Atong mga Panimalay, Atong mga Pamilya
Inspirasyon samtang naa sa Pantalan
Nagpinasakitay ang akong pamilya, ug upat pa ka oras ang akong paghulat sa barko para makauli. Panahon kadto sa pag-ampo.
Gihulagway ni Charles Lehman
Sakyunon pa og barko ang akong gilay-on gikan sa balay dihang nakabalita ko nga dunay grabing panaglalis sa akong pamilya sayo nianang adlawa. Grabe kaayo nga lalis.
Nasuko ang akong asawa. Nangasuko ang akong mga anak. Ang tanan nasakitan. Ug ambot unsay akong buhaton.
Gikuha na nako ang akong pangtrabaho nga trak nianang buntaga gikan sa akong balay sa isla sa Upolu, Samoa, ug misakay og barko ngadto sa Savai’i, Samoa. Kini nga biyahe mokabat og ubay-ubay nga oras sa matag direksyon.
Human ko nakig-istorya sa akong asawa sa telepono ug nadungog ang kapungot sa iyang tingog, moangkon ko nga naglisud ko sa paghunahuna bahin sa pagpauli para niini nga sitwasyon. Dili ko sigurado unsaon nako sa pagtabang nga masulbad ang daghang nasakitan nga mga pagbati sa akong pamilya.
Miadto ko sa pantalan ug nagsugod sa pag-ampo. Sa misunod nga upat ka oras, naglingkod ko sa akong trak, nag-ampo mahitungod sa akong pamilya samtang naghulat sa barko para pauli.
Human sa taas nga panahon sa pag-ampo, nakadawat ko og tin-aw nga espiritwal nga impresyon. “Ipakita lang ang imong gugma ngadto sa imong mga anak. Ipakita ang imong gugma. Sultihi sila, ‘Gimahal ko kamo, ug ang Dios nahigugma ninyo.’”
Kanunay nga igkasabut nako ang akong mga anak. Nasayud silang gihigugma nako sila, ug nahibalo sila unsa sila kaimportante para nako. Apan tin-aw sa akong pagsabut, pinaagi sa pagpadayag, nga ang pagpakita og mas dako pa nga gugma mao lamang ang butang nga magpasuod og balik sa akong pamilya.
Sa pag-abut nako sa balay nianang lawom na nga ka kagabhion, suko gihapon kaayo ang akong asawa. “Unsay imong buhaton?” gipangutana ko niya.
Gisultihan nako siya mahitungod sa pagpadayag nga akong nadawat. Gisultihan nako siya nga gikinahanglan namo nga dugangan pa namo ang among pagpakita og gugma ngadto sa among mga anak. “Mituo ko nga mao kana ang yawe aron mawagtang ang mga kasakit nga gibati sa tanan,” miingon ko. Nagkauyon kami nga sulayan kini.
Karon, normal kini nga gabii sa among sinemana nga family council. Tungod sa panaglalis, hinoon, kadaghanan sa akong pamilya gusto nga kini among ikanselar nianang semanaha. Ang akong asawa ug ako mihukom nga kami mag-family council lang gihapon.
Sa sinugdanan, walay nisulti. Nakasabut ko nga nianang adlawa adunay daghang mga luha ug emosyonal nga kasakit sa akong pamilya.
Dayon ang akong asawa misugod sa pagsulti. “Gusto lang ko nga mahibalo mo unsa kadako ang akong gugma ninyong tanan,” miingon siya. Nabantayan nako ang kausaban sa ilang linihokan. Tanan sila nanaglingkod sa kilid ra sa ilang mga lingkuranan. Apan sa dihang misugod sa pagpasabut ang akong asawa unsa kadako ang iyang gugma kanila, ang akong mga anak misandig na og mi-relaks. Sa wala madugay misulti na usab sila. Gisultihan sab nako sila unsa kadako ang akong gugma kanila ug unsa kadako ang akong kalipay nga kami usa ka pamilya.
Misulbad kana sa tibuok problema. Dili kadto katuohan. Ang tanang kasuko gikan sa among balay nawala, ug among naayo ang unsay naguba.
Karon, ang akong pamilya dili perpekto. Apan naghigugmaay kaayo kami sa usag usa. Ug migahin kami og panahon sa usag usa. Sa pagmata man og sayo para sa dungan nga pagbasa sa mga kasulatan, kuyog sa pagsimba, pagdula og basketball, pag-inambitay og pagkaon, o gani sa dungan nga pagpaminaw og musika, naningkamot kami nga magpabiling suod.
Bisan pa nianang tanan, ang akong asawa ug ako nasayud labaw kay sa kaniadto kon unsa kaimportante ang pagpakita sa among gugma ngadto sa among mga anak.
Mga Leksyon gikan Niini nga Papa
-
Naamguhan ni Brother Silaga nga dili siya makasulbad niini nga problema kon siya ra. Nag-ampo siya sulod sa mga oras sa pagpangita og pagpadayag kon unsaon sa pagtabang ang iyang pamilya.
-
Ang pamilyang Silaga mihimo ni Jesukristo nga sentro sa ilang panimalay. Bisan sa busy nga mga iskedyul, mangmata sila og sayo alang sa pamilya nga pagtuon sa kasulatan. Gihimo nila ang sinemana nga family council. Manimba sila. Gibuhat nila ang tanan aron maanaa ang mga panalangin sa ebanghelyo sulod sa ilang panimalay ug pamilya.
-
Si Brother Silaga nakigtambag sa iyang asawa sa wala pa sila makigsulti sa ilang mga anak mahitungod sa panaglalis.
-
Si Brother ug Sister Silaga kanunay nga mosulti sa ilang mga anak kon unsa ka dako ang ilang gugma kanila.
-
Ang mga Silaga magtinabangay sa pagtrabaho, mao usab sa ilang panagdula. Ilang gihulagway ang mosunod nga tambag nga gihatag ni Elder Dieter F. Uchtdorf sa Korum sa Napulog Duha ka mga Apostoles: “Sa mga relasyon sa pamilya ang gugma gi-espelling nga o-r-a-s, oras. Ang paggahin og oras sa usag usa mao ang yawe alang sa panag-uyon diha sa panimalay.” (Kabahin sa mga Butang nga Labing Mahinungdanon,” Liahona, Nob. 2010, 22).