O Le Pogai Ou Te Faafetai Ai mo Lo’u Tino ina Ua Mavae Lo’u Maitaga

Pe na e tilotilo ea ia te oe lava ma faapea: “Oka! Ai lava so’u aulelei pe ana …”? Pe na e faatusatusaina ea oe lava i isi teineiti uma i luga o faasalalauga faaagafesootai? Sa ou faia. O a’u lena i tausaga uma o lo’u talavou ma ae ou te le’i faaipoipo ma sosoo ai ma le maitaga. E tusa lava pe fai mai lo’u toalua o loo lelei atoatoa o’u foliga vaaia, ae sa ou mafaufau i taimi uma, “maimau pe ana faapea ma faapea …,” semanu ua lelei o’u foliga ma o’u faalogona. Ae o le mea moni lava, mata e mafai e na “maimau pe ana” ona aumaia ni lagona lelei i se tasi o i tatou? I lo’u tulaga, ou te iloa o le lusi o o’u pauna ua na’o le amataga lea, ona ou maua lea o se isi mea e “faaleleia” o lo’u tino ma alu ai lava faapena le taamilosaga.

Ina ua ou maitaga, sa ou fiafia i le i ai o se manava lapoa ma lapotopoto! O le taimi lena na ou iloa ai, ua ou atoatoa i o’u lava tulaga—i tatou uma lava! Sa ou faatupuina se tagata ola laitiiti, ma e i ai ea se isi mea e sili atu nai lo o lena? Se’i o’u ta’u atu ia te outou, e i ai! Ma o lena mea o le sapasapaia o la’u pepe i o’u lima.

O la’u pepe teine o Sofia, na faatoa fanau i se taimi e le’i mamao atu. Sa ou fuafuaina ma moemiti i taimi uma i se faafanauga faalenatura, e leai ni vailaau faafomai ma le vave ona toe malosi. Ae peitai, sa i ai ni nai faaletonu i le taimi na [ou] faatiga ai, ma iu ai ina manaomia ona faia se taotoga e faafanau mai ai pepe. O le mea moni lava, sa ou fefe ou te taoto mo a’u ma la’u tama teine. Sa ou fefe foi i le i ai o se maila.

Ina ua uma le taotoga, sa umi se taimi na toe tau faamalosi ai lo’u tino. I le aluga o nei vaiaso ma masina, sa tau le tele ni gaoioiga faaletino na mafai ona ou faia, ae na pau le mea na ou manao i ai o le faamalositino ma toe foi i lo’u fuaitino sa i ai ae ou te le’i maitaga. Ona oo lea i se tasi o aso, ina ua faatoa tau i ai lo’u mafaufau—ua le o toe tutusa lo’u tino ma le mea sa i ai muamua ao le’i fanau mai la’u tama teine, ma e faapena foi ia te a’u. Ma o le a le toe tutusa lo’u tino po o a’u foi ma le taimi a o le’i oo mai Sofia i lo’u olaga. Ma ou te faafetai ai mo lena mea.

Ua faapea ona ou fiafia i le aliali o uaua ma le maila lea na tuua e lo’u maitaga, ona o taimi uma ou te tilotilo ai i ai, latou te faamanatu mai ia te a’u se malaga ofoofogia na ou uia. O na faailoga laiti ua na’o ni nai faamanatu matagofie o le afafine lalelei o le Tama Faalelagi ua ia faatuatuaina ai a’u. O nei faailoga i luga o lo’u tino ua faatumulia ai a’u i le agaga faafetai, e le mo na’o la’u tama teine, ae mo lo’u tino ona o le mafai ona faia o mea ofoofogia e pei o le foafoa, tauave, ma fanauina se tagata soifua. O o’u maila e faamanatu mai ai ia te a’u e oo lava i o tatou taimi sili ona pogisa po o taimi ua le ogatasi ai fuafuaga, e faatasi pea le Faaola ma i tatou. Pe a tatou fefefe pe tiga, e i ai o Ia iina, ma Na te silafia le mea e sili mo i tatou.

Mo le toatele o tina o loo i ai, mafaufau i ai: sa e uia se malaga tiga ae suia ai olaga e aumai ai fanau a le Tama Faalelagi i le lalolagi—o au fanau! O se aafiaga mataina ma le faalotomaualaloina o le mafai lea ona faia se vaega tele i le fuafuaga o le fiafia!

Afai o faafaigata ia te oe ona e talia ma alofa ia te oe lava, e mafai ona e tatalo mo se fesoasoani. E finagalo le Alii ia tatou fiafia, ma o le alolofa ia i tatou lava e taua lea i le ausiaina o lena fiafia. O le a fesoasoani i taimi uma le Atua ia i tatou i mea laiti, ma mea e tau le laiti foi—e Na te silafia mea e taua ia i tatou. Afai e te tatalo ia iloa le ala e alofa ma talia ai oe lava, o le a Ia faaali atu ia te oe le ala e fai ai.