“ʻE founga fēfē haʻaku maʻu ha ngaahi kaungāmeʻa ʻoku lelei ʻenau tuʻunga moʻuí?”

Fakahā ʻa e ʻofá peá ke angaʻofa. Fakahaaʻi ʻokú ke tokanga kiate kinautolu mo ʻenau fiefiá. Kapau ʻoku ʻikai ke nau fakahaaʻi ʻenau tokanga kiate koé pea ʻikai ke nau angaʻofa, mahalo he ʻikai fie maʻu ke hoko atu e fakakaungāmeʻa ko iá.

Hoko ko ha faʻifaʻitakiʻanga ʻo e moʻui ʻaki hoʻo ngaahi tuʻunga moʻuí. Pea kapau ʻoku ʻi ai haʻo ngaahi kaungāmeʻa ʻoku ʻikai ke nau maʻu ʻa e tuʻunga moʻui tatau, fakahaaʻi kiate kinautolu ʻoku nau makehe ʻi he ʻao ʻo e ʻOtuá. Naʻe ʻofa ʻa Sīsū ʻi he tokotaha kotoa pē peá Ne akoʻi ke nau muimui ʻi Hono halá.

Te ke lava ʻo maʻu ha ngaahi kaungāmeʻa foʻou ʻoku ʻi ai haʻanau tuʻunga moʻui ʻoku leleí ʻi haʻo akoʻi fakataha mo e ongo faifekaú. ʻOkú na ʻiloʻi ha toʻu tupu tokolahi ʻoku nau fie maʻu ha kaungāmeʻa ʻi he Siasí.

ʻOku ou faʻa lotua maʻu pē ke u ʻiloʻi pe ko hoku ngaahi kaungāmeʻá ko e kakai totonu ia te nau tokoniʻi au ke u hiki hake ʻeku tuʻunga moʻuí mo e fakamoʻoni kia Sīsū Kalaisí.

Kuó u ʻiloʻi kapau te u feinga mālohi ke fekumi ki he kakai ʻoku nau fakahaaʻi ʻa e maama ʻo Kalaisí, ko ha faikehekehe lahi ia. ʻOku ʻafioʻi ʻe he Tamai Hēvaní ho lotó pea kapau te ke fai hoʻo tafaʻakí, te Ne tali atu leva e ngaahi lotu ko iá.