Ni’a noa i te rorouira : Feiā ’Āpī Pa’ari
E maha ha’api’ira’a māramarama nō te mau tau pōiri
’A fā ai te pararera’a ma’i pohe mai te ata pōiri ra i ni’a i te ao nei, tē vai nei ā te rāve’a nō te māramarama ’ia puta mai i roto.
Tē ora ra te ta’ata pāpa’i i Voronezh Oblast, Rusia.
’Aita i maoro a’enei, ’ua fa’ahaere au i tā’u ’ūrī nā rāpae, ’e ’ua ’ite au i te hō’ē ata pōiri ’e te mau hihi mahana e māpiha ra nā rotoroto. ’Ua fa’aha’amana’o te reira iā’u i te pararera’a o te ma’i pohe. Noa atu ā te huru pōiri ’e te ’oto o tō tātou vaira’a mai te ata pōiri ra, e mea pūai atu ā te here o te Fatu nō tātou, mai te mahana te huru.
Tē vai nei te hō’ē parau nā roto i te reo Peretāne e nā ’ō ra « E maita’i e vai ra i roto i te mau ata ato’a », ’oia ho’i, e nehenehe te mau ’ati ato’a e ha’api’i ia tātou i te hō’ē mea maita’i. I te ferurira’a vau i te mea tei tauturu iā’u ’ia vai hau noa i roto i te mau ’āva’e i ma’iri, nā reira ato’a te mea tei ’ore i tauturu rahi mai, ’ua ’ite mai au e maha parau mau faufa’a rahi, ’o tā’u e mana’o ra, e ha’amaita’i tāmau i tō’u orara’a i muri roa ato’a i teie fifi.
1. Tē vai nei te pārurura’a i roto i te pe’era’a i te peropheta
Te mau piara’a rāve’a tūreiara’a sōtiare nō ni’a i te hope’a o teie nei ao, nā reira ato’a te mau parau ’āpī ha’avare nō ni’a i te mau rāve’a ferurihia nō te fa’a’ore i te tirotiro, ’aita te reira i fa’atae mai i te mana’o ’oa’oa nō ni’a i te orara’a. Noa atu ā ’ua ’ōpuahia te reira mau poro’i nō te tauturu i te ta’ata ’ia vai pāruru noa ’e ’ia vai maita’i noa i te pae nō te ea, ’ua rahi fa’ahou atu tō’u mata’u i nā mua atu. ’Ei hi’ora’a, i muri iho vau i te ’itera’a i te ono o te parau nō ni’a i te mau fa’ano’ano’a mā’a tē nehenehe paha e ha’apohe i te tirotiro corona, tē ha’amana’o ra vau i te ha’ape’ape’ara’a ē ’ua nava’i ānei tā mātou mau fa’ano’ano’a mā’a i roto i te vaira’a mā’a, ta’a ’ē noa atu i te ferurira’a ’ua tae ānei te taime nō tō’u pohe.
I roto i te hō’ē ’āmuira’a rahi ’a piti matahiti i teienei, ’ua ani te peresideni Russell M. Nelson ia tātou ’ia ’āmui i roto i te hō’ē ha’apaera’a rāve’a ha’apararera’a e 10 mahana, te mau rāve’a ha’apararera’a ato’a e fa’atae mai i te mau mana’o ’ino ’e te vi’ivi’i.1 ’Ua fa’aro’o vau i tāna parau a’o mai te hō’ē parau fa’aara, nō reira ’ua fa’aea vau i te fa’a’ohipa ma’a rāve’a tūreiara’a sōtiare tei ha’apau noa i tō’u taime. ’Ua rahi atu tō’u ’oa’oa, ’ua iti mai te ha’ape’ape’ara’a.
I teienei, tē ’ite ra vau ē, tītauhia ’ia tāmā fa’ahou i tā’u mau peu i te pae nō te mau rāve’a tūreiara’a sōtiare. ’Ua hi’o vau i muri ’e ’ua uiui tō’u mana’o : I ’ite ānei te peresideni Nelson i terā tau ē, e nehenehe te mau rāve’a tūreiara’a sōtiare e riro ’ei puna nō te mana’o taiā ’e te ’ino i teie mahana, i roto i teie tau fifi rahi ? Tē vai mau nei te pārurura’a i roto i te pe’era’a i te peropheta. ’Ua riro te mau parau a tō tātou feiā fa’atere o te ’Ēkālesia mai te hō’ē hihi mahana, tē māpiha ra i roto i te ta’a ’ore ’e tē tūrama ra i te ’ē’a i te hau.
2. E ’aro te fa’aineinera’a i te mata’u
Te tahi ato’a mea tā’u i au ’ore ri’i, ’o te fa’aro’ora’a i te ta’ata, mai i te tau o Noa ra, tei fa’ao’ō’o i te tahi atu mau ta’ata nō tā rātou fa’aineinera’a ’e te mana’o pāpū. I tō’u mana’o, tē vai nei te ta’ata tei ha’amātau ia rātou i te peu tāu’a-’ore-ra’a i te ananahi. Te ta’ata pa’ari mau, e pe’e ïa rātou i te parau a te mau peropheta ’e e tāmata māite rātou i te fa’arava’i ia rātou iho.
