Tutaka Tiko na Noda Yalayala kei na Veiyalayalati

Kemuni na taciqu kei na ganequ, ni da tinia tiko na soqoni oqo, meda sa qai dui umana e yaloda na ivakadinadina vakasucumi nikua na dina ni kosipeli i Jisu Karisito. Eda sa kalougata ena noda soqo tabu vata oqo me vaqaqacotaki noda yalayala vua na Turaga o Jisu Karisito ni da sa Nona italai ka sa noda iVakabula o Koya.

Au vakasamataka vakatitobu na bibi ni kena vakayacori ka maroroi na yalayala kei na veiyalayalati. E bibi vakacava vei iko mo maroroya nomu vosa? mo nuitaki tiko? mo cakava na ka iko kaya mo cakava? mo saga mo doka nomu veiyalayalati tabu? mo yalodina tiko? Ena noda bula dinata na noda yalayala vua na Turaga kei ira eso, eda lako ena salatu lesu vei Tamada Vakalomalagi ka vakila Nona loloma ena noda bula.

Na noda iVakabula o Jisu Karisito sa noda ivakaraitaki cecere ni da cakava ka maroroya noda yalayala kei na veiyalayalati. A lako mai ki vuravura ni yalataka me cakava na lomai Tamana. A vakavulica na ivakavuvuli ni kosipeli ena vosa kei na cakacakataka. A sorovaka na noda ivalavala ca meda bula tale kina. E dinata na Nona yalayala ki na tamata yadua.

E rawa beka ni tukuni oqo vei keda yadua? E rerevaki vakacava ke da lawaki vakalailai, muatani vakalailai, se sega soti ni lakomuria tiko noda yalayala? Ena vakacava beka ke da lako tani mai na noda veiyalayalati? Era na “lako mai vei Karisito” eso vuku ni noda ivakaraitaki? Sa vauci iko beka nomu vosa? Na maroroi ni yalayala e sega ni ivakarairai; ia e dua na itovo tudei ni tisaipeli i Jisu Karisito.

Ni sa dau nanuma noda malumalumu ena bula oqo sa yalataka kina na Turaga, “O koya mo dou marau kina, ka kakua ni rere, niu sa tiko vata kei kemudou koi Au na Turaga, kau na tu e yasamudou.”¹ Au sa vakilai Koya niu gadreva na veivakadeitaki, na vakacegu, rarama vakayalo cecere se kaukauwa, kau sa yalomalumalumu sara kau vakavinavinakataka na Nona veitokani vakalou.

E kaya na Turaga: “Ena qai yaco, ni ko ira na yalo kecega era na biuta laivi na nodra ivalavala ca ka lako mai vei au, ka masuta na yacaqu, ka talairawarawa ki na domoqu, ka muria na noqu ivakaro, ena raica na mataqu ka kila ni sai au.”² Oqo na Nona yalayala cecere.

Au a vulica na bibi meu tudei tiko ena noqu vosa niu se cauravou. Dua na ivakaraitaki ena noqu a tucake meu cavuta na Bubului ni Sikauti. Na neimami soqosoqo vata kei na Sikauti Cauravou kei Amerika, sa mai cava, e dau isolisoli bibi tiko vei au kei na Lotu. Ki na isoqosoqo ni Sikauti, ki na vuqa na tagane kei na yalewa era a veiqaravi vagumatua vakailiuliu ni Sikauti, kivei ira na tina—era sa vakacaucautaki kina—kei ira na cauravou era a vakaitavi ena Sikauti, eda kaya, “Vinaka vakalevu.”

Ena soqoni oqo, na noda parofita lomani, o Peresitedi Nelson, kei Elder Quentin L. Cook rau sa mai vakaraitaka na veisau e vakanamata vei ira noda itabagone ka tudonutaki noda ituvatuva ena dina vakatakilai mai. Me ikuri, ena Sigatabu sa oti, a vakamacalataka o Peresitedi Nelson kei Peresitedi Ballard na parokaramu vou ni Gonelalai kei na iTabagone ni Lotu i Jisu Karisito ni Yalododonu Edaidai ena Lotu raraba. Oqo e dua na parokaramu e vuravura raraba me raicimatua ki na noda Turaga ka iVakabula, o Jisu Karisito. Na Mataveiliutaki Taumada kei na Kuoramu ni iApositolo Le Tinikarua sa duabau ena ituvatuva vou oqo, kau sa vakadinadinataka ni Turaga sa dusimaki keda tiko ena veikalawa yadua. Au marautaki ira na gonelalai kei na itabagone ni Lotu ni ra na sotava na raivata veisemati oqo kivei ira e vale kei na loma ni lotu—ena vulici ni kosipeli, veiqaravi kei na itaviqaravi, kei na torocake yadua.

