Tuu Atu i o Tatou Agaga e Pulea o Tatou Tino

O’u uso e ma tuafafine pele, a o latalata mai le konafesi aoao ia Oketopa o le tausaga ua mavae, sa ou saunia la’u lauga o le konafesi e faamamafa ai le 100 tausaga o le faaaliga e uiga i le lalolagi o agaga na tuuina atu ia Peresitene Iosefa F. Samita i le aso 3 Oketopa, 1918.

O ni nai aso na mavae ai lo’u auina atu o la’u lauga mo le faaliliuga, na faamaea ai e la’u soa pele e faavavau, o Barbara, lona olaga faaletino faataitai ma pasi atu i le lalolagi o agaga.

Ao faasolosolo atu aso i vaiaso, i masina, ma ua atoa nei le tausaga talu ona maliu Barbara, ua ou matua talisapaiaina ai lenei mau: “Ia outou nonofo faatasi i le alofa, ia outou fetagisi ai i le toesea o i latou o e e oti.”¹ Sa faamanuiaina i ma’ua ma Barbara e “nonofo faatasi i le alofa” mo le 67 tausaga. Ae ua ou aoaoina i se auala patino lava le uiga o le “fetagisi ai i le toesea” o i latou tatou te alolofa i ai. E maeu lo’u alofa ma le misia o ia!

Masalo o le toatele o i tatou e le mafai ona talisapaia atoatoa mea o faia e isi mo i tatou sei iloga ua latou maliliu. Sa ou iloa le pisi o Barbara i taimi uma, ae ou te lei malamalama atoatoa i manaoga faifai pea o le aiga, Ekalesia, ma le nuu i lona taimi. Sa i ai ni taumafaiga faapaiaina o aso taitasi na faia soo i le faafiaafe i le tausaga lea na faaauau ai pea le galulue o lo matou aiga. Ma i na mea uma, e leai se tasi i lo matou aiga na faalogo ia te ia o siisii i luga lona leo pe fai se upu le alofa.

Ua tele manatuaga ua oo mai i lou mafaufau i lea tausaga ua mavae. Na ou mafaufau e uiga i filifiliga faigata faaletino sa ia faia e avea ai ma se tina i se fanau e toafitu. O le avea ai ma se tausiaiga sa na o le pau lea o se matata sa ia manao ai, ma i tulaga uma o lea matata sa ia matuai atamai ai lava.

E tele ina ou mafaufau pe faapefea ona ia taulimaina le ma fanau ma a’u. O sauniuniga lava ia o meataumafa sa o se galuega lofituina, ae le ta’ua ai gaoioiga e pei o le faiga o mauga o tagamea lea na faaputuina e lo matou aiga i vaiaso taitasi, tausiaina o seevae ma ofu ia ofi lelei i le fanau. Matou te agai uma atu ia te ia mo le tele o isi mataupu lea na taua ia i matou. Ma talu ai na taua ia i matou, na taua foi ia te ia. O ia, i se upu [e tasi] e ofoofogia—o se ava, o se tina, o se uo, o se tuaoi, ma o se afafine o le Atua.

I le taimi nei ua ia pasi atu i le isi itu, ou te fiafia na ou filifili e saofai i ona autafa pe a ou alu atu i le fale i masina mulimuli o lona soifua, e uu lona lima a o ma matamata i faaiuga o nisi o polokalama musika e fiafia i ai—e fai ma toe fai aua e le faatagaina o ia e le faama’i o le Alzheimer ia manatua ua uma ona ia matamata i ai i le aoauli faatoa mavae atu. O manatuaga o na taimi faapitoa o le uugalima ua matua taua ia te a’u i le taimi nei.

Uso e ma tuafafine, faamolemole aua nei misia se avanoa e tagai atu ai ma le alofa i foliga o tagata o lou aiga. Fanau ma matua, aapa atu i le tasi ma le isi ma faaali atu lou alofa ma le talisapaia. E pei o a’u, o nisi o outou atonu e feala i luga i se tasi aso ma iloaina ai ua pasi le taimi o se fesootaiga taua. Ola i aso taitasi ma loto e faatumulia i le faafetai, manatuaga lelei, auaunaga, ma le tele o le alofa.

I le aluga o lenei tausaga ua mavae, sa ou mafaufau loloto ai lava e uiga i le fuafuaga a lo tatou Tama Faalelagi. I le aoao atu ai o lona atalii o Korianetona, na ta’ua ai e Alema “le fuafuaga tele o le fiafia.”²

O le upu lea e oo soo mai i lo’u mafaufau pe a ou mafaufau i le fuafuaga o le “toe faatasiga.” O se fuafuaga, ua mamanuina e lo tatou Tama o i le Lagi alofa, lea e i le ogatotonu le avanoa maoae ma mamalu o le faatasiga faaleaiga—o le toefaatasia e faavavau o tane ma ava, matua ma fanau, augatupulaga ma lea augatupulaga i le aiga o le Atua.

