Sei Tatou Tatalo i Tafatafa o le Malumalu

Ata

men praying at construction site

Ata na tusia e Allen Garns

Ina ua tolu tausaga o la ma atalii o Marco, na ma mafatia i se faafitauli o meaai oona. Na matuai mai lava Marco ma na ia matapogia ai. Na ma faatopetope atu o ia i le falemai ma lau ava, o Marianela. E oo atu i le taimi na matou taunuu ai, sa foliga mai ua oti o ia. Mulimuli lava, i le mavae ai pe a ma le fa itula, na ia toe ala ai.

Mai i lena taimi, na aafia ai Marco i ni mailili mai i lea taimi i lea taimi mo le isi lima tausaga. Pe a ma tuu atu o ia i le moega i afiafi taitasi, ma te mafaufau pe afai e oo i le tuneva o le po, pe o le a ma toe faavavevave atua o ia i le falemai. Sa faigata ona ma maua se moe i na vaitausaga faigata, ae na ma faalagolago i le tatalo, faatuatua, anapogi, ma faamanuiaga o le perisitua.

Ina ua pe a ma le ono tausaga o Marco, na valaau mai ai Marianela ia te au i le galuega ma tau mai ia te au e faatopetope atu i le falemai. Na oso le mailili o Marco ma ma ua i ai nei o ia i se koma. Ina ua valaau mai o ia, sa ou galue i le faafouina o le Fale Autu mo le Aoaoina o Faifeautalai o Atenitina, e sosoo ma le Malumalu o Buenos Aires, Atenitina.

Ae ou te lei tuua mo le falemai, na fai mai se uo i le galuega, “Talu ai o loo tatou latalata lava i le maota o le Alii, aisea tatou te le tatalo faatasi ai muamua?” Sa tapunia le malumalu mo le faafouina ma le toe faateleina, ae na matou agai atu i le maota o le Alii, lea na ou tatalo ai mo Marco.

E ui lava i mea uma na matou oo i ai e ala atu ia Marco, na ou lagonaina le faafetai i le Atua mo le taimi na mafai ona ma maua ma Marianela e faatasi ai ma ia. Ao ou tatalo, na ou tau atu i le Tama Faalelagi na ma taumafai ia avea ma ni matua lelei ma tausia lelei Marco i le mea sili na ma mafaia. Na ou tau atu foi ia te Ia o le a ma taliaina Lona finagalo pe afai Na te valaauina Marco e foi atu i le aiga.

Ina ua ou taunuu i le falemai, ou te lei iloaina pe toe teʻi mai Marco i le koma pe, afai ae teʻi mai o ia, pe o le a mafai ona toe savali pe tautala foi. Ina ua mavae ni itula faigata tele se lua, na ia ala mai. Sa vaivai o ia, ae na lelei lava o ia. Mai i lena taimi, na faavavega lava, ona ia faasolo manuia. Na iu lava, ina aveese Marco mai ana vailaau ma tea i tua ua malosi mai le falemai.

Ma te toe tepa i tua ma Marianela i lena taimi faigata ma le agaga faafetai o loo i ai pea Marco ia i maua ma faafetai mo mea na ma aoaoina. O la ma tofotofoga na faalototasi ai i maua ma faamalosia ai i maua faaleagaga. E aunoa ma lena mea, semanu ma te le iloaina le tele o auala e faaalia ai e le Alii Lona aao i o ma olaga.

E pei ona fai mai ai Marianela, “Na ma vaaia se mauga o faamaoniga ma aafiaga na tuuina mai ia i maua se molimau o le auai o le Atua, o loo i ai o Ia ia i tatou ma e faafofoga mai o Ia ia i tatou.” Afai tatou te tumau ma maua le onosai, e mafai ona oo mai faamanuiaga i le taimi tatou te lei faamoemoeina ai.