Vuli mai na iTukutuku ni Koniferedi Raraba

Na nodra ivakavuvuli na parofita bula kei na so tale na iliuliu ni Lotu raraba era sa vakarautaka na veidusimaki veivakauqeti ni da sa vakasaqara meda vakaitavi ena cakacaka ni Turaga. Ena ikarua kei na ikava ni Sigatabu ni veivula, era na digitaka na mataveiliutaki ni iSoqosoqo ni Veivukei kei na kuoramu e dua na itukutuku ni koniferedi me veivosakitaki, yavutaki ena nodra gagadre na lewenilotu kei na veidusimaki ni Yalo. Ena so na gauna, ena dau rawa ni vakatura talega o bisopi se peresitedi ni iteki e dua na itukutuku. Vakararaba, era na dau vakamatatataka na iliuliu na itukutuku maivei iratou na lewe ni Mataveiliutaki Taumada kei na Kuoramu ni iApositollo Le Tinikarua. Ia, sa rawa me veivosakitaki e dua na itukutuku mai na koniferedi se qai oti toka ga.

E dodonu mera vakasaqara na iliuliu na sala mera vakayaloqaqataki na lewenilotu mera wilika na itukutuku digitaki eso ni bera na soqoni.

Me baleta na ikuri ni ivakamacala me baleta na soqoni ni kuoramu ni italatala qase kei na iSoqosoqo ni Veivukei, raica iVoladusidusi 2: Veiliutaki ena Lotu, 7.8.1, 9.4.1, ChurchofJesusChrist.org.

Vakavakarau mo Veivakavulici

Na taro eso oqo e rawa ni vukei ira na qasenivuli ni ra tuvanaka mera vakayagataka e dua na itukutuku ni koniferedi raraba mera vakavulica.

Na cava e vinakata vei keda o koya e vosa meda kila vinaka? Na ivakavuvuli cava ni kosipeli e vakavulica tiko? E vakayagataki vakacava oqo ena noda kuoramu se iSoqosoqo ni Veivukei?
Na ivolanikalou cava a vakayagataka o koya a vosa me tokona na nona itukutuku? E tiko beka eso tale na ivolanikalou eda rawa ni wilika ena vakatitobutaka na noda kila? (O na rawa ni kunea eso na idusidusi e ra ni itukutuku se ena Topical Guide.)
Na cava au rawa ni taroga ena rawa ni vukei ira na lewenilotu mera vakasamataka vakatitobu na itukutuku? Na taro cava ena vukei ira mera raica na yaga ni itukutuku ena nodra bula, ena nodra matavuvale, kei na cakacaka ni Turaga?
Na cava tale au rawa ni cakava me sureti na Yalo ki na noda soqoni? Na cava au rawa ni vakayagataka me vakavinakataka cake na veivosaki, oka kina na italanoa, vosa vakatautauvata, sere kei na ivakatagi, kei na cakacaka ni liga? Na cava a vakayagataka o koya e vosa?
A veisureti beka o koya e vosa? Au na vukei ira vakacava na lewenilotu mera gadreva mera cakacakataka na veisureti o ya?

Vakasama ni iTaviqaravi

E vuqa tu na sala mera vukei na lewenilotu mera vuli mai na itukutuku ni koniferedi raraba. Oqo e vica na kena ivakaraitaki; ena tiko beka eso tale na nomu vakasama ena cakacaka vakavinaka cake ena nomu kuoramu se iSoqosoqo ni Veivukei.

Veivosaki vakailawalawa. Wasea vakailawalawa lalai na lewenilotu, ka lesia na ilawalawa yadua e dua na iwasewase na itukutuku ni koniferedi mera wilika ka veivosakitaka. Mera qai kerei na ilawalawa yadua me wasea e dua na dina era sa vulica. Se mo tuva na ilawalawa ena tamata e duidui na wase era vulica ka mera qai wasea vakai ira na veika era sa vulica.
Sauma na taro. Sureta na lewe ni kalasi mera sauma na taro me vaka na kena oqo me baleta na itukutuku ni koniferedi: Na dina cava ni kosipeli eda kunea ena itukutuku oqo? Eda na bulataka vakacava na dina oqo? Na veisureti kei na veivakalougatataki yalataki cava a soli mai? Na cava e vakavulica vei keda na itukutuku oqo me baleta na cakacaka e gadreva na Kalou meda cakava?
Wasea na qaqanivosa eso. Sureti ira lewenilotu mera wasea eso na qaqanivosa mai na itukutuku ni koniferedi e vakauqeti ira me ra vakayacora na nodra itavi ena cakacaka ni veivakabulai. Vakayaloqaqataki ira mera raica na sala e rawa ni ra wasea kina na qaqanivosa oqo mera vakalougatataka kina e dua, oka kina o ira na daulomani kei ira na tamata era veiqaravi vei ira.
Wasea e dua na lesoni ivakaraitaki. Tataunaka ki na vica na lewenilotu mera na kauta tiko mai eso na iyaya mai vale mera na mai vakayagataka mera vakavulica kina na itukutuku ni koniferedi. Ena gauna ni soqoni, kerei ira me ra vakamacalataka na kena semati na veiyaya o ya ki na itukutuku.
Vakarautaka e dua na lesoni me vakavulici e vale. Kerei ira na itabagone mera cakacaka yarurua mera tuva e dua na lesoni ni lotu ni matavuvale e yavutaki ena itukutuku ni koniferedi. Eda na cakava vakacava me yaga na itukutuku ki na noda matavuvale? Eda na wasea vakacava na itukutuku oqo vei ira na tamata eda qarava?
Wasea na veika sotavi. Wilika vata e vica na qaqanivosa mai na itukutuku ni koniferedi. Kerei ira na lewenilotu mera wasea na ivakaraitaki mai na ivolanikalou kei na nodra bula e vakaraitaka se vaqaqacotaka na ivunau e vakavulici tiko ena veiqaqanivosa oqo.
Vulica e dua na tiki ni ivolanikalou. Sureti ira na lewenilotu mera wilika a dua na ivolanikalou e tukuni tiko ena itukutuku ni koniferedi. Kerei ira mera veivosakitaka na sala ena vukei ira na ivakavuvuli mera kila vinaka cake na ivolanikalou.
Kunea e dua na isaunitaro Cakava rawa mada e vica na taro ena rawa ni saumi ena kena vakayagataki na itukutuku ni koniferedi. Vakanamata ki na taro ena vakavurea na vakasama vakatitobu se na kena vakayagataki na ivakavuvuli ni kosipeli (raica na Veivakavulici ena iVakarau ni iVakabula, 31 – 32). Mera qai digitaka na lewenilotu e dua na taro ka vakasaqarai na kena isau ena itukutuku. Sureti ira mera veivosakitaka vakailawalawa lalai na nodra isaunitaro.
Vakaraica e dua na malanivosa. Sureti ira mera vakasaqara na itukutuku ni koniferedi, ka vakasaqara na malanivosa e vakaibalebale vei ira. Kerei ira me ra veiwaseitaka na veimalanivosa kei na cava era sa vulica mai kina. E vukei keda vakacava na ivakavuvuli oqo meda rawata kina na cakacaka ni Turaga?
Bulia e dua na ka. Sureti ira na lewenilotu mera cakava e dua na posita se maka ni wilivola e okati kina e dua na itukutuku lekaleka ni veivakauqeti mai na itukutuku ni koniferedi. Solia vei ira na madigi me ra wasea na veika era sa cakava.