Aron Ana Boki Moomon ni Kauka Karawa Ibukiu

Iroun Jessica Patterson Turner

Ngkai ti kamatebwaia Ana Boki Moomon n te ririki aei, I tangiria n tibwaia bwa iai au koaua ni mwaakana ao te bitaki are e kona ni karikia inanon maium.

E maeka te tia korokaraki i Utah, USA.

Ia kaman karekea au koaua n ana Boki Moomon man te moantai are I warekia iai ngke I uarereke riki. Ma koauana, au kamatebwai i aon koroboki aika a tabu are waaki man Okitobwa n te Maungatabu ni kabuta kanga namakinan are ko a bon warekia nako naba. Ngaia are ngke Beretitenti Nelson e kaewenakoia aine n te Ekaretia bwa a na wareka Ana Boki Moomon imwain banen te ririki, I namakinna bwa bon anne te kakao ae I kainnanoia.

Ana kakao a roko ma berita tabeua aika korakora naba. E taku, “Ngkai ko tataromwaaka ni kamatebwai, ane e na uki karawa nakoim” (“Tititati’ Ira Ikotakiia Tibun Iteraera,” Riaona, Nobembwa 2018, 69).

Ngke I ongora, I namakina te ungannano ao te manga motinnano nakon te boki are I a tia n rang n tangiria, ao N aki kona n tataninga ukin karawa nakoiu.

N aron are a riki. N aro aika a bati. Imwiin kabwaninan warekan te kakaewenako ni warekan Ana Boki Moomon, I kabanei au tai n iangoi taneiai ake I a tia ni karekei ao ake I bon teimatoa ni karekei. I rang mimi ni bwaai ake I reiakinii, aron au namakin, ao arou are Ia karekei man kamatebwaian iteraniba aika a kaunganano aikai.

Bwaai ae I a tia n Reiakinna

Ngke I wareka ana Boki Moomon n te maranga ae waekoa riki nakon are I taneiai iai mai imwaina, te karaki e bon roko ni maiu. I namakini reitaki akanne nakon aia koaua ao aia namakin naake a karika te boki aei.

Mairoun tarin Nibwaai are Taam, I reiakinna bwa karekean te raoiroi e bon rine. Mairoun Aramwa I reiakinna bwa N na aki taenikai n au onimaki. Mairoun natina, I reiakinna bwa te nakon Kristo e bon aki kona n oimwi ao rinanoan mwaakan te kamaiuaki n Ana Mwakuri ni Kamaiu ae akea tokina (taraa Motiaea 27; Aramwa 36). Taman te Uea are King Ramonaai e kaungaai bwa N na karaoi anganano aika a mwaiti ibukin te Atua (taraa Aramwa 22:15, 18). Bwaoraan e reireinai bwa N na rau ao n aron Kristo ngkana I namakina te aki oota (taraa Aramwa 61). Mairoun tarin Iareta I reiakinna bwa ngkai e kakaawaki mwakurian ara itera, e bon aki tau; ti kainnanoa ana ibuobuoki Kristo ao mwakana ni kamaiu (taraa Ita 2–3). Mairoun Moronaai I reiakinna bwa e ngae ngke ti namakina te maroa, ti aki kona iai ni koaua (taraa Moomon 8:3, 5).

I reiakinna bwa N na reitaki ma te Uea n tainako, n tataro ni kakorakoraai ma te onimaki. I reiakina kakaawakin kawakinan rekooti ao ni kaoti koaua ao te kawai ae riai n rairannano. I reiakinna bwa te Atua e tabeaianga iroura, Kristo e nanoanga, ao a Inanoi n te kantaninga ae ti teuana.

I reiakinna bwa “[kakukurei] n ana taeka Kristo” (2 Nibwaai 32:3) e katauraoa te kawai are I kainnanoia ibukin maiu.

I reiakinna, riki, bwa Iotebwa Timiti e aki—ao e na bon aki kona—ni korea te boki aei.

Aron are I Namakinna

Bwa e maninnanti ngkai I wareka ana areru Nibwaai (2 Nibwaai 4) n te bong are I a taonaki iai n au aki tau ao ni kabwakau? Tiaki ngaia anne. Bon te kabuanibwai ae kakukurei ngkei I kaitibo ma ana katanoata te Uea King Ramonaai, “O ai kamiimira ana mwakuri te Uea, ao ai korakorara taotaonakin nanona ibukiia ana botanaomata” (Motiaea 8:20) ngkana I namakina te maroa n au tai ni kaangaanga? E aki! Ma te Atua, bon akea te maninnanti, bon tii babaire aika kororaoi iaon taian nanoanga, ao ngai temanna ibuakoia aika a mwaiti ake I karekei ngkai I wareware. I namakina ni koaua ana tangira Tamara are i Karawa ibukiu ao te namakin ae akea kabotauana n te rau ngkai I rinnako n Ana Boki Moomon.

Bon mwaakan ana kamaiu te Tia Kamaiu are I namakinna riki rinanon au wareware n ana Boki Moomon. Kiibu imwiin kiibu e kakoaua Ana akoi, nanoanga, kabomwi, ao ana tangira ae akea tokina. Ngke I wareka taekan Iesu Kristo, I namakina te kaonaki ma te kakaitau ibukin Ana anga karea. Teuana te kamimi ae moan te korakora are I namakinna ngke I wareware bon kabwaraan au bure ae bwanin ibukin kabwakan rinanin au rinerine ake I karaoi n ririki aika a nako. I namakinna ae kaanga e taetae ni kaineti nakoiu te Tia Kamaiu ngke I wareware. I nanou, I namakinii taeka aikai, Aio tain te waaki nako. Kristo e bon katauraoi kamaoan maneka ake I kainnanoi.

E ngae ngke I aki noora Kristo ae mangauti n aroia Nibwaite (taraa 3 Nibwaai 11), I namakinna bwa e mena irariku inanon maiu ngkai I wareki taekana inanon Ana Boki Moomon. E matata raoi iroura n tatabemaniira ao ni kataakira ae onoti, ao iai mwaakana ni kamaiu, karaunano, ao ni kamarurungiira.

Antai are Ia Karikia Inanou

Ngkai I wareware n ana Boki Moomon ni katoabong, I a rikirake riki n taotaonannano, nanoanga, kakaitau, ao n iangoraoi. I a moanna n aki ti iangoai ao n aki tabeiaianga ni bwain aon te aba.

Ibukin ana Boki Moomon ao te Tamnei are e uotia nakon maiu, Ia riki bwa te tina, kainnaba, nati aine, ao te rao ae tamaroa riki. Ngai I a kona riki n riki bwa ana reirei Iesu Kristo.

E kanga teuana te boki ni karekei ni kabane kaeka? E kanga teuana te boki ni katiai aika a rang ni mwaiti?

Bon tii te boki are e barongaaki iroun te Atua ae iai inanona te aekaki ni mwaaka anne. Ao I ataia bwa bon mai iroun te Atua.

N aron are e berita Beretitenti Nelson, karawa e bon koaua ae e uki nakoiu, ni kawai aika a mwaiti nakon ake I kona n iangoia. Ngaia are N na reitinako ni wareki ao ni kamatebwaia ana Boki Moomon. N na reitinako n ukoukori ana iteraniba ao ni kunea Kristo ikekei ibukina bwa te boki aei bon ni kabane bon taekaNa.