Tarai Cake ni Koro Vakabai Cecere Vakayalo ka Veitaqomaki

Kemuni na taciqu kei na ganequ lomani, ni sa mai tini tiko na koniferedi oqo, au sa vakavinavinaka vua na Tamada Vakalomalagi ena vuku ni ivakasala, dina, kei na ivakatakila sa mai wasei ena itutu ni vunau oqo ena rua na siga sa oti. Eda sa mai vakavulici maivei ira na italai ni Kalou sa kacivi mera cavuta na Nona vosa tabu. Sa vakananumi keda tiko na Turaga ena ivakatakila edaidai, “Se mai na domoqu ga se … domodra na noqu tamata, sa tautauvata ga.”¹

Niu raica yani na ivavakoso oqo ni Yalododonu Edaidai ka raitayalotaki ira na lewenilotu era sarava tiko na koniferedi raraba e vuravura taucoko, au nanuma na veivasokumuni ena iVola i Momani ena nona a rairai o Jisu Karisito vei ira na Nifaiti ni oti nona mate. A vakavulici ira ena kosipeli ka vakayaloqaqataki ira, “Mo ni lako mada kina ki na nomuni veivale ka vakananuma e lomamuni na veika au sa tukuna, ka mo ni kerea vua na Tamada, ena yacaqu, mo ni kila rawa.”²

“Mo ni lako mada kina ki na nomuni veivale ka vakananuma e lomamuni” sa ikalawa e tarava me tikori ki na yalo na nodra vosa na parofita kei na iliuliu ni Lotu era cavuti ena gauna tabu oqo. Na vuvale sa kena usutu na Karisito sa koro vakabai cecere ni matanitu ni Kalou e vuravura ena siga, sa parofisaitaki tu, ni o tevoro ena “cakacaka vakaukauwa ko koya e lomadra na luve ni tamata, ka vakayavalati ira mera cudruva na ka vinaka.”³

Era sa tara na tamata na veikoro vakabai cecere ena veigauna kei vuravura me tarovi ira na meca. Vakavuqa na veikoro vakabai cecere oqori e tiko kina na vale cere nei ivakatawa—me vakataki ira na parofita—mera kailavaka mai na mataivalu ca kei na ravuravu sa yaco tiko mai.

iVakatakilakila

Thomas Rasband

Ena gauna ni painia e liu mai Utah, na tukaqu vakarua o Thomas Rasband kei na nona matavuvale a dua vei ira na isevu ni tawavanua tala mai o Peresitedi Brigham Young ki na Buca o Heber.

Ena 1859, E veivuke o Thomas ena kena tara na vanua ni veitaqomaki e Heber. E a tara tu ga ena tolo ni kau ni veivunivauvau ka ra tuvanaki veitikivi vakayadudua, me sa bai ni koro vakabai cecere. A tara na kebeni balabalavu e loma ni koro vakabai e vakayagataki kina na lalaga o ya. Sa veivakarautaki na itaratara oqo me veitaqomaki ka veimaroroi vei ira na vuvale painia oqo me sa nodra itikotiko ka qarava na Turaga.

iVakatakilakila

Pioneer fort

Sa vakakina vei keda. Na noda itikotiko sa koro vakabai cecere me vorata na butobuto kei vuravura. Ena noda itikotiko eda lako vei Karisito ena noda vulica na Nona ivakaro, ni da vulica na ivolanikalou ka masu vata, ka veivukei vakai keda meda tiko ga ena sala ni veiyalayalati. Na ivakavuvuli vou baleta na vuli ni tamata yadua kei na vuvale ena itikotiko ena lewenivuli Lako Mai, Mo Muri Au sa tuvai me “vakatitobutaka noda saumaki ka vukea meda vakataki Jisu Karisito cake.”⁴ Ni caka oqo eda sa yaco me vaka e vakatoka o Paula meda “buli vou”⁵ ena yaloda kei na lomada sa lomavata kei na Kalou. Eda sa gadreva na kaukauwa o ya meda vorata ka sabaya na ravuravu nei vunimeca.