Na itoko ni itabagone ni yabaki mai oqo, 2020, e tukuna tiko na yalayala vakasakiti nei Nifai “lako ka kitaka.”3 A vola, “Ka sa yaco ni’u sa kaya vei tamaqu, koi au, ko Nifai: Au na lako ka kitaka na ka sa vakarota na Turaga, ni’u kila ni sega ni dau soli ivakaro na Turaga vei ira na luve ni tamata vakavo kevaka e sa vakarautaka rawa mada na sala me ra rawata kina na ka sa vakarota vei ira ko koya.”³ Dina ga ni a cavuti makawa sara, oi keda ena Lotu sa tutaka tiko na yalayala oqo nikua.

Na “lako ka kitaka” sai koya noda uasivita na sala vakavuravura, ciqoma ka cakava na ivakatakila yadua, bula dodonu ena inuinui kei na vakabauta na veisiga ni mataka, cakava ka maroroya na veiyalayalati ni muri Jisu Karisito, sa yaco meda lomani Koya vakalevu kina na iVakabula kei vuravura.

Na veiyalayalati e rua na sala ni yalayala vei keda kei na Turaga. Oi keda na lewe ni Lotu eda sa veiyalayalati ena papitaiso meda taura na yaca i Jisu Karisito, me da bula vakataki Koya. Me vakataki ira a papitaiso ena wai o Momani, eda veiyalayalati meda Nona tamata, “colata vata na nomudou icolacola, me mamada kina; … rarawa vata kei ira sa rarawa; … vakacegui ira sa gadreva na veivakacegui, ka mo dou tu ka vakadinadinataka na Kalou ena veigauna kecega, kei na veika kecega, kei na veivanua kecega.”⁴ Na noda veiqaravi kivei keda yadua ena Lotu e vakaraitaka tiko noda veidinadinati meda rokova na yalayala oqori.

Ni da sa votai ena sakaramede, eda sa vakavouia na veiyalayalati o ya meda taura na yacana ka cakava tale na yalayala meda torocake. Na noda vakasama kei na itovo e veisiga, ka levu se lalai, e tukuna tiko noda yalayala Vua. Na Nona yalayala tabu me idole o ya “Ia kevaka dou na daunanumi au tiko ga, ena tikoga kei kemudou na Yaloqu.”⁵

Na noqu taro nikua, eda sa tutaka tiko noda yalayala kei na veiyalayalati, se era sa yalataki tiko vakaveimama, vakawaleni tu ga ka rawarawa me voroki? Ni da kaya oqo vua e dua, “Au na masulaki iko,” eda cakava beka? Ni da yalayala, “Au na laki veivukei yani,” eda lako beka? Ni da sa yalataki keda meda sauma na dinau, eda sauma beka? Ni da laveliga meda tokona e dua na lewenilotu ena veikacivi vou, o ya meda tokoni koya, eda cakava beka?

Dua na yakavi niu se cauravou a dabe tikivi au o tinaqu ena nona yasani loga ka vosa vakamalua baleta na bibi ni bulataki na Vosa ni Vuku. “Au kila mai na veika era a sotava eso, ena veiyabaki sa oti,” a kaya, “na yali ni bula vakayalo kei na qaqarauni e yaco ni sega ni vakamuri na Vosa ni Vuku.” A raica vakadodonu na yaloka ni mataqu kau vakila ni nona vosa e basikata na utoqu: “Yalataka vei au, Ronnie, nikua (e kacivi au Ronnie), ni ko na dau bulataka na Vosa ni Vuku.” Au a yalataka vakaidina o ya vua, kau se taura tikoga mai na veiyabaki kece oqo.

Na yalayala o ya a vinaka sara vei au niu a vakailala voli kei na noqu itokani itabagone kei na veiyabaki e muri niu sa cakacaka kina a soli vakarawarawa kina na veimataqali gunu. Au a cakava e dua na vakatulewa bibi taumada meu muria na lawa ni Kalou, ka sega ni gadrevi kina meu lesuva. Sa kaya na Turaga, “Koi au, na Turaga, au sa vauci ni dou muria na noqu vosa, ia ni dou sega ni muria na noqu vosa, sa sega na ka e yalataki vei kemudou.”⁶ Na cava e kaya tiko o Koya vei ira sa muria na Vosa ni Vuku? Ni da na taura na yalayala ni bula vinaka, kaukauwa, vuku, kila-ka, kei na veitaqomaki ni agilosi kivei keda.⁷

Ena vica na yabaki sa oti, keirau a tiko kei Sister Rasband ena Valetabu e Salt Lake me vauci e dua na luvei keirau yalewa. Ni keirau tucake tu e tautuba ni valetabu kei na luvei keirau yalewa gone, se lailai nona yabaki me tiko ena soqoni, keirau a veivosakitaka tiko na bibi ni vauci ena valetabu savasava ni Kalou. Ena ka a vakavulici au o tinaqu ena veiyabaki taumada, keirau a kaya vei luvei keirau yalewa, “Keirau gadreva mo vauci taqomaki e valetabu, ka mo yalataka vei keirau ni gauna o sa kunea na nomu itokani tawamudu, mo drau lokuca e dua na siga ka vauci e valetabu.” A qai vosa yalayala vei keirau.

iVakatakilakila

Na luvena yalewa qase duadua o Elder Rasband kei na watina

Mai kea sa qai dau tukuna tiko ni neirau vosa kei na nona yalayala a taqomaki koya ka vakananumi tikoga vua “na ka e bibi duadua.” E muri a qai cakava nona veiyalayalati tabu ni sa vauci vei watina e valetabu.

