambak hom; mi save talem stret se evri blesing we oli talem long mi se bae mi kasem sapos mi go long wan fultaem misin, i bin hapen—mo mi bin sapraes tumas se, evri dei, laef blong mi i gat blesing from samting ia.

Wan stamba samting we i mekem se from wanem wan misin i gud inaf, hem i dip koneksen we i stastap, we yu mekem wetem ol pipol we yu stap mitim mo stap tijim. MI tingbaot gud fas man we mi bin baptaesem: hem i wan boe blong 11 yia, we nem blong hem i Tutus Sosolito Fred. Mi bin gat kwestin ia se, ?wan we i yangfala olsem bae i rere o no blong laef folem wanem oli bin tijim hem–o, hem i andastan inaf blong hem i save baptaes? Be kwaet fasin blong hem, mo fasin blong hem blong stap lisin gud i soem long mi se, yes, bae hem i mekem, mo Spirit i talem long mi se i stret taem blong hem blong hem i kam joenem tru Jos. Mi neva save wanem i bin hapen long hem afta we mi aot long eria blong hem, from se i no gat lektrik, o i no gat postofis longwe, blong mitufala i save gohed blong toktok. Be, wanwan taem, bae mi luk wan foto blong seves blong baptaes blong hem, mo ol memori blong taem we mitufala i stap tugeta bae i kambak long mi.

Foto ia, blong seves blong baptaes blong hem, i hang insaed long Niu Silan Misinari Trening Senta blong ol las 7 yia. I no longtaem i pas, ol wokman blong Trening Senta oli kasem mi, mo oli talem long mi se oli bin luksave se wan long ol niufala misinari blong olgeta, i semfala boe ia we i stap long foto blong mi.

Konvet blong mi, Tutus, i wan misinari nao.

Olgeta long trening senta oli bin kaen tumas blong save invaetem mi blong mi go luk hem. Taem we mitufala i mit long MTS, i bin sot from mi gat klas blong go long hem long dei ia, be i gud tumas blong luk hem. Mitufala i hag, mo mitufala i gladglad tumas, ating mitufala i sekhan, holem han fo taem olsem long storian blong mitufala. Mitufala i luk se mitufala tugeta i ting se bae mitufala i neva save luk mitufala bakegen, mo olsem wanem situesen ia i bin nambawan tumas blong mitufala i luk mitufala bakegen. Mi talem long hem se mi mi praod long hem blong hem i stap developem testemoni blong hem i go moa, mo blong tekem aksen wetem testemoni ia, mo we, blong serem testemoni ia wetem ol narawan tru long wan misin, i wan stret joes. Long mi, ol filing we mi bin gat, i kolosap semmak long wanem Alma i bin filim taem hem i kam tugeta bakegen wetem ol boe blong Mosaea:

“Alma i bin glad tumas blong luk ol brata blong hem; mo wanem i bin ademap moa long glad blong hem, i we oli stil ol brata blong hem long Lod; yes, mo oli bin kam strong long save blong trutok; from oli ol man blong wan stret haremsave mo oli bin stadi long ol skripja strong oltaem, blong oli save andastanem toktok blong God.” (Alma 17:2)

Glad ia we mitufala i bin serem, i kamaot stret from se mitufala i bin save stanap we mitufala i fesem mitufala—mi, wan misinari we i bin go mekem wok blong Lod, mo hem, wan impoten sol we i bin konvet i kam insaed long Jos blong Lod—mo talem se, afta longlongfala taem ia we i pas, mo nomata ol mistek we mitufala i bin mekem, mitufala i bin gohed blong stap tru, mo stap fetful long ol kavenan mo ol komanmen we mi bin invaetem hem blong laef folem evri yia ia we i pas finis.

Long wan taem, afta long misin blong mi, bae mi no save filim olsem, blong save mit olsem. Wanem we i tru, i we, bifo long wan trip i go long Yuta sam yia i pas, wan fren i askem mi sapos bae mi go visitim misin presiden blong mi. Mi no gat intres nating blong go luk hem. Mi bin filim se sapos mitufala i mit, bae hem i luk wan misinari we i no bin fetful tumas, olsem we hem i bin save mi long misin.

Mi no bin mekem wan samting we i blokem mi blong holem wan laef tempol rekomen, be plante samting i no bin stret long laef blong mi. Mo tu, mi no gat tu tingting long ol trutok mo ol revelesen we mi bin kasem, be taem mi stap traem blong tingbaot olgeta, oli no klia gud, mo i no pusum tingting blong mi i strong olsem fastaem. Mi kwestinim mi, se olsem wanem nao mi kam blong mi filim se mi stap longwe long God olsem, from se mi bin stap mekem plante gud samting olsem mi bin stap mekem bifo.