Ni da bula voli ena yalodina sucu ena vakabauti Jisu Karisito, eda na vakila na veivakacegui ni Yalo Tabu, sa dusimaki keda ki na dina, vakauqeti keda meda bula kilikili ki na veivakalougatataki ni Turaga, ka vakadinadinataka ni bula tiko na Kalou ka sa lomani keda. E yaco kece oqo ena loma ni noda koro vakabai cecere ni noda itikotiko. Ia mo nanuma, na noda itikotiko sa kaukauwa ga mai na noda qaqaco vakayalo yadudua ena loma ni bai.

A vakavulica o Peresitedi Russell M. Nelson, “Ia ena veisiga ka lako mai, ena sega ni rawa na bula tiko vakayalo ke sega na cakacaka veituberi, veidusimaki, ka veivakacegui ni Yalo Tabu.”⁶ Ni sa nona parofita, daurairai, ka dauvakatakila ni Turaga edaidai, na ivakatawa ni noda vale cecere ni koro vakabai, na Lotu i Jisu Karisito ni Yalododonu Edaidai, sa raica rawa ni sa toso mai na meca.

Taciqu kei na ganequ, eda sa valu tiko kei Setani baleta na yalo ni tamata. Sa tuvai tu mai na ivalu mai na bula taumada. O Setani kei na dua na ikatolu ni luvena na Tamada Vakalomalagi era a vukitani mai na Nona yalayala ni bula vakacerecerei. Mai na gauna o ya, o ira na muri Setani, era sa valuti ira tiko na yalodina a digitaka na ituvatuva nei Tamada.

Sa kila tiko o Setani na nona siga ka sa voleka sara tiko mai. Me vaka ni qaseqase ka daulawaki, ia ena sega ni qaqa. Ia, na nona valuta yadua tiko na yaloda sa toso tikoga.

Me baleta noda taqomaki, meda sa tara na koro vakabai cecere vakayalo ka veitaqomaki ni yaloda, na kena me sega ni curuma rawa na tevoro.

O Setani na gata qaseqase, e curuma vakailoa na noda vakasama kei na yaloda nida vakalutuka noda isasabai, sotava na rarawa, se yali na inuinui. E marici keda ena veidabui, yalayala rawarawa, veivakacegui, se veivakacerei lekaleka ni da luluqa. E vakadonuya na dokadoka, yaloca, lawaki, cudru, kei na tawasavasava ka yaco na gauna meda rawa ni “yalovatu.”⁷ Sa rawa ni biuti keda na Yalo. “A sa vakaisina na yalodra vakaoqo ko koya na tevoro, ka tuberi ira sobu vakamaqosa ki eli.”⁸

Kena veibasai, eda dau vakila na Yalo ena kena kaukauwa sara ni da seretaka vakalagilagia na Kalou vakaoqo:

Ni da tara na koro vakabai cecere ni qaqaco vakayalo, eda rawa ni sabaya na toso mai nei vunimeca, vukitani mai vua, ka vakila na vakacegu ni Yalo. Eda rawa ni muria na ivakaraitaki ni noda Turaga na iVakabula, ni a temaki ena lekutu ka kaya, “Mo lako ki dakuqu Setani.”¹⁰ Eda na dui vulica ena veika ni bula oqo meda cakava vakacava o ya.

Na inaki dodonu vakaoqo e vakamatatataki tu ena iVola i Momani ena nona vakarautaki ira na Nifaiti o Kavetani Moronai mera valuta lesu na kai Amalikaia daulawaki, dauveivakamatei, era kocova na veiliutaki. Sa tara o Moronai na koro vakabai cecere mera taqomaki na Nifaiti ena “nodra rawa ni bula vua na Turaga na nodra Kalou, ka me rawa ni ra taqomaka na ka era vakatoka na kedra meca me nodra ivakarau ni nanuma na lotu Vakarisito.”¹¹ A “tudei ena vakabauti Karisito,” o Moronai¹² ka ra yalodina na tamata “ena muri ni ivakaro ni Kalou … ka saqati na caka ca.”¹³

