Olo ma Faigauo

Ata

Forts and Friendship

“Ta o e aumai nisi laau!” Sa fai atu ai Callie ia Marco.

Sa tilotilo Marco i le lagi. “Ua tatau ona ou alu i le fale. Ua toetoe lava a goto le la.”

“Ae e le’i uma na fausia le ta olo!” o le tala lea a Callie.

“Faamalie atu!” Sa valaau atu ai Marco a’o topetope atu i le fale. “E tatau ona ou oo i le fale ao le’i amata le Sapati!”

Sa mapuea Callie. Sa i ai mea maoae i le avea ai ma uo a Marco, ma sa i ai mea faigata. Ia, o le tele lava na o le tasi le mea faigata. E lei tele se taimi la te taaalo faatasi ai. Sa tutusa la vasega i le aoga ae le o le potu lava e tasi. E le’i tutusa le la taimi malolo. Ma le isi, na la faʻaaluina uma le Sapati ma o la aiga. I le lotu a Marco, na amata le Sapati i le goto o le la i le po o le Aso Faraile. Mo Callie, o le Sapati o le Aso Sa.

Ma o mea lelei? Sa tele mea lelei. O le tasi o Callie e le popole lava o le a palauvale Marco, taumafai e faaoso o ia e faia mea leaga, pe matamata i mea e le lelei. Sa latou o atu ma lona aiga i se lotu ese, ae sa latou talitonu i le tele o mea tutusa na faia e Callie. E pei o le tausia o le aso Sapati ia paia, e ui lava na eseese aso.

Na tuu e Callie lana faaputuga fasi laau ma alu i totonu.

“Ua alu Marco i le fale?” O le fesili lea a tina.

“Ioe,” na fai atu ai Callie ao nofo i lalo i se nofoa. “Ua seasea ma taaalo.”

“Leiloa pe mafai ona lua tafafao faatasi i le Aso Faraile. “O se aso malolo mai le aoga,” o le tala lea a Tina.

“Ua lelei,” sa fai atu ai Callie, ma foliga fiafia. O le a ia saunia mea uma pe a oʻo mai Marco, e mafai ona la amata ona galulue i luga o le la olo i le taimi lava lena.

I le taimi o le aoga mulimuli ane i lena vaiaso, na faia ai e le faiaoga a Callie se faasilasilaga. O le vasega tolu atoa o le a matamata faatasi i se tifaga.

“Ioe!” O le tala lea a Callie. Sa ia tuu lana pusa o loo i ai lana meaai o le aoauli i totonu o lana ato faafafa ma alu i le nofoaga masani i le va o potuaoga.

Sa maua e tagata uma se nofoaga e nonofo ai i luga o le fola, ma na tape e faiaoga ia moli. Na fiafia lava Callie ao amata le tifaga. E uiga i nisi tamaiti o loʻo fausia faatasi se ‘olo, e pei lava o ia fausiaina se olo ma Marco! Pe a uma ona ma fausia, sa mafaufau ai o ia. Sa lulu lona ulu ma toe autilo i luga i le ata.

Ae ao alu le tifaga, na matauina e Callie o nisi o upu o i ai e le lelei tele. Sa amata ona ia lagonaina le faateleina pea lava pea o le le toafilemu. Sa ia le iloa po o le a le mea a fai.

Na faafuasei ona ia faalogoina se popo i lona tauau. O Marco! Sa tolotolo mai o ia i le va o le toatele o tamaiti aoga e talanoa ia te ia.

“Callie, ou te le manatu e tatau ona ta matamata i lenei mea,” o lana musumusu atu lea. “Ou te manatu e tatau ona ta o atu e fesili io ta faiaoga pe mafai ona ta faitauina ni tusi.”

Na mapuea Callie. Sa manaia le lagona o le iloaina sa i ai se isi e tutusa lagona pei o ia. “Ioe. Ou te le fiafia foi i le tifaga lea.”

Sa la tutu i luga ma Marco ma laalaa filemu faataamilo ia la uo aoga seia oo ina la taunuu atu io la faiaoga. Na alu Marco i lana faiaoga, ae alu Callie i lana faiaoga. Sa ia fesili pe mafai ona ia faitauina se tusi nai lo le matamata i le tifaga, ma na fai mai lana faiaoga ioe.

A o alu atu Callie i lona potuaoga e faitau, na ia vaaia Marco o faia foi le mea e tasi. Sa ia talotalo ma ataata. Sa ataata atu foi Callie. O le i ai o se uo moni e sili atu nai lo se olo ua maea.