Elder L. Todd Budge
Vakaitutu Raraba ni Vitusagavulu
Ni se cauravou lailai kina o Todd Budge, rau a vakavulici koya na nona itubutubu na sala me vakasaqara kina na loma ni Turaga. Ena nona bula taucoko, sa dau saga me taurivaka na ivakarau o ya ki na nona vakatulewa kece.
Ni oti e vica na yabaki, ni rau sa vakarautaka na veiwatini e dua na vale kei na lima na luvedrau, a vakila na veivakauqeti vakayalo me biuta na nona cakacaka ena baqe kei na veika vakailavo. Na veisau ena gadrevi kina na solibula cecere me laki vakayavutaki kina ena dua na cakacaka vou.
Ni oti e vuqa na sasaga kei na vakavakarau me veisau cakacaka, a sotava kina o Elder Budge e dua sa buta vinaka tu me soli ivakasala vua. A vakatura na tamata o ya me tiko ga o Elder Budge ena nona cakacaka ena baqe, ka kaya vua ni na vuqa na nona madigi me vakasala ka vukei ira na tamata. “Eda gadrevi ira na tamata era caka dodonu ena bisinisi,” a kaya vua na tamata o ya.
A raica o Elder Budge na veivosaki o ya me sa loloma veivueti malumu ni Turaga. “Au vakabauta ni vinakata o Koya me kila na vanua a tiko kina na yaloqu,” a kaya. “Na gauna sa kila kina na Turaga na yaloqu, a sega ni gadreva o koya na solibula, kau sa nuitaka ni na rawa me vakayagataki au ena Nona inaki ka sega ni gadrevi meu veisau cakacaka.”
Na nona cakacaka a sega ni vakatara me veivakauqeti ni ka vinaka ena vuravura ni bisinisi, ena kena dolavi mada ga na katuba me wasei na kosipeli e Japani.
A sucu o Lawrence Todd Budge enai ka 29 ni Tiseba, 1959, mai Pittsburg, California, Amerika kivei Lowell Jensen kei Deanna Price Budge. A sotavi Lori Capener ena nodrau itekivu ni yabaki e Brigham Young University. Ni oti e walu na vula nona kaulotu oti mai na Tabana ni Kaulotu e Japan Fukuoka, rau a vakamau ena Valetabu e Logan Utah. E ono na luvedrau.
Ni oti nona qeretueti mai BYU ena 1984 ena diqiri ni bejala ena veika vakailavo, a laki cakacaka o Elder Budge ki na Bain & Company Japan; Citibank, N.A.; kei na GE Capital. A yaco me peresitedi ka vakailesilesi liu ena Tokyo Star Bank Limited ena 2003, ka jeameni ni matabose ni baqe mai na 2008 ki na 2011.
Sa veiqaravi oti o Elder Budge vaka-Vitusagavulu ni iWasewase, peresitedi ni Tabana ni Kaulotu e Japani, peresitedi ni iteki, bisopi, peresitedi ni kuoramu ni italatala qase, ka peresitedi ni Cauravou ena tabanalevu.