Problem i stap long ples ia nao: Mi bin stap mekem plant gud samting olsem we mi bin stap mekem bifo. Mi kam blong mi glad nomo long fet we mi gat, mi dipen long ol sakrifaes we mi bin mekem bifo, mo ol aksen blong fet blong bifo, mo mi no kipim faea ia i laef i stap blong mekem ol niu samting.

Mistek we plante riten misinari oli mekem, i we, oli wantem holemtaet sem level blong spirit we oli kasem long taem blong misin blong olgeta. Be gol blong olgeta i mas hae moa, oli mas go from wan samting we i hae moa bitim hemia. Oli no sapos blong kipim fet blong olgeta i semmak, be oli mas bildimap fet blong olgeta, ademap samting antap long hem, mo kam wan man o woman we i gud moa bitim misinari ia we i bin stap long misin bifo. Blong laef tru long laef afta long misin, oli nid blong mekem samting i bitim wanem we oli bin stap mekem blong 18 o 24 manis blong fultaem seves.

Wan stamba samting blong mekem wan i gat paoa long saed blong spirit blong gro i moa bitim huia hem olsem we hem i stap olsem misinari, hem i blong traehad oltaem blong gohed blong mekem ol evri dei praktis ia blong stap stadi long Buk blong Momon, mo mekem hemia wetem wan prea we i tru, we i kam long hat. Blong ova wan yia, mi bin ridim Buk blong Momon evri dei mo mi testifae se taem yumi kam blong save gud wei we God i stap toktok tru long ol pej ia, bambae yumi gat moa tul blong wok wetem, mo blong luksave semfala voes ia insaed long laef blong yumi. Plan blong Fasin blong Sevem Man we i stap wok raon long yumi bae i kamaot klia moa, mo bambae yumi save lukluk tufala samting ia, ol traehad mo ol samting we yumi wantem, long wan stret lukluk mo wei.

Moa impoten long hemia, paoa blong Atonmen blong Jisas Kraes bae i stat blong wok insaed long yumi. Mi, miwan, mi filim paoa we i fulap tumas blong mekem moa wok blong longfala taem long seves blong mi, blong handelem ol jalenj blong miwan wetem hop, mo blong sem ia we mi bin gat bifo, Lod i karemaot. Yumi laki tumas se God blong yumi, Hem i wan God blong sore, mo Hem i givim Pikinini blong Hem, Jisas Kraes, olsem wan sakrifaes from ol sin blong yumi. Taem mi bin sakem sin, mo stretem wanem mi wantem wetem wanem we God i wantem, mi kam wan man we i moa gud bitim man ia long en blong misin blong mi, mo mi luk se mi kasem moa janis blong givim mo askem blong blesing i go long ol pipol mo help long wok blong Lod. Rod ia, i save gohed nomo sapos mi gohed blong stap obei, be mi save luk se Atonmen blong Jisas Kraes i save givim paoa blong helpem yumi blong kam huia yumi wantem kam.

Sapos yumi no gohed blong laef folem olgeta prinsipol we yumi bin stap invaetem ol investigeta mo ol konvet blong folem long taem blong misin blong yumi, bae yumi ol man we i gat tu fes; mo yumiwan, mo trutok ia, i no stap wetem yumi. Mi stap luk se plante long olgeta pipol ia, oli holemtaet wan pikja blong mifala, olsem wan misinari insaed long hom blong olgeta, mo oli yusum hemia tu blong pusum olgeta taem oli stap fesem ol joes we oli had, bitwin raet mo rong. Hamas yumi stap lavem olgeta, oltaem bae i kamkamaot long hamas yumi stap gohed blong obei. Be sapos yumi bin mekem ol rong joes, i nomata we oli ol nogudwan, rod blong folem, i blong mifala i mas sakem sin, mo kam niu bakegen.

Nomata we mi bin gat janis blong mit wetem wan long ol konvet blong mi afta long misin blong mi, dei bae i kam, we bae mitufala i mit bakegen, wetem evri konvet blong mitufala mo wetem Lod. Sapos yumi gohed blong go fored long fet ia, bae taem ia we bae yumi mit bakegen, bae i swit, mo bae oli save harem Lod i talem long yumi: “‘!Ei, yu yu mekem wan gudfala wok! Yu yu wan gudfala man we yu lukaot gud long ol wok blong mi. From we yu bin lukaot gud long smol bisnis ia we mi putum long han blong yu, bambae mi putumap yu blong yu lukaot long plante bisnis. Yu kam joen long lafet blong mi.’” (Matiu 25:21)