« ’A hi’o na e aha tā te fa’aro’o iti e nehenehe e rave ? »
Godfrey J. Ellis
Washington, USA
Fa’ahōho’ara’a © Gary Alphonso, i2iart.com
I te tahi taime i ma’iri a’e nei, ’ua ’āfa’i māua ’o tā’u vahine i tā māua nā tamaiti ’āpī a’e i Farāni nō te māta’ita’i i te vāhi i reira vau te tāvinira’a ’ei misiōnare rave tāmau. ’Ua haere mātou e māta’ita’i i te mau ’āma’a o te ’Ēkālesia tā’u i tāvini ’e ’ua ’oa’oa mātou i te mau melo tā’u i ha’api’i. ’Ua māta’ita’i ato’a mātou i te mau vāhi tu’iro’o.
Hō’ē vāhi, ’o te ano [ruine] ïa o te Château de Châlucet. ’Ua tupu te ’arora’a i ni’a i teie fare rahi ’e ’ua ha’amouhia e rave rahi tenetere i teienei. ’Ua tupu te uru rā’au ’ati a’e i te mau hu’ahu’a ano, ’e e mea ’oa’oa roa ’e te teitei te purūmu nō te haere i reira. ’Ua fifi mātou i te ta’umara’a, terā rā, ’aita i mau’a te taime i te fa’aitoitora’a ’ia tae i reira.
’Ua au roa nā tamāroa i te poura’a i roto i te piha tāpe’ara’a i terā ra tau, ’e i ni’a i te mau patu toe mai o te aora’i. ’Ua fa’atupu te aora’i i te mau ferurira’a rau i roto ia rāua mai tei ha’aferuri iā’u a 24 matahiti i mua ra.
Tei reira noa ā mātou, i faura mai ai te hō’ē vero tau ve’ave’a i te ātea. E mea vitiviti i te terera’a mai. ’Ua ’ī mai ra te reva i te mau ata pōiri ’e te mau ho’ara’a uira, ma te ’āpe’ehia mai e te hāruru pātiri.
’Ua pou mai ra mātou nā ni’a i te ’ē’a ma te horo atu i tō mātou pere’o’o ra, ’a tere noa mai ai te vero i ni’a ia mātou. ’Aita i maoro, ’ua rari roa mātou i te ’ua pūai ’e ’ua vari-paruparu-hia te purūmu. ’Ua ha’ape’ape’a mātou o te topa atu mātou i raro mai i te mato.
’Ua ’ite atu mātou i te hō’ē tāmaru i rotopū i te mau tumu rā’au i te hiti o te ’ē’a. ’Ua ’āmui mātou i raro a’e i te tāmaru ma te uiui ē, e aha te maorora’a e ti’a ai ia mātou ’ia tīa’i nō te pou i raro.
« E pure ana’e tātou », te parau ïa a te tamaiti ’āpī a’e.
’Ua ani ’oia e nāna e pure ’e ’ua pure ’oia ’ia mau te ’ua ’ia nehenehe ia mātou ’ia pou i raro i te ’āivi ma te fifi ’ore. ’Ua hi’o mai ra ’oia i ni’a ia mātou ’e nā ’ō mai ra « I teienei, hō’ē noa mea e hina’arohia, ’ia rahi tō tātou fa’aro’o. »
’Ua fa’ata’a atu ra vau ē, e’ita te pure e ’ohipa mai te reira i te mau taime ato’a.
« ’Aita » tāna ïa parau, « e mau ’ōna i roto 10 minuti ! »
I muri a’e fātata 10 minuti, ’ua mau te ua.
« OK, e haere tātou ! » tāna ïa parau.
« Mai te mea ē, e haere tātou i teienei, e ha’amata fa’ahou te ’ua ’e e fifi tātou », te parau ïa a tā māua tamaiti pa’ari a’e.
« E’ita ! » te pāhonora’a ïa a tā māua tamaiti ’āpī a’e. « Haere ana’e ! »
’Ua haere atura mātou nā te vāhi mārō a’e o te ’ē’a, ma te tāpe’a i ni’a i te ’aihere ’e te mau ’ama’a rā’au. ’Ia tae atu mātou i te pere’o’o ra, ’ua hōro’a mātou i te hō’ē pure ha’amāuruuru. ’Aita i maoro ’ua ha’amata fa’ahou te ua.
« ’A hi’o nā i te mea tā te fa’aro’o iti ha’iha’i e nehenehe e rave ? » Te parau ïa a tā māua tamaiti ma te ha’eha’a.
’Ua ha’api’i ’oia ia mātou pā’āto’a i te hō’ē ha’api’ira’a rahi i taua mahana ra.