Dawaton Ba Namo ang Calling?
Litrato gikan sa Getty Images
Isip ginikanan sa usa ka gamayng bata ug sa bag-ong natawo, naglisud kami sa pagtuman sa among mga calling sa Simbahan. Mao nga dihang ang akong bana gitawag nga moserbisyo isip bishop sa usa ka young single adult student ward, kaming duha nagpanuko.
Mga pangutana mipuno sa among mga hunahuna mahitungod sa among abilidad sa pagdumala sa tanan pun-an sa idugang nga responsibilidad. Among nahibaloan pipila ka adlaw human madawat ang tawag nga ako mabdos diay sa among ikatulo nga anak. Tungod sa akong medikal nga kasaysayan, ang unang mga pagmabdos lisud. Dihang gihisgutan namo unsay among malauman sa moabut nga pipila ka bulan kon dawaton sa akong bana ang calling, wala kami kasiguro unsay buhaton. Nagsugod kami sa matinguhaong pag-ampo alang sa kahupayan ug giya.
Sa usa ka higayon, naghunahuna ang akong bana kon pasabton ba kaha niya ang presidente sa stake sa among sitwasyon ug mobalibad sa calling. Makahuluganon kaayo kini kanamo, apan dihang kami nag-ampo ug nagpuasa, gipahinumduman kami sa mga pulong ni Presidente Thomas S. Monson (1927–2018): “Kon kita anaa sa buluhaton sa Ginoo, kita adunay katungod sa panabang sa Ginoo” (“Duty Calls,” Ensign, Mayo 1996, 44).
Nahupay ang among kasingkasing ug migaan ang among mga kabalaka. Among nadawat ang kasiguroan nga kini nga tawag wala maggikan sa presidente sa stake. Naggikan kini sa Ginoo, ug Siya unang nahibalo kay kanamo nga ako mabdos dihang gihatag ang mao nga calling. Makahimo Siya og daghan pa para sa among pamilya kay sa mahimo sa akong bana nga siya ra kon wala niya dawata kini nga calling.
Inubanan sa pagtuo diha sa among kasingkasing, gidawat sa akong bana ang tawag ug gipangandaman namo kini matag adlaw hangtud nga miabut kini. Ang akong ikatulo nga pagmabdos napamatud-an nga usa ka dakong milagro, ug ang among anak nga lalaki natawo nga himsog ug lig-on. Ang katuigan nga akong gigahin sa pagtambong sa among home ward uban sa among mga anak nagtabang kanamo nga mas magkasuod dili lang isip pamilya apan ngadto usab sa isig ka miyembro sa ward. Samtang ang akong bana makugihong mibuhat sa iyang calling, nakakat-on ko sa pagpangayo og tabang sa akong home ward nga pamilya para sa akong mga anak.
Ang akong bana ug ako mapasalamaton sa daghang matinud-anong mga Santos ug, labawng importante, sa among Langitnong Amahan sa pagtabang kanamo samtang gipaningkamotan namo ang pagbalanse sa trabahoon, pamilya, ug pagserbisyo sa Simbahan.