Ni ra sa mai valu na Leimanaiti, era sa kurabui ena nodra sa vakavakarau tu na Nifaiti, ka ra a qai druka kina. Era a vakavinavinaka vua “na Turaga na nodra Kalou, ko ira na Nifai ni sa vakabulai ira mai na ligadra na nodra meca, ena nona kaukauwa e sega ni vakatautauvatataki rawa.”¹⁴ Era tara na koro vakabai cecere ni veitaqomaki e tautuba, ka ra tara cake nodra vakabauta na Turaga o Jisu Karisito e loma—vakatitobu e lomadra.

Na cava eso na sala meda viribaiti keda kina mai na veigauna ca me rawa ni da “liga ni cakacaka vua na Kalou me vakayacori kina na cakacaka levu oqo”?¹⁵ Meda raica ga na ivolanikalou.

Eda sa talairawarawa. A vakarota na Turaga vei Tamada Liai me talai iratou lesu na luvena ki Jerusalemi me ratou laki “vakasaqara na ivolatukutuku ka kauta mai ki ke ena lekutu.”¹⁶ A sega ni taroga o Liai; ka sega ni vakataroga na vuna se caka vakacava. Vakakina o Nifai, ka kaya ga, “Au na lako ka kitaka na ka sa vakarota na Turaga.”¹⁷

Eda cakacaka beka ena talairawarawa vakataki Nifai? Se eda sa gole tani ka taroga na ivakaro ni Kalou me vakataki rau na tukai Nifai, a yaco nodrau lailai ni vakabauta me rau gole tani kina mai vua na Turaga? Na talairawarawa, e cakacakataki ena “savasava ni yalomudou,”¹⁸ sa kerea tiko na Turaga vei keda.

Eda nuitaka na Turaga, o koya a kaya vei Josua, ni vakarau liutaki ira na Isireli ki na vanua yalataki, “Mo kaukauwa ka … qaqa; mo kakua ni rere, se yalolailai; ni sa tiko vata kei iko ko Jiova na nomu Kalou e na veiyasana kecega ko sa lako kina.”¹⁹ Sa vakabauta o Josua na vosa o ya ka vakasalataki ira na tamata, “Ni vakasavasavataki kemuni: ni na kitaka na cakacaka mana eso ko Jiova e na kemuni maliwa e na mataka.”²⁰ A wasea rua na Turaga na wai o Joritani, sa mai oti kina na nodra lako tu na Isireli me 40 na yabaki e na lekutu.

Eda sa tutaka na dina, me vakataka na parofita o Apinatai ena iVola i Momani. Ni sa vesu, ka sa tu e matana na Tui o Noa kei ira na nona bete ca, a vakavulica o Apinatai na Vunau e Tini ka vunautaka vakaukauwa ni Karisito ena “lako sobu mai vei ira na luve ni tamata, ka … sereki ira na nona tamata.”²¹ Sa qai vosa, mai vakabauta titobu ni lomana, “Oi kemuni na Kalou, ni ciqoma na yaloqu,”²² sa qai “mate ena bukawaqa” o Apinatai.²³

iVakatakilakila

Valetabu e Roma Italy

Eda sa cakava ka vakavouia na noda veiyalayalati ena noda kania na sakaramede ka sokalou e valetabu. Na sakaramede sai koya na usutu ni noda sokalou ena Siga Tabu, na vanua eda sa ciqoma kina na yalayala me “tiko ga kina kei [keda] na Yalona.”²⁴ Ena cakacakatabu vakalotu o ya eda sa yalataka meda taura na yaca i Jisu Karisito, ka muri Koya, vakaivuataka noda itavi ena cakacaka vakalou oqo me vakataki Koya. Ena valetabu, meda na “kakua ni domona na iyau vakavuravura”²⁵ ka vakila ni tiko na Turaga kei na Nona vakacegu cecere sara. Eda rawa ni raici ira matua na noda qase e liu, noda vuvale, kei na bula tawamudu ena iserau ni Tamada. E sega ni kurabuitaki nona a kaya o Peresitedi Nelson mai Roma: “Na vinaka ena vure mai na valetabu oqo e tawawili rawa na kena levu.”²⁶