O lena manatu e aumaia ia te a’u le toafimalie ma le faamautinoaga o le a ma toe faatasi ma Barbara. E ui na mafatia o ia faaletino e oo i le iuga o lona soifua, ae o lona agaga sa malosi, mamalu, ma mama. Sa ia saunia ia lava i mea uma aua a oo mai le aso e mafai ai ona ia tu i luma “o le pa faamasino fimalie a le Atua,”³ ua tumu o ia i le talitonuga ma le faamautinoga filemu. Ae o a’u lenei, i le lua aso, o le a 91 ai tausaga, ma o loo o’u tuufesili pea, “Ua ou saunia ea? Ua ou faia mea uma e tatau ona ou faia ia mafai ai ona toe uuina lona lima?”

O le faamautinoaga sili ona faigofie o le olaga o le mea lenei: o le a tatou feoti uma. Pe tatou te feoti matutua pe laiti, faigofie pe faigata, mauoa pe mativa, alofagia pe tuulafoaia, e leai lava se tasi e sao mai le oti.

I nai tausaga ua mavae atu, na saunoa mai ai Peresitene Gordon B. Hinckley i se mea e taua tele e uiga i le mea lenei: “E maeu le matagofie o le faamautinoaga, e maeu le mafanafana o le toafilemu lea e sau mai i le malamalama, afai tatou te faaipoipo sa’o ma ola amiosa’o, o le a faaauau a tatou mafutaga, e ui lava i le mautinoa o le oti ma le aluga o le taimi.”⁴

Sa mautinoa lava le sa’o o la’u faaipoipoga. E leai se masalosalo i lena mea. Ae e le lava lena mea, e tusa ai ma le saunoaga a Peresitene Hinckley. E tatau foi ona ou ola amiosa’o.⁵

I nei vaitaimi, o le “ola amiosa’o” e mafai ona avea o se mataupu matua fenumiai lava, aemaise pe afai e te faaaluina se taimi tele i luga o ala o faasalalauga faaagafesootai, lea e mafai ai e soo se leo ona tautino mai upumoni mo’i po o mataupu sese e uiga i le Atua ma Lana fuafuaga mo Ana fanau. O le mea e faafetai ai, ua maua e tagata o le Ekalesia ni mataupu faavae moni e faavavau o le talalelei ia iloa ai le ala e soifua ai ina ia mafai ona tatou lava tapena pe a tatou feoti.

I ni nai masina ae ou te lei fanau mai, na tuuina atu ai e lo’u tama matua o le Aposetolo, o Elder Melvin J. Ballard se saunoaga faapea, mo le toatele o tagata, na pu’eina le ute o le uiga o le ola amiosa’o. O lana lauga sa faaulutalaina “O le Tauiviga mo le Agaga,” sa taulai atu i taua faifaipea i le va o o tatou tino faaletino ma o tatou agaga faavavau.

Na ia saunoa, “O le feteenaiga sili o le a i ai i soo se alii po o se tamaitai … o le taua lea i totonu o ia lava,” ma faamalamalama mai ai o Satani “o le fili o o tatou agaga” e osofaia i tatou e ala mai “i tuinanau, manaolasi, ma faananauga o le tino.”⁶ O le taua muamua lava la e i le va o lo tatou natura paia ma faaleagaga ma le tagata natura faaletino. Uso e ma tuafafine, ia manatua, e mafai ona tatou maua le fesoasoani faaleagaga e ala i le faatosinaga a le Agaga Paia lea e mafai ona “aoao atu outou i mea uma.”⁷ E mafai foi ona oo mai le fesoasoani e ala i le mana ma faamanuiaga o le perisitua.

Ou te fesili atu nei, o faapefea le aluga o lenei taua ma outou taitoatasi?

Na saunoa Peresitene Tavita O. MaKei: “O le olaga o le tagata i le lalolagi ua na o se suega e saili ai pe o le a taulai atu ana taumafaiga, lona mafaufau, lona agaga, i mea e saofagā atu i le to’afimalie ma le faamalieina o lona natura faaletino, pe o le a ia faia e tusa ma [faamoemoega] o lona olaga le mauaina o uiga auau mama faaleagaga.”⁸

O lenei taua i le va o lo tatou natura faaletino ma faaleagaga e le o se mea fou. I lana lauga faaiu i lona nuu, na aoao atu ai le Tupu o Peniamina e faapea,“o le tagata natura o se fili i le Atua, ma sa faapea lava mai le pau o Atamu, ma o le a faapea lava, e faavavau faavavau lava, vagana ai ua gauai atu o ia i uunaiga a le Agaga Paia, ma tuu ese le tagata natura ma avea ma tagata paia e ala i le togiola a Keriso le Alii.”⁹

Na aoao mai le Aposetolo o Paulo faapea “o e i la le tino e loto atu i latou i mea a le tino; a o e i la le Agaga e loto atu i mea a le Agaga.