A vakavulica o Peresitedi Nelson: “Eda …na vakalevutaka cake talega na mana ni iVakabula ena noda bula ni da cakava na veiyalayalati tabu ka maroroya vakamatailalai na veiyalayalati oqori. Na noda veiyalayalati e vauci keda Vua ka solia vei keda na mana vakalou.”⁸

Ni da maroroya na noda yalayala vua e dua eda na rawa ni maroroya noda yalayala vua na Turaga. Nanuma na vosa ni Turaga, “Ni kemuni a cakava vua e dua sa lailai vei ira na wekaqu oqo, ni a cakava vei au.”⁹

Meda raica vata mada na ivakaraitaki eso ni yalayala ena ivolanikalou. A yalataka o Amoni kei iratou na luvei Mosaia ena iVola i Momani me ratou “vunautaka na vosa ni Kalou.”¹⁰ Ni sa vesuki o Amoni ma ivei ira na mataivalu ni Lemanaiti a kau yani vei Lamonai na Tui kei Lemanaiti. A qai yalataka vua na tui, “Meu nomuni tamata ga.”¹¹ Ni ra lako mai na dauvakacaca mera butakoca na sipi ni tui, a musuka laivi o Amoni na ligadra. A kurabui sara kina na tui, ka vakarogoca kina na itukutuku nei Amoni baleta na kosipeli ka a saumaki kina.

O Ruci, ena Veiyalayalati Makawa, a yalataka vei tinai watina, “Niu na lako ki na vanua ko sa lako kina.”¹² A dina ki na nona vosa. Na kai Samaria dauloloma, ena vosa vakatautauvata ena Veiyalayalati Vou, a yalataka vei taukei ni bure ke rawa me qarava na tamata sa mavoa, “Ia na ka tale ko na kuria au na sauma vei iko niu sa lako tale mai.”¹³ O Soramu, ena iVola i Momani, a yalataka me lako ki na lekutu vata kei Nifai kei iratou na tacina. E nanuma lesu o Nifai, “Ka sa yaco ni sa bubului oti vei keitou ko Soramu, sa qai oti na neitou ririkotaki koya.”¹⁴

Sa cava beka na yalayala makawa “caka vei ira na tama” e tukuni ena ivolanikalou ena vagolei “na lomadra na gone vei ira na nodra qase”?¹⁵ Ena bula taumada eda a digia na ituvatuva ni Kalou, eda a yalataka meda vukea me sokumuni o Isireli ena yasa ruarua ni ilati. “Eda sa itokani cakacaka vata kei na Turaga,” a vakamacalataka o Elder John A. Widtsoe ena vica na yabaki sa oti. “Na kena cakacakataki na ituvatuva a sega walega ni nona cakacaka na Tamada, ka cakacaka ni iVakabula, ia sa noda cakacaka talega.”¹⁶

“[Na] sokumuni sa ka bibi duadua e caka tiko e vuravura nikua,”18e kaya tiko o Peresitedi Nelson ni siko wavoki tiko e vuravura. “Ni da tukuna tiko na vakasokumuni, eda sa kaya tiko na ka bibi dina oqo: ni luvena yadua na Tamada Vakalomalagi, ena yasa ruarua ni ilati, sa dodonu mera na rogoca na itukutuku ni kosipeli vakalesuimai i Jisu Karisito.”¹⁷

Me vaka niu iApositolo ni Turaga o Jisu Karisito, au sa tinia ena veisureti kei na yalayala. iMatai, na veisureti: Au sa sureti kemuni mo raica na yalayala kei na veiyalayalati o ni cakava vua na Turaga, kei ira na tamata, me sa dodonu ka cecere, ka kila tiko ni vauci kemuni na nomuni vosa. iKarua, au sa yalataka vei kemuni, ni ko cakava oqo, na Turaga ena vakadeitaka nomu vosa ka vakadonuya nomu cakacaka ni ko saga ka sega ni guce mo tara cake nomu bula, kei nomu vuvale, kei na Lotu i Jisu Karisito ni Yalododonu Edaidai. Ena tiko vata kei iko o Koya, taciqu kei na ganequ lomani, ka rawa ena nuidei, mo kakavaki mo “curu ki lomalagi, [mo] tiko marau kina vata kei na Kalou me tawamudu … ni sa kaya na Turaga na Kalou.”¹⁸

Au vakadinadinataka ka yalataka oqo ena yaca i Jisu Karisito, emeni.