E dodonu me tiko na dodonu ena veika kece eda cakava. Meda na tara cake na yaloda ni kila-ka kei na bula vakaivakarau me kakua kina ni da se baci raica tikoga na ka dodonu se na ka e cala. Meda sa taura e yaloda na ivakaro nei Pita, na iApositolo makawa ni Lotu ni a vakarota, “Dou yalomatua, dou vakatawa; sa veilakoyaki voli na nomudou meca na tevoro, me vaka na laioni sa tagi, a sa vakasaqara eso me tiloma.”²⁷

Ni da gumatuataka meda viribaiti keda, eda sa na vakataki Jisu Karisito, meda sa Nona tisaipeli dina, ka taqomaki sara ga na yaloda mai Vua.

Na nomu ivakadinadina baleti Jisu Karisito sa nomu koro vakabai cecere, na itataqomaki ni yalomu. Na gauna sa tara kina o tukaqu kei ira nona itokani painia na Heber Fort, era a vakatikora vakayadudua na tolo ni kau me yacova ni ra sa “sema vata kina”²⁸ ka ra sa taqomaki. Sa vakakina na ivakadinadina. Vakayadudua eda na rawata na ivakadinadina mai vua na Yalo Tabu ni dau vosa mai ki yaloda, ka vakavulici keda “e na tikina e loma.”²⁹ Ni da bulataka na kosipeli i Jisu Karisito, ni da ciqoma na Veisorovaki ni iVakabula ka gu ki liu ena vakabauta, sega ni rere, eda sa viribaiti mai na lawaki nei vunimeca. Na noda ivakadinadina sa semati keda ki lomalagi, ka da sa vakalougatataki ena “dina ni veika kecega.”³⁰ Me vaka ga, na koro vakabai cecere, eda sa ovici taqomaki ena liga loloma ni iVakabula.

E vakavulica o parofita Ica, “Ia ko ira yadua sa vakabauta na Kalou, era sa vakanuinui dei ki na dua na vuravura vinaka cake, io, e dua na tikina ena liga imatau ni Kalou, na inuinui oqo sa rawa ena vakabauta, ka sa dua na ikelekele ki na yalodra na tamata ka vakadeitaki ira me ra tudei sara ka tawayavalati rawa ena cakacaka vinaka kecega, ka sa tuberi ira me ra vakalagilagia kina na Kalou.”³¹

Kemuni na taciqu kei na ganequ lomani, au sa vakalougatataki kemuni mo ni gole yani ena nuidei vua na Turaga kei na Nona kosipeli. Mokoti ira era sa lutu, kei na kaukauwa ni Yalo sa tu vei iko, mo liutaki ira lesu ena loloma ki na koro vakabai cecere vakayalo e veitaqomaki. Vakasaqara “mo sa vakataki Jisu”³²ena ka kece o cakava, vorata na tevoro kei na veitemaki, meda veivutuni me vaka e veivakasalataki kina na noda parofita lomani, ka mo dina e yalomu, mo tu dodonu ka savasava, mo yalololoma ka dauloloma, ka lomana na Turaga na nomu Kalou ena yalodina ni tisaipeli dina.

Na noda ivakadinadina ni kosipeli i Jisu Karisito, noda itikotiko, noda vuvale, kei na noda lewena tiko na Lotu i Jisu Karisito ni Yalododonu Edaidai sa rawa me noda dui koro vakabai cecere ni veitaqomaki e wavokiti keda ka viribaiti keda mai na kaukauwa nei koya na tevoro. Au vakadinadinataka vakaidina na veika oqo ena yaca ni noda Turaga ka iVakabula, o Jisu Karisito, emeni.