Aisea Na Le Lapataiina Ai Au E Le Atua?

Ata

woman gathering loose papers

Ata na tusia e Tim Zeltner

Sa ma nonofo ma lau tane i fale o le aoga i le Texas State Technical Institute ao fa ma le lua tausaga o le ma fanau matutua. O le ma taimi muamua lea i le atunuu mauga o Texas, ma sa ou fiafia i ai! O taimi uma lava o le tautotogo, e faatumulia ai Texas tutotonu i fugalaau. I togalaau, togavao, laufanua valevalenoa, i autafa o auala, soo se mea lava ou te vaai i ai e i ai lava le tele o fugalaau e vaai i ai.

Ou te aveina lau fanau e tietie i le taavale pepe e toeitiiti lava o aso uma. Matou te mauaina lava ni nofoaga fou e matamata ai, ma ou te tuuina i tamaiti e tauina mai le tele o fugalaau vao la te mananao ai. Faatoa uma le matou tietiega i le tuaoi lea e tele ai fale ma togalaau e matagofie le teuina.

I se tasi aso na matou oo mai ai i se pioga ma maua ai se faaputuga pepa ua salalau solo i se tasi o togalaau teufale. Na vave lava ona faasalalau e le matagi pepa i le fanua atoa lava. Na ou filifili e faamama le lapisi ae lei faateleina le salalau. Na ou aoina mai i ou lima ua tutumu i pepa ma momono i lau ato napekini.

A o ou tilotilo atu i lalo, sa ou iloaina ai sa ou uuina ni ata mataga. I le faateia tele, na ou tau atu i lau fanau ia nonofo i le taavale pepe ao ou ao faatopetopeina mai pepa o totoe. Na ou le fiafia ao ou vaai atu i ni ata o mea ou te lei manao lava e vaai i ai. I lou loto, na amata ona ou faitio, “Aisea e lei lapataiina ai au e le Atua e ui i le isi ala i le fale?”

Ona ou faalogoina lea o le ii e le mafai ona sese o taofi o le pasi aoga. Pe a ma se tasene o tamaiti na feosofi ese mai le pasi. Na latou ui uma atu lava i le fanua lea na faatumulia i ata mataga i ni nai minute talu ai.

I lena lava taimi, sa suia atoa ai lou manatu. Ua ou iloa nei pe aisea e lei lapataia ai au e ui i le isi ala. Sa ou faafetai na ou i ai iina e ao mai nei itulau ina ia faasao ai na tamaiti mai le vaai i na ata mataga. Ao ou agai atu i le fale, na ou mafaufau, “Ae faapefea pe ana tuai mai le pasi aoga? Ae faapefea pe ana ou le iloaina lava pe aisea na ou oo ai i lena mea? O le a le umi semanu o le a ou ita ai i le Atua?”

Talu mai lena aso, o le avanoa na tuuina mai e le Alii ia te au e vaai ai i le “aisea” o lena aafiaga na fesoasoani ia te au e talitonuina ai Lona atamai ma faamoemoega e sili atu nai lo au.

O nisi taimi o le a ou iloaina pe aisea na tupu ai se mea; o isi taimi o le a ou le iloaina ai. Ae po o le a lava, ou te iloa e tatau ona i ai lou faatuatua faapea o loo i le Alii se faamoemoega e tele atu lena e le mafai ona ou vaaia i taimi uma lava.