E rave rahi matahiti tō te feiā fa’atere o te ’Ēkālesia ha’api’ira’a ia tātou ’ia fa’ati’amā ia tātou i te mau tārahu, ’ia fa’arahi i te ’ite pae ha’api’ira’a nō te fa’arava’i maita’i a’e ia tātou ’e ia vetahi ’ē, ’ia nava’i tā tātou ha’aputura’a mā’a ’e te pape, ’e ’ia fa’aherehere i te moni mai te mea e nehenehe. ’Ua ’ite au e mea ta’a ’ē tō terā ’e terā ta’ata vaira’a, ’e tē vai nei te mau fenua ’aita e fa’ati’a nei i te mau tino huira’atira ’ia ha’aputu i te mā’a ’e te tahi ato’a mau tauiha’a. Noa atu ā rā te reira mau huru ’ōpanira’a, e au ē, e nehenehe tā tātou tāta’itahi e hi’o mai i te hō’ē mea tā tātou e nehenehe e rave nō te fa’aineine rahi atu ā ia tātou nō ananahi.
E mana’o pāruru rahi a’e tō’u i te taime ’ua fa’aitoito vau i te ha’apa’o i te parau ’e ’ua ti’a iā’u ’ia ha’afātata i te Fatu ma te ti’aturi, nō te ani atu i te tauturu. ’Ua riro te reira fa’aineinera’a mai te tahi atu ā hihi mahana e tāpū nei nā roto i te mata’u ’a fa’a’ana’ana ai i te tīa’ira’a.
3. Nā tō tātou huru e fa’a’ite i te vāhi ta’a ’ē
I teie pararera’a ma’i pohe ’ua rahi atu ā tō’u māuruuru i te mau ta’ata tei fa’aitoito iā’u maoti te mau poro’i fa’auru, te mau hi’ora’a ’e te parau hō’ata maita’i. E māramarama noa tō’u mahana i teie mau hoa iti. E fa’aha’amana’o mai rātou ē, e ti’a ia tātou ’ia mā’iti e aha tā tātou e rave i mua i te mau mea ato’a e tupu ’ati a’e ia tātou.
’Ua tāmata vau i te pe’e i te reira hi’ora’a i te fa’ataimera’ahia te mau purera’a a te ’Ēkālesia. ’Aita vau i topa i roto i tā’u mau uira’a ē « nō te aha pa’i » ’e « nāhea pa’i », ’ua mā’iti rā vau i te hi’o i te mau vāhi maita’i nō te ha’api’ira’a i te ’evanelia fa’atumuhia i ni’a i te ’utuāfare. Tē ’ite nei au i teienei ē, e mea tauturu mau ’ia feruri ’e ’ia fa’aoti e fa’a’amu i te huru maita’i, noa atu ā te taime fifi, ’ua tauturu te reira iā’u ’ia vai pūai atu ā i te pae vārua, hau atu i tei noa’a iā’u ’āhani te ’ino’ino i vai noa na. Mai te toru o te hihi mahana, e ti’a i te huru maita’i e tīahi i te fē’a’a ’e e fa’aanaanaea i tō tātou vārua.
4. E hoa mana rahi te Vārua Maita’i i roto i te ’arora’a
I te hō’ē mahana, tē tupu ra te mana’o ’oto ’e te ’ōtahi, ’ua fa’aoti au e fa’aro’o i te Pupu hīmene o te Fare menemene nā ni’a i te natirara. ’’Ua tauturu noa te pehe iā’u ’ia putapū i te mana o te Vārua Maita’i. Tē vai ra te tahi ’āparaura’a i ni’a i terā ha’apurorora’a, ’ua au roa vau i te tai’ora’a i te mau ta’ata tē fa’a’ite ra i tō rātou here ’e te māuruuru ’ati a’e i te ao nei ! ’Ua tae mai te mana’o tāhō’ē ’e ’o rātou. ’A tāmarū noa ai te fa’aurura’a o te Vārua Maita’i i tō’u ’ā’au māuiui, ’ua rahi mai tō’u ’oa’oa ’e tō’u mana’o au.
’Ua ’ite noa vau, fa’ahou ’e fa’ahou ā ē, mai te mea e fa’aitoito vau nō te tītau manihini i te Vārua Maita’i i roto i tō’u orara’a, e tauturu mai ’oia i roto i te mau mea ato’a o tā’u e hina’aro. E hoa mana rahi ’oia i roto i te ’arora’a, ’o tei hina’aro roa e hōro’a mai i te ō nō te hau, nō te tāmāhanahanara’a ’e nō te māramaramara’a. Mai te tahi hihi mahana, e nehenehe ’oia e tīahi i te mana’o rumaruma ma te fa’a’ite i te parau mau.
E ’imi i te mahana
E mea pūai a’e te Fatu i te hō’ē noa atu ’ati rahi. Mai te piti o te ’īrava o te hīmene 89 e parau nei :
’O te Fatu ra to’u māramarama, noa atu ā te mau ata,
E mea pūai a’e te fa’aro’o i te mata, ’ia hi’o i te reva.
I reira Iesu e fa’atere ari’i nei ma te hanahana ē a muri noa atu.
E aha ïa vau e fa’aea ai i roto i te pōiri ?2
’Āhani e ti’a ia tātou ’ia hāhaere ’āmui nā rāpae i teie mahana. E hi’o tātou i te reva, e hapu tātou i te mahana ’e e paraparau tātou nō ni’a i te mau parau mau e ha’amāramarama i tō tātou nei orara’a. Pāpū iā’u ē, e roa’a mai ia ’outou te mau mana’o rahi nō te fa’a’ite i te māramarama ia vetahi ’ē. Penei a’e e nehenehe ’outou e feruri i te tahi hāhaerera’a mai teie ’ia rumaruma mai te tahi vero pae manava i te ātea. Tei ia tātou nei te Fatu, ’aita e faufa’a e mata’u.