Ua Faamagalo Atu E Le Purinisese Lage
Ua manao Katia e fai se tala faatino, ae o loo taumafai Sonia e puleaina!
“O lenei, ia mutimuti vale lo outou alofa, pei ona alofa mutimuti vale o lo outou Tama” (Luka 6:36).
Sa sii e Katia se pusa lapoa a o savali atu o ia i fafo o lona fale i le la susulu. O le taimi o le taumafanafana, ma e mo ni nai masina, sa mafanafana le tau i lona aai i Rusia. Sa tuu e ia i lalo le pusa i luga o se nofoa lea o loo faatalitali mai ai ana uo o Tima ma Sonia.
“Lea ua ii uma mea tatou te manaomia mo la tatou tala faatino!” fai mai ai Katia. Sa ia tatalaina le pusa ma toso mai i fafo se pale uga ma ni fasi ie lanu viole, lanu moana ma le lanu mumu. Faatasi ma sina fatufatua’i, o nei mea o le a maua ai se ofu maoae.
“O le a le tala lea laa tatou faia?” O le fesili lea a Tima.
Sa ataata Katia. “Ou te manatu e tatau ona ta faia ‘Le Purinisese Lage’!” O le tala lea e sili ona fiafia i ai. Sa ataata Katia a o ia vaai faalemafaufau ia te ia o avea ma Vasilisa aulelei.
Sa toso mai e Sonia le ie lanumoana mai le pusa ma taai ia te ia. “Ou te manao e fai a’u ma Vasilisa!” o lana tala lea.
“Faatali!” sa fai atu ai Katia. “O la’u aitia. O lona uiga e tatau na fai a’u ma Vasilisa.”
“E mafai ona avea oe ma Vasilisa,” sa fai atu ai Sonia. Ona ata lea o ia. “I le taimi lea e avea o ia ma lage!”
Sa faauu Katia ma toso ese le ie lanu moana mai ia Sonia. “Ae o la’u tala!”
Sa tuu e Sonia ona lima i ona puimanava. “E leai se isi e fia taalo ma oe pe afai e te fia posi. E sili atu oe o se lage nai lo o se purinisese.”
Sa lagona e Katia loimata i ona mata. Sa ia sii vave lana pusa ma tamoe i totonu, e oo lava i luga o le fasitepu i le fale mautotogi a lona aiga. Sa matuā togi e ia le tapuni o le faitotoa i ona tua.
“O le a se mea ua tupu?” O le tala lea a Mama. Na maligi loimata o Katia.
“Ua faaleaga uma e Sonia mea uma!” Sa faamatala e Katia le tala atoa ia Mama. “Na fai mai o ia o a’u o se lage!”
“Oi, Katiusa,” na fai atu ai Mama. O Katiusa o le igoa tauvalaau lea a Mama mo Katia. “Ou te faamalie atu. E le manaia lena mea ia ia.”
I le taimi lava lena ae tu’itu’i mai loa le faitotoa. Sa alu Mama e tali le tu’itu’i, ae tamoe Katia i lona potu. Sa lagona e ia leo, ona valaau atu lea o Mama ia te ia. “E te fia talanoa ia Sonia? E i ai lana tala e fia faiatu ia te oe.”
“Leai!” Sa ‘e’ē Katia.
Sa ia toe lagona atu leo, ona ia faalogo atu lea ua tapuni le faitotoa.
“Ou te manatu ua faanoanoa ia Sonia,” fai mai ai Mama.
“Ou te le kea,” o le tala lea a Katia. Sa matuā uunai tele e ia ona foliga i lona aluga.
Sa tu Mama i le faitotoa mo se minute. “E te iloa, o nisi taimi pe a ou matua’i ita lava, ou te le manao e faamagalo isi tagata. O isi taimi e manaomia ona ou tatalo i le Tamā Faalelagi e fesoasoani mai ia te a’u ia ou manao ou te faamagalo atu. Ona savali ese lea o ia.
Sa ita tele Katia e faamagalo atu. Sa faatigā e Sonia ona lagona! Ae … o le ita e le o se lagona lelei foi.
Sa ia mapuea ma tootuli i autafa o lona moega. Sa iloa e Katia e finagalo Tamā Faalelagi ia ia faamagalo atu Sonia. O le mea sao lea e fai. Ae atonu e finagalo Tamā Faalelagi ia Katia e faamagalo atu auā o le a fesoasoani ai ia Katia e lelei atu foi ōna faalogona.
“Tama Faalelagi, faamolemole fesoasoani mai ia te a’u e faamagalo Sonia,” o lana tala lea. “Ou te le manao moi lava i ai, ae ou te le manao foi ou te ita pea.”
Sa uma lana tatalo ma mānava tele lava. Sa faalogo atu Katia ua amata ona liusuavai ese atu lona ita, laitiiti lava. E mafai ona ia faia le mea lea. E mafai ona ia faamagalo atu. Sa savali o ia i le fale mautotogi o Sonia ma tu’itu’i le faitotoa.
Sa tatala e Sonia le faitotoa ma amata loa lava ona tautala. “Katia, ou te faatoese atu i le tala na ou faia.”
“Ua ou faamagaloina oe,” sa fai atu ai Katia. “Ou te faatoese atu foi sa ou toe aveina uma lava ofu o le tala. E mafai foi ona avea oe ma Vasilia. E mafai ona ta feauauai.”
Sa ataata Sonia. “Ua lelei. “E mafai ona ta o ta te faataitai i le taimi lenei? O le a ou alu e aumai Tima!”
Sa ataata atu foi Katia. “O le a ou aumaia ofu o le tala!”