Ni’a noa i te rorouira : Feiā ’Āpī Pa’ari

Te ravera’a i te ’ohipa mo’a i te taime ’ōpanira’a ’ia haere i rāpae

Nā Kaith Ashley Moran

Noa atu ’ua tāpirihia te mau hiero, e nehenehe tātou e tāmau noa i te tauturu i te ’ohipa mo’a, i te fare.

Hōho’a

’E mau vahine e hi’o ra i te ’iri rorouira

Tē ora nei te ta’ata pāpa’i i Manila, Firipino.

’Aita roa atu vau i mana’o ē, e fa’aro’o vau i teie mau parau a te Peresidenira’a Mātāmua i te ’āva’e i ma’iri : « ’Ua feruri māite mātou ’e ’ua pure, ’e ma te hina’aro ’ia riro ’ei tino huira’atira maita’i ’ati a’e i te ao nei, ’ua fa’aoti mātou e fa’ataime i te mau ’ohipa hiero ato’a ».¹

’Ua uiui paha ’outou mai iā’u nei ē, nāhea i te fa’aruru i teie mau taime fifi ’aita ana’e e vāhi mo’a nō te hau. I’ō nei i te fenua Firipino, ’ua ’ōpanihia te mau hiero nā mua atu i te ’ōpanira’a ’ia haere i rāpae, e mea maoro ïa vau i te tīa’ira’a ’ia ho’i i roto i te fare o te Fatu i teienei.

E ’ohipa faufa’a rahi rā tā’u i ’apo mai i roto i terā tau ’ōpanira’a ’ia haere i rāpae. Noa atu ā ’ua piri te mau ’ōpani hiero, ’aita te ’ohipa fa’aineinera’a ’ōro’a i ’ōpani. Tei te tahi pae o te pāruru noa ā tō tātou mau tupuna, tē tīa’i ra ’ia ha’api’i rahi atu ā tātou nō ni’a ia rātou. Mai te mea tē ’imi ra ’outou i te rāve’a nō te putapū i te mau mana’o nō te tāvinira’a hiero i te fare, teie te tahi mau mana’o ri’i :

Hi’o i tā ’outou papara’a tupuna i ni’a i te FamilySearch.org.
Tāmata i te tā’irora’a (indexation). E mea au roa a’e i te mau ha’uti video !
Fa’a’ohipa i te rāve’a ’āpī nō te paraparau i te fēti’i e ora ra.
Pāpa’i i tō ’outou iho ’ā’amu ’utuāfare.

’Ua ’ite au nāhea teie mau ’ohipa ri’i i « fa’afāriu i te ’ā’au » o te mau melo o tō’u ’utuāfare, mai tei ’itehia i roto i te Malaki 4:6, ’e ’ua fa’aherehere te reira ia mātou i te mana’o ’ino’ino, te fiu ’e te tīa’ira’a ’ore. ’E noa atu pa’i e ’ere te ’ōpanira’a ’ia haere i rāpae i te mea au roa, ’ua māuruuru vau nō te rāve’a tā’u e fāna’o nei nō te tauturu i teie ’ohipa hiero i te fare.

E nehenehe te reira ’ia riro ’ei taime mo’a i roto i tō tātou orara’a. Penei a’e e fa’aha’amana’o teie pararera’a ma’i pohe ia tātou i te faufa’a rahi o te mau hiero. Penei a’e e māuruuru tātou i te fāna’ora’a i te haere i te hiero, hau atu i te nā mua a’enei. Mai tā te Peresidenira’a Mātāmua i fa’aara : « E fa’atanora’a tau poto teie, ’e tē tīa’i maoro nei mātou i te mahana e matara fa’ahou mai te mau hiero ».²

E tīa’i maoro vau i te mahana e ti’a fa’ahou ia tātou ’ia pūpū i te mau ’ōro’a fa’aorara’a i tō tātou mau tupuna ! ’Ē tae noa atu ai terā mahana, e ’ohipa rahi tā tātou e nehenehe e rave.

Te mau ha’amaita’ira’a fa’aora māuiui

’Ua parau Elder Dale G. Renlund nō te pupu nō te Tino ’Ahuru Ma Piti ’āpōsetolo : « ’A ’āmui ai tātou i roto i te ’ohipa ’ā’amu ’utuāfare ’e te ’ohipa hiero i teie mahana, tē tītau… nei tātou i te mau ha’amaita’ira’a o te « fa’aorara’a » i fafauhia e te mau peropheta ’e te mau ’āpōsetolo… Teie tāpura roa tei roto ïa teie mau ha’amaita’ira’a :

E māramarama rahi atu ā nō te Fa’aora ’e tāna tusia tāra’ehara ;
E fa’aurura’a rahi atu ā a te Vārua Maita’i nō te putapū i te pūai ’e te arata’ira’a i roto i tō tātou iho orara’a ;
E fa’aro’o rahi atu ā, ’ia hōhonu atu ā ’e ’ia tāmau noa tō tātou fa’afāriura’a i te Fa’aora ;
E ’aravihi rahi atu ā ’e te ’ana’anatae nō te ha’api’i mai ’e nō te tātarahapa, nō te hō’ē māramaramara’a ’o vai tātou, nō hea mai tātou ’e e hi’ora’a pāpū a’e i hea tātou e haere ai ;
E mau mana maita’i atu ā, te ha’amo’a atu ā ’e te tāmarū atu ā tō tātou ’ā’au ;
E ’oa’oa rahi atu ā nā roto i te ’aravihi rahi atu ā ’ia putapū i te here o te Fatu ;
E mau ha’amaita’ira’a rahi atu ā, noa atu ā te vaira’a o tō tātou ’utuāfare i teienei, i te mātāmua ra ’aore rā ananahi, ’e noa atu ā te mau mea huru ’ē i ni’a i tō tātou tumu rā’au ’utuāfare ;
E here rahi atu ā ’e te māuruuru nō te hui tupuna ’e te mau fēti’i e ora nei, e ’ore roa atu te mana’o ’ōtahi ;
E mana rahi atu ā nō te hāro’aro’a i te mau hina’aro e fa’aora, ma te tauturu a te Fatu, e tāvini ia vetahi ’ē ;
E pāruru rahi atu ā i te mau fa’ahemara’a ’e te mana a te ’enemi tē rahi noa atu ra ; ’e
Te tauturu rahi atu ā nō te tātā’i i te mau ’ā’au pe’ape’a, te ’oto ’aore rā te hepohepo ’e nō te fa’aora i tei pēpē » (« Te ’ohipa ’ā’amu ’utuāfare ’e te ’ohipa hiero : Tā’atira’a ’e fa’aorara’a », Ensign ’aore rā Liahona, Mē 2018, 47).