E ha’amaita’ira’a ana’e tā’u e nehenehe e hōro’a

Hōho’a

father giving daughter a blessing

Faʼahōho’araʼa nā Allen Garns

’Ua hope tā’u ha’api’ira’a nō te ture i te taime ’ua fātata te mahana fānaura’a o tā’u tamāhine mātāmua. ’Ua tīa’i rū māua ’o tā’u vahine i te taime fa’ahanahanara’a i tō’u ha’afeti’ara’a, te mahana fānaura’a ’o tā māua tamāhine, ’e te mau rāve’a ’āpī tā māua e fāri’i, ’aita rā i tupu noa a’e mai tei fa’anahohia.

’Aita ato’a tā’u e ’ohipa i muri a’e i te hoperaa tā’u ha’api’ira’a, ’e ’ua fifi au nō te ’ite mai i te hō’ē ’ohipa. ’Aita i maoro roa, ’ua ha’amata te mau fifi i te pae moni. Nō te fa’atupu noa i te hō’ē fa’ahanahanara’a na’ina’i nō te mahana fānaura’a, e mea fifi ato’a.

I muri a’e e rave rahi ’āparaura’a ’e tā’u vahine, ’ua fāri’i māua i tō mātou huru orara’a. E ’ere i te mea ’ōhie nō’u, te metua tāne, e ’ore e ti’a ’ia ho’o mai hō’ē noa a’e tao’a hōro’a na’ina’i noa nā tā’u tamāhine ’e e ’ite i tā’u vahine here ’ia pe’ape’a.

’Aita vau i ta’a e aha te ’ohipa i tupu. ’Ua pure au ’e ’ua ani i te Metua i te ao ra ’ia tauturu mai iā’u ’ia māramarama e aha tāna e tīa’i nei iā’u. I terā iho taime, mai te huru ē, hō’ē reo tei paraparau mai i tō’u vārua, ’ua fa’aro’o vau i teie mau parau : « Tē mau nei ’oe i te hō’ē mea hau atu i te faufa’a i te tahi atu huru faufa’a mātēria i ni’a i teie fenua. Tē mau nei ’oe i te autahu’ara’a. E aha te tao’a hōro’a tā ’oe e nehenehe e hōro’a nā tā ’oe tamāhine tei hau atu i te maita’i i te hō’ē ha’amaita’ira’a autahu’ara’a ? »

’Ua tahe a’era tō’u roimata ’a feruri ai au i te aura’a o te autahu’ara’a nō’u. ’Ua ’ī a’era tō’u ’ā’au i te māuruuru ’a feruri ai au ē, te autahu’ara’a, ’o te mana ïa ’o te nehenehe e tāhō’ē i tō’u ’utuāfare e a muri noa atu.

’Ua fa’a’ite atu ra vau i tō’u mau mana’o i tā’u vahine. ’Ua parau atu vau iāna ē, e ha’amaita’ira’a ana’e tā’u e nehenehe e hōro’a nā tā māua tamāhine. ’Ua fa’aoti a’era māua ē, nā teie e hōro’a mai i te ’oa’oa ’e te hau iāna, ’e e nava’i te reira.

I te mahana o te mahana fānaura’a ’o tā māua tamāhine, ’ua hōpoi mai te mau hoa, te mau fēti’i ’e te mau ta’ata tāpiri mai i te hō’ē faraoa monamona ’e te mau fa’a’una’una ’ōhie noa. ’Ua ’oa’oa mātou i te fa’ahanahanara’a i teie mahana ta’a ’ē i pīha’i iho i te feiā tā māua i here. I taua pō ra ’ua tu’u a’era vau i tō’u nā rima i ni’a i te upo’o o tā’u tamāhine ’e ’ua hōro’a iāna i te hō’ē ha’amaita’ira’a. ’Ua ha’amaita’i au iāna i te mau mea ato’a tā te Vārua ’o te Fatu i fa’auru mai iā’u ’ia parau.

Tei roto noa ā mātou i te hō’ē tau tāuiuira’a ’e te mau fifi nō te pae ’ohipa ’ore ’e nō te pae moni. Terā rā, noa atu tē vai ra te ’oto ’e te pe’ape’a, ’ua fāri’i mātou i te hau ’e te tāmāhanahana nā roto i tō tātou Fa’aora, ’o Iesu Mesia. ’Aita hō’ē fē’a’ara’a te mana’o ē, te rirora’a ’ei melo nō te ’Ēkālesia a Iesu Mesia i te Feiā Mo’a i te mau Mahana Hope’a nei, ma te fāri’i i te mana o te autahu’ara’a, ’ua riro mau te reira ’ei ha’amaita’ira’a. Terā ana’e tā’u e nehenehe e hōro’a i te mahana fānaura’a nō tā’u tamāhine, ’e ’ua nava’i roa te reira.