“Aua o le loto i la le tino, o le oti lea; a o le loto i la le Agaga o le ola lea ma le manuia.”¹⁰

E foliga manino mai ia te a’u o se tasi o mea sili ona taua e mafai ona tatou aoaoina i lenei olaga o le ala e faamamafa atu ai lo tatou natura faaleagaga e faavavau ma pulea ai o tatou manaoga leaga. E le tatau ona faigata tele lenei mea. O o tatou agaga, lea ua umi atu nai lo o tatou tino faaletino, ua uma ona faamanuiaina i le filifilia o le amiotonu nai lo le leaga i le muai olaga. A o lei faia lenei lalolagi, sa tatou nonofo i le lalolagi o agaga o ni atalii ma afafine a ni Matua Faalelagi, o e alolofa ia i tatou ma e faaauau pea ona alolofa mai ia i tatou i le taimi nei.

Ma ioe, sa ao ona tatou faia ni faaiuga ma filifiliga e suia ai le olaga i lena nofoaga i le muai olaga. Soo se tagata lava na soifua mai pe o le a soifua mai i lenei paneta na faia se faaiuga taua e filifili e talia le fuafuaga a le Tama Faalelagi mo lo tatou faaolataga. O lea la na tatou o mai uma ai i le lalolagi ma se faamaumauga faamaonia o le ala o se natura manuia faaleagaga ma se taunuuga e faavavau.

Mafaufau i lena mea mo sina taimi. O lou tagata moni lava lena, ma le tagata sa avea ai lava oe: o se atalii po o se afafine o le Atua, ua i ai aa faaleagaga i le faavavau ma se lumanai ua taumasuasua i avanoa le mafuatia. O oe—o le uluai, muamua, ma e avea pea—o se tagata faaleagaga. Ma pe afai la e filifili se tasi e faamuamua lo tatou natura faaletino nai lo lo tatou natura faaleagaga, ua tatou filifili se mea e feteenai ma o tatou lava tagata faaleagaga moni, faamaoni, ma faatuatuaina.

Ae e le fesiligia lava le faafaigataina e manaoga o le tino ma faalelalolagi ona faia ia faaiuga. Faatasi ai ma se veli o le galo o mea ua tosoina i le va o le lalolagi o agaga i le muai olaga ma lenei lalolagi faitino, e mafai e se tasi ona le iloa la tatou faiā ma le Atua ma lo tatou natura faaleagaga, ma mafai ai e lo tatou natura faaletino ona faamuamua mea tatou te mananao i ai i le taimi nei. O le aoao e filifili mea a le Agaga nai lo mea o la le tino o se tasi ia o mafuaaga autu e avea ai lenei olaga faalelalolagi ma vaega o le fuafuaga a le Tama Faalelagi. O le mafuaaga foi lea ua fausia ai le fuafuaga i luga o se faavae mautu ma mausali o le Togiola a lo tatou Alii ma Faaola, o Iesu Keriso, ina ia mafai ona faatoilaloina a tatou agasala, e aofia ai ma mea sese tatou te faia pe a tatou gauai atu i manaoga o le tino, e ala i le salamo faifai pea ma e mafai ai ona tatou ola e taulai atu i le faaleagaga. O le taimi lenei e pulea ai o tatou manaoga faaletino ia ogatusa ma aoaoga faavae faaleagaga a Keriso. O le mafuaaga lea e le tatau ai ona tatou tolopoina le aso o lo tatou salamo.¹¹

O le mea lea, e avea ai le salamo ma se auupega taua i la tatou taua ma i tatou lava. I le konafesi aoao na sei mavae atu nei, na saunoa ai Peresitene Russell M. Nelson i lenei taua ma faamanatu mai ia i tatou faapea “a tatou filifili e salamo, ua tatou filifili e sui! Ua tatou faatagaina le Faaola e suia i tatou i o tatou lava ituaiga tagata silisili. Tatou te filifili e tuputupu a’e faaleagaga ma maua le olioli—le olioli o le togiolaina ia te Ia. A tatou filifili e salamo, ua tatou filifili ia avea atili e faapei o Iesu Keriso!”¹²

O po uma, a o ou iloiloina lo’u aso i le tatalo ma lo’u Tama o i le Lagi, ou te aioi atu ina ia faamagaloina pe afai sa ou faia se mea sese ma folafola atu e taumafai ia lelei atu taeao. Ou te talitonu o lenei salamo faifai pea i aso taitasi e fesoasoani i lo’u agaga e faamanatu i lo’u tino po o ai e pule ia te a’u.

O le isi punaoa o le avanoa faalevaiaso lea tatou te maua uma e toe faafou ai i tatou lava faaleagaga e ala i le aai ma feinu i le faamanatuga e manatua ai le Togiola ma le alofa o lo tatou Alii ma Faaola, o Iesu Keriso, mo i tatou.

Uso e ma tuafafine, ou te uunaia outou ina ia faalemu teisi ma mafaufau po o fea o e i ai nei i le faatoilaloina o lou natura faaletino ma le faamalosia o lou natura paia, natura faaleagaga lea pe a oo mai le taimi, e mafai ona e ulufale atu i le lalolagi o agaga i se faatasiga fiafia ma ē pele ia te oe—lea ou te molimau atu ai ma le tatalo faamaualalo i le suafa o Iesu Keriso, amene.