Faʻaaloalo i le Meaalofa o o Tatou Tino

Ata

Your Body Is Like a Temple

O le manuia moni i lenei olaga, e maua mai i le faapaiaina o o tatou olaga—o lona uiga, o o tatou taimi ma filifiliga—i faamoemoega o le Atua (tagai Ioane 17:1, 4; Mataupu Faavae ma Feagaiga 19:19). I le faia o lena mea, tatou te faatagaina ai o Ia e siitia i tatou i lo tatou taunuuga e aupito sili ona maualuga.

O se olaga ua faapaiaina e faaaloalo i le meaalofa e lē mafaatusalia o le tino faaletino o se tagata, o se foafoaga paia i le faatusa lava o le Atua. O se faamoemoega tutotonu o le olaga faaletino, o agaga taitasi e tatau ona maua se tino faaletino ma aoao e faaaoga le filifiliga saoloto e avea o se tagata e itulua o le tino ma le agaga. O se tino faaletino e taua foi mo le faaeaga lea ua na o le tuufaatasiga atoatoa lava o le faaletino ma le faaleagaga e oo mai ai, e pei ona tatou vaaia i lo tatou Alii pele, ua toetu. I lenei lalolagi agasala, o nisi o le a itiiti sina taimi e tiga ai i le olaga; o nisi tino o le a lē atoatoa, gauia, pe itiiti se avanoa e ola ai; ae o le a lava le umi o le olaga mo agaga taitasi, ma o le a agavaa tino taitasi mo le toetutu.

O i latou e talitonu o o tatou tino e le mai se isi mea nai lo le taunuuga o tupuaga mai meaola, o le a lē lagonaina e tatau ona tali atu i le Atua po o soo se tasi lava mo mea latou te faia i o latou tino. O i tatou o loʻo i ai se vaaiga e faʻavavau, e ui i lea, e tatau ona faʻaalia o loo i ai so tatou tiute i le Atua e tusa ai ma le auala tatou te tausia ai o tatou tino. I upu a Paulo e faapea:

“Tou te le iloa ea, o lo outou tino o le malumalu lea o le Agaga Paia ua i totonu ia te outou, o loo ua ia te outou mai le Atua, e le aia foi outou ia te outou?

“Aua ua faatauina outou i le tau: o lenei, ia outou vivii atu i le Atua i o outou tino, ma o outou agaga, o mea a le Atua ia” (1 Korinito 6:19–20).

I le amanaiaina o nei upumoni ma le taitaiga a perofeta o aso nei, o le a mautinoa lava o le a tatou le faaleagaina ai o tatou tino, i ni pe’a; po o le faavaivaiina, i fualaau faasaina; pe faaleagaina, i le faitaaga po o le le tauagafau. Ona o lo tatou tino o le meafaigaluega a lo tatou agaga, e taua lo tatou tausia i le ala sili tatou te mafaia. E ao ina tatou faapaiaina ona mana e auauna atu ai ma faalautele le galuega a Keriso. Na saunoa Paulo, “O lenei, le au uso e, ou te aioi atu ia te outou, ona o le alofa mutimutivale o le Atua, ia outou tuuina atu o outou tino i le Atua, o le taulaga ola, ma le paia, ma le malie, e taliaina i luma o le Atua” (Roma 12:1).