Mai i se Faalavelave i se Faigauo
Ata na tusia e Allen Garns
I se tasi Aso Sa a o faia le sauniga faamanatuga, sa ou lagonaina ai se mea sa faalavelavea ai a’u. Ou te le iloaina po o le a, ae sa le mafai ona alu ese le lagona. Sa ou vaavaai ma le le mautonu i le uati ma manao ia uma ia le sauniga. O se mea ou te le masani ai.
Ina ua uma le tatalo faaiu, sa iai pea lea lagona. Sa ou vaavaai faavave solo i le falesa ma ou iloa ai se tamaloa o loo uu lona fatafata. Sa ou alu atu ia te ia, ma sa ia talosaga mai pe mafai ona ou aveina o ia i le fale o le nofoaafi. Sa ou fai atu ia te ia e nai lo lena e tatau ona ou aveina o ia i le potu o faalavelave faafuasei. Sa ia fai mai sa iai lana fualaau i le fale e mafai ona fesoasoani ia te ia. Sa ou fai atu o le a ou aveina o ia i le fale aua o le alu i le nofoaafi i le tulaga o i ai o ia e le o se tulaga saogalemu.
Sa ou fesoasoani ia te ia i la’u taavale ma ou toe fesili atu pe tatau ona ave o ia i le fomai. Sa fai mai o ia e le manaomia lena tulaga ae e mafai ona ou alu atu i lona fale. Sa ou tatalo lemu, ma talosaga atu i lo’u Tama i le Lagi e fesoasoani ia te ia ina ia lelei mea uma ma fesoasoani mai ia te a’u e ave saogalemu o ia i le fale. Sa ou aveina le taavale ma le faaeteete, tatala faamalama o le taavale, ma taumafai e faafilemu ia te ia. Ina ua mavae sina taimi, sa taoto o ia agai i tua i lona nofoa ma amata lemu ona to’a.
Ina ua ma taunuu atu i lona fale, sa ia valaaulia au i totonu. Sa ou fiafia aua sa ou manao e faamautinoa sa ia maua lana fualaau ma sa aogā. Sa inu lana fualaau ma amata ai ona lelei lana faalogo. Fai mai o ia sa tiga pea lona fatafata ae ua lagona e ia le saogalemu i le fale.
Sa ia valaaulia a’u ou te nofo mo le taumafataga o le afiafi, ma talu mai lena aoauli, ua avea lava i maua o ni uo lelei. E masani ona ma o e tafafao faatasi ma fesoasoani le tasi i le isi. I luma atu o lenei aafiaga, sa tele ni a’u uo e le o ni uunaiga lelei ia te a’u. Ae o le ma faigauo ma lenei alii ua faamanuiaina ai lo’u olaga.
O nisi taimi mai se faalavelave faafuasei, e tulai mai ai se faigauo maoae. Pe ana faapea sa na ona ou tuuina lava o ia i le nofoaafi, ou te tuufesili pe faamata e oo saogalemu o ia i le fale. Semanu ou te le mafai ona ou faamagaloina a’u lava pe ana faapea e iai se mea e tupu ia te ia. Ou te faafetai i lo’u Tama i le Lagi sa taitaiina a’u e le Agaga Paia i lenei mea ma, i le faagasologa o le mea na tupu, sa mafai ona ou maua ai se uo moni